ഈ ലേഖയില്‍‍ തിരയുക

മാറാച്ചേരി പൗലോസിന്റെ ശവസംസ്‌കാരം കോതമംഗലം മാര്‍ത്തോമന്‍ ചെറിയ പള്ളിയില്‍ ഓര്‍ത്തഡോക്‌സ്‌ വൈദീകന്റെ മുഖ്യ കാര്‍മികത്വത്തില്‍ നടന്നു

കോതമംഗലം: വ്യാഴാഴ്‌ച (6-11-2008) അന്തരിച്ച ഓര്‍ത്തഡോക്‌സ്‌ സഭാംഗമായ കുത്തുകുഴി മാറാച്ചേരി എം.ടി. പൗലോസിന്റെ മൃതദേഹം ഹൈക്കാടതി വിധിയുടെ അടിസ്ഥാനത്തില്‍ (8 -11-2008) ശനിയാഴ്‌ച ഓര്‍ത്തഡോക്‌സ്‌ വൈദീകന്റെ കാര്‍മികത്വത്തില്‍ കോതമംഗലം മാര്‍ത്തോമന്‍ ചെറിയ പള്ളി സെമിത്തേരിയില്‍ സംസ്‌കരിച്ചു. മാര്‍ത്തോമന്‍ ചെറിയ പള്ളിയില്‍ നടന്ന ശുശ്രൂഷകള്‍ക്ക്‌ അദ്ദേഹത്തിന്റെ മകന്‍ കൂടിയായ ഓര്‍ത്തഡോക്‌സ്‌ സഭയിലെ തോമസ്‌ പോള്‍ റമ്പാന്‍ മുഖ്യ കാര്‍മികത്വം വഹിച്ചു.
വ്യാഴാഴ്‌ച (6-11-2008) അന്തരിച്ച എം.ടി. പൗലോസിന്റെ മൃതശരീരം ഇടവകയായ മാര്‍ത്തോമന്‍ ചെറിയ പള്ളിയില്‍ സംസ്‌കാരിക്കാന്‍ മറ്റൊരു മകനായ ബാബു പോള്‍ ഹൈക്കോടതിയില്‍ അനുമതി തേടിയിരുന്നു. തുടര്‍ന്നുണ്ടായ വിധിയുടെ അടിസ്ഥാനത്തിലാണ്‌ ഓര്‍ത്തഡോക്‌സ്‌ വൈദീകന്റെ കാര്‍മികത്വത്തില്‍ ശവസംസ്‌കാരം നടന്നത്‌. വിധിനടപ്പാകുന്നതു് തടസ്സപ്പെടാതിരിയ്ക്കാന്‍ വന്‍ പോലീസ്‌ സന്നാഹത്തെ പള്ളിയിലും പരിസരത്തും വിന്യസിച്ചിരുന്നു.


മാറാച്ചേരി എം.ടി. പൗലോസ്
തോമസ്‌ പോള്‍ റമ്പാച്ചന്‍

മൃതശരീരം പള്ളിയില്‍ 3 മണിയോടെ എത്തുന്നതിനു മുമ്പ്‌ യാക്കോബായ സുറിയാനി ക്രിസ്ത്യാനി സഭാവിഭാഗക്കാര്‍ പള്ളിയിലും പരിസരത്തും തടിച്ചുകൂടിയിരുന്നു. പള്ളിയകത്ത്‌ ധ്യാനവും സംഘടിപ്പിച്ചിരുന്നു. ഓര്‍ത്തഡോക്‌സ്‌ സഭയില്‍പെട്ടവരും പള്ളി പരിസരത്ത്‌ എത്തിയിരുന്നു. ശവസംസ്‌കാരം സമാധാനപരമായി നടത്താന്‍ ടി.യു. കുരുവിള എം.എല്‍.എ, ആര്‍.ഡി.ഒ, ഡിവൈ.എസ്‌.പി. എന്നിവരുടെ സാന്നിധ്യത്തില്‍ രാവിലെ മുതല്‍ ടി.ബി.യില്‍ ചര്‍ച്ച നടന്നിരുന്നു. ഇതിനുശേഷം വന്‍ പോലീസ്‌ സന്നാഹവും പള്ളിയിലും പരിസരത്തും വിന്യസിച്ചിരുന്നു.


കോടതിവിധി അനുസരിച്ച്‌ കോതമംഗലം ചെറിയ പള്ളിയില്‍ ഓര്‍ത്തഡോക്‌സ്‌ സഭയ്‌ക്ക്‌ ശുശ്രൂഷയ്‌ക്ക്‌ അനുമതി ലഭിച്ചതോടെ നീതി നടപ്പായതായി നിയുക്ത കാതോലിക്കാ പൗലോസ്‌ മാര്‍ മിലിത്തിയോസ്‌ പറഞ്ഞു. സുപ്രിംകോടതി വിധിയുടെ അന്തസ്സത്ത ഉള്‍ക്കൊണ്ടുള്ള ഹൈക്കോടതി തീരുമാനം നടപ്പിലാക്കിയ അധികൃതര്‍ക്ക്‌ അദ്ദേഹം നന്ദി രേഖപ്പെടുത്തി.

വീട്ടില്‍ നടത്തിയ ശുശ്രൂഷയ്‌ക്ക്‌ നിയുക്ത കാതോലിക്ക കൂടിയായ പൗലോസ്‌ മാര്‍ മിലിത്തിയോസ്‌ മെത്രാപ്പോലീത്ത, വൈദിക ട്രസ്റ്റി റവ. ഡോ. ജോണ്‍സ് ഏബ്രഹാം കോനാട്ട്, സഭാ സെക്രട്ടറി ഡോ. ജോര്‍ജ് ജോസഫ് , സികെ ഐസക് കോറെപ്പിസ്കോപ്പ ഐ സി പത്രോസ് റമ്പാന്‍ തുടങ്ങിയവര്‍ നിയുക്ത മെത്രാന്‍മാരായ ഫാ.സ്റ്റീഫന്‍ , ഫാ. ജോണ്‍ പണിയ്ക്കര്‍ തുടങ്ങിയവര്‍‍ നേതൃത്വം നല്കി.

പരിശുദ്ധ കരേക്കിന്‍ ദ്വിതീയന്‍ കൊച്ചിയിലെത്തി


കോട്ടയം: അര്‍മീനീയന്‍ സഭയുടെ അര്‍മീനിയന്‍ സുപ്രീം പാത്രിയര്‍ക്കീസ് കരേക്കിന്‍ രണ്ടാമന്‍ കാതോലിക്കാ ബാവ കൊച്ചിയിലെത്തി. രാവിലെ എട്ടുമണിക്ക് നെടുമ്പാശേരി വിമാനത്താവളത്തിലെത്തിയ കരേക്കിന്‍ രണ്ടാമനെ മലങ്കര ഓര്‍ത്തഡോക്സ് സഭയുടെ നിയുക്ത കാതോലിക്ക പൗലോസ് മാര്‍ മിലിത്തിയോസിന്റെ നേതൃത്വത്തില്‍ സ്വീകരിച്ചു.

അര്‍മീനിയ സഭയും മലങ്കര ഓര്‍ത്തഡോക്സ് സഭയും തമ്മിലുള്ള ബന്ധം ഊട്ടിയുറപ്പിക്കുന്നതിനാണ് സന്ദര്‍ശനമെന്ന് കരേക്കിന്‍ രണ്ടാമന്‍ പറഞ്ഞു. നെടുമ്പാശേരിയിലെത്തിയ കരേക്കിന്‍ രണ്ടാമനെ സ്വീകരിക്കാന്‍ നിയുക്ത കാതോലിക്ക പൌലോസ് മാര്‍ മിലിത്തിയോസ്, സഖറിയാ മാര്‍ അന്തോണിയോസ് ,സഭാ സെക്രട്ടറി ജോര്‍ജ് ജോസഫ്, വൈദീക ട്രസ്റ്റി ഫോ.ജോണ്‍സ് എബ്രഹം കോനാട്ട് തുടങ്ങിയവരുമെത്തിയിരുന്നു.

കേരള സന്ദര്‍ശനത്തിനെത്തിയ അര്‍മീനിയന്‍ സുപ്രീം പാത്രിയര്‍ക്കീസ് കരേക്കിന്‍ രണ്ടാമന്‍ കാതോലിക്കാ ബാവയെ സര്‍ക്കാര്‍ സംസ്ഥാന അതിഥിയായി പ്രഖ്യാപിച്ചിട്ടുണ്ടു്. നവം.നാലിനു് വൈകിട്ട് 5 മണിയോടെയാണ് ഇത് സംബന്ധിച്ച ഉത്തരവ് ദേവലോകം സഭാ ആസ്ഥാനത്തു ലഭിച്ചത്.

വൈകിട്ട് 7 ന് ദേവലോകം അരമനയില്‍ പരിശുദ്ധ ബസേലിയോസ്‌ മാര്‍ത്തോമ്മാ ദിദിമോസ്‌ പ്രഥമന്‍ ബാവയെ സംഘം സന്ദര്‍ശിക്കും. വൈകിട്ട്‌ 5 മണിക്ക്‌ പരിശുദ്ധ കരേക്കിന്‍ രണ്ടാമനെ കോട്ടയം മാമ്മന്‍ മാപ്പിള ഹാളില്‍ ഓര്‍ത്തഡോക്‌സ് സഭയുടെ പരമോന്നത ബഹുമതിയായ ഓര്‍ഡര്‍ ഓഫ്‌ സെന്റ്‌ തോമസ്‌ നല്‍കി ആദരിക്കും. പരിശുദ്ധ ബസേലിയോസ്‌ മാര്‍ത്തോമ്മാ ദിദിമോസ്‌ പ്രഥമന്‍ കാതോലിക്കാ ബാവായുടെ അധ്യക്ഷതയില്‍ ചേരുന്ന സമ്മേളനത്തില്‍ വിവിധ സഭാ പിതാക്കന്മാരും ജനനേതാക്കളും ആശംസകള്‍ അര്‍പ്പിക്കും. എം. പി., എം. എല്‍. എ. സഭാ ഭാരവാഹികള്‍ എന്നിവര്‍ പങ്കെടുക്കും.


7 ന് രാവിലെ 7.30 ന് പരുമല പള്ളിയില്‍ നടക്കുന്ന മൂന്നിന്മേല്‍ കുര്‍ബാനയില്‍ സംഘം പങ്കെടുക്കും. തുടര്‍ന്ന് പൊതുസമ്മേളനം. 10.30 ന് പരുമല മാര്‍ ഗ്രിഗോറിയോസ് ആശുപത്രിയിലെ ക്യാന്‍സര്‍ സെന്ററിന്റെ ശിലാസ്ഥാപനം 11.30 ന് മാവേലിക്കര ഭദ്രാസനത്തിന്റെ പുതിയ ഓഫീസില്‍ സ്വീകരണം, 2 ന് നിരണം പള്ളി സന്ദര്‍ശനം.
8 ന് രാവിലെ 7.30 ന് പഴയ സെമിനാരിയിലെ കുര്‍ബാനയില്‍ പങ്കെടുക്കും. 10 ന് തിയോളജിക്കല്‍ കോളേജിലെ റെക്കാഡിംഗ് സ്റ്റുഡിയോ ഉദ്ഘാടനം. 12 ന് കോലഞ്ചേരി മെഡിക്കല്‍കോളേജ് സന്ദര്‍ശനം 4 ന് ചെന്നൈയ്ക്ക് പുറപ്പെടും. ബുധന്‍, നവംബര്‍ 05, 2008

കരേകിന്‍ ദ്വിതീയന്‍ പാത്രിയര്‍ക്കീസ് ബാവ‍ വരുന്നു



കോട്ടയം: അര്‍മേനിയന്‍ അപ്പൊസ്തലിക സഭയുടെ സുപ്രീം പത്രിയര്‍‍ക്കീസായ എച്മിയാഡ്സിന്‍ സിംഹാസനത്തിന്റെ പരിശുദ്ധ കരേക്കിന്‍‍ ദ്വിതീയന്‍ നെര്‍‍സീസിയന്‍ കാതോലിക്കാ ബാവാ നവംബര്‍ അഞ്ചാം തീയതി ബുധനാഴ്ച്ച മുതല്‍ എട്ടാംതീയതി വരെ പൗരസ്ത്യ കാതോലിക്കാ പരിശുദ്ധ ബസേലിയോസ്‌ മാര്‍ത്തോമ്മാ ദിദിമോസ്‌ പ്രഥമന്‍ ബാവായുടെ ക്ഷണമനുസരിച്ചു് മലങ്കര സഭ സന്ദര്‍ശിയ്ക്കും.

ഓറിയന്റല്‍ ഓര്‍ത്തഡോക്സ് സഭയുടെ അംഗസഭകളിലൊന്നായ അര്‍മീനിയന്‍ ഓര്‍ത്തഡോക്സ് സഭയും മലങ്കര സഭയും സഹോദരീസഭകളാണു് . ഇരുസഭകളും തമ്മില്‍ പൂര്‍ണ കൗദാശിക സംസര്‍ഗമുണ്ടു്.

അര്‍മേനിയന്‍ സുപ്രീം കാതോലിക്കായുടെ സംഘത്തില്‍ ഇന്ത്യയിലെ അര്‍മേനിയന്‍ അംബാസിഡര്‍ ഡോ. അര്‍ഷാട്ട് കൊച്ചാറിയ ഉള്‍പ്പെടെ 16 പ്രതിനിധികളാണുള്ളത്. നവംബര്‍ അഞ്ചാം തീയതി ബുധനാഴ്ച്ച രാവിലെ എട്ടിന് നെടുമ്പാശേരി വിമാനത്താവളത്തില്‍ എത്തുന്ന അര്‍മീനിയന്‍ സംഘത്തെ നിയുക്ത കാതോലിക്ക പൌലോസ് മാര്‍ മീലിത്തിയോസിന്റെ നേതൃത്വത്തില്‍ ഓര്‍ത്തഡോക്സ് സഭാ ഭാരവാഹികള്‍ സ്വീകരിക്കും.

വൈകുന്നേരം ഏഴിന് സംഘം ദേവലോകം അരമനയില്‍ പരിശുദ്ധ ദിദിമോസ് പ്രഥമന്‍ കാതോലിക്കാബാവയുമായി കൂടിക്കാഴ്ച്ച നടത്തും ആറാം തീയതി വൈകുന്നേരം അഞ്ചിന് കരേക്കിന്‍ കാതോലിക്കാബാവായ്ക്ക് മാമന്‍മാപ്പിള ഹാളില്‍ പൗരസ്വീകരണം നല്കും. ഏഴാം തീയതി 12-ന് കോലഞ്ചേരി മെഡിക്കല്‍ കോളജില്‍ സന്ദര്‍ശനം നടത്തിയശേഷം കോല്‍ക്കത്ത, ചെന്നൈ എന്നിവിടങ്ങളിലെ അര്‍മേനിയന്‍ സഭാകേന്ദ്രങ്ങളുടെ 300-ആം വാര്‍ഷികത്തില്‍ പങ്കെടുക്കാന്‍ വൈകുന്നേരം നാലിന് ചെന്നൈയിലേക്ക് പോകും.

മലങ്കര സഭ സന്ദര്‍ശിക്കുന്ന രണ്ടാമത്തെ അര്‍മീനിയന്‍ കാതോലിക്കായാണ്‌ 1963 നവംബറില്‍ പരിശുദ്ധ വസ്‌കന്‍ ഒന്നാമന്‍ മലങ്കര സഭ സന്ദര്‍ശിച്ചിട്ടുണ്ട്‌. ഒരു കോടി അര്‍മീനിയന്‍ ഓര്‍ത്തഡോക്‌സ്‌ സഭാ വിശ്വാസികളുടെ ആത്മീയ പിതാവായ പരിശുദ്ധ കരേക്കിന്‍ ദ്വിതീയന്‍ ബാവ.

ആര്‍മീനിയന്‍ ഓര്‍ത്തഡോക്‌സ്‌ സഭയ്ക്കു് ആര്‍മീനിയന്‍ ആപ്പൊസ്തോലിക സഭ എന്നും പേരുണ്ടു്.
എച്മിയാഡ്സിനിലെ കാതോലിക്കോസിനെ കൂടാതെ അര്‍മീനിയന്‍ ഓര്‍ത്തഡോക്സ് സഭയ്ക്കു്‍ കിലിക്യയില്‍‍ ഒരു കാതോലിക്കോസും എച്മിയാഡ്സിനിലെ കാതോലിക്കോസിന്റെ കീഴില്‍ ഊര്‍ശലേമിലും കുസ്തന്തീനോപ്പോലീസിലും ഓരോ പാത്രിയര്‍‍ക്കീസുമാരും പ്രധാനാചാര്യന്മാരായിട്ടുണ്ടു്. കിലിക്യയിലെ കാതോലിക്കാസനത്തിനു് സ്വയംശീര്‍‍ഷകത്വം കൈവന്നിട്ടുണ്ടെങ്കിലും ഒറ്റ അര്‍മീനിയന്‍ ഓര്‍ത്തഡോക്സ് സഭയെന്ന അവസ്ഥയ്ക്കു് മാറ്റമില്ല. അതു് അര്‍മീനിയന്‍ ഓര്‍ത്തഡോക്സ് സഭയുടെ കിലിക്യാ സിംഹാസനം എന്നറിയപ്പെടുന്നു.

എച്മിയാഡ്സിന്‍ സിംഹാസനത്തിന്റെ കാതോലിക്കോസെന്ന നിലയില്‍ പരിശുദ്ധ കരേക്കിന്‍‍ ദ്വിതീയന്‍ നെര്‍‍സീസിയന്‍ ബാവയാണു് സുപ്രീം പത്രിയര്‍‍ക്കീസ്. കിലിക്യയിലെ സിംഹാസനത്തിന്റെ കാതോലിക്കോസ് പരിശുദ്ധ അറാം പ്രഥമന്‍ കെഷീഷിയന്‍ ബാവയും ഊര്‍ശലേമിലെ അര്‍മീനിയന്‍ പത്രിയര്‍‍ക്കീസ് ശ്രേഷ്ഠ തോര്‍ക്കോം മണുഗിയാന്‍ ബാവയും കുസ്തന്തീനോപ്പോലീസിലെ അര്‍മീനിയന്‍ പത്രിയര്‍‍ക്കീസ് ശ്രേഷ്ഠ മെസ്രോബ് മുത്തഫിയാന്‍ ബാവയുമാണു്.

എളനാട് പള്ളി: കുര്‍ബാന കഴിഞ്ഞു മടങ്ങിയ മലങ്കര സഭാ വൈദികനെ വധിക്കാന്‍ ശ്രമം



എളനാട്: സെന്റ് മേരീസ് പള്ളിയിലെ അസി.വികാരി ഫാ. മാത്യു ജേക്കബ് പുതുശേരിയെ(45) അന്ത്യോക്യന്‍ യാക്കോബായ സുറിയാനി ക്രിസ്ത്യാനി സഭക്കാര്‍ വഴിയില്‍ തടഞ്ഞു നിര്‍ത്തി മര്‍ദിച്ചു. കുര്‍ബാന കഴിഞ്ഞു ബൈക്കില്‍ മണ്ണുത്തിയിലെ താമസസ്ഥലത്തേക്കു മടങ്ങുമ്പോള്‍ ഒക്ടോബര്‍ 27 തിങ്കളാഴ്ച ഉച്ചയ്ക്ക് ഒരു മണിയോടെ പെട്രോള്‍ പമ്പിനു സമീപത്തായിരുന്നു അക്രമം.

ഫാ. മാത്യു ജേക്കബ് പുതുശേരിയെ തൃശൂര്‍ ജൂബിലി മിഷന്‍ മെഡിക്കല്‍ കോളജില്‍ ശ്രേഷ്ഠ നിയുക്ത കാതോലിക്കാ ബാവാ പൌലോസ് മാര്‍ മിലിത്തിയോസ് സന്ദര്‍ശിച്ചപ്പോള്‍- ആക്രമണത്തിനുപിന്നില്‍ കേഫാ


എളനാട് സെന്റ്‌ മേരീസ്‌ പള്ളി സംബന്ധിച്ച്‌ മലങ്കര ഓര്‍ത്തഡോക്‌സ് സഭയും അന്ത്യോക്യന്‍ യാക്കോബായ സുറിയാനി ക്രിസ്ത്യാനി സഭയും തമ്മില്‍ തര്‍ക്കം ഉണ്ടായിരുന്നു. കഴിഞ്ഞമാസമുണ്ടായ ഹൈക്കോടതിവിധി മലങ്കര ഓര്‍ത്തഡോക്‌സ് സുറിയാനി സഭയ്ക്കു് അനുകൂലമായതിനെ തുടര്‍ന്ന്‌ ഞായറാഴ്ച ഫാ.മാത്യു ജേക്കബ് പുതുശേരിയ്ക്കു് താക്കോല്‍ കൈമാറിയിരുന്നു. പിറ്റേന്നു് (ഒക്ടോബര്‍ 27 ) മൂന്നിന്‍മേല്‍ കുര്‍ബാന കഴിഞ്ഞു് പള്ളി മാനേജിങ് കമ്മിറ്റിയംഗം ജിജു വര്‍ഗീസിന്റെ കൂടെ ബൈക്കില്‍ മടങ്ങുമ്പോഴായിരുന്നു ആക്രമണം. പളളിയില്‍ നിന്നു് ഇറങ്ങിയപ്പോള്‍ മുതലേ പിന്തുടര്‍ന്ന സംഘമാണ്‌ ആക്രമണം നടത്തിയത്‌. ആദ്യം ഭീഷണിയും അസഭ്യവുമായി പിന്തുടര്‍ന്ന മാരുതി കാറിലെത്തിയ സംഘം പിന്നീട്‌ വൈദികന്‍ ഓടിച്ചിരുന്ന ബൈക്ക്‌ ഇടിച്ചിടുകയായിരുന്നു. വീണുപരുക്കേറ്റ വൈദികന്റെ ഹെല്‍മെറ്റ്‌ ഊരിമാറ്റി അദ്ദേഹത്തിന്റെ തലയ്‌ക്ക് കല്ലുവച്ചിടിച്ചു. നെറ്റിയുടെ വലതുഭാഗത്ത് മുറിവേറ്റിട്ടുണ്ട്. കല്ലുകൊണ്ടുള്ള അക്രമം തടുക്കുന്നതിനിടയ്ക്ക് വലതു കൈക്കും പരുക്കുണ്ട്. ഒപ്പമുണ്ടായിരുന്ന പള്ളി മാനേജിങ് കമ്മിറ്റിയംഗം ജിജു പി.വര്‍ഗീസിനെ തള്ളിയിടുകയും ചെയ്തു. പരുക്കേറ്റ ഫാ.മാത്യു ജേക്കബ് പുതുശേരിയെ തൃശൂര്‍ ജൂബിലി ആശുപത്രിയില്‍ പ്രവേശിപ്പിച്ചു. അദ്ദേഹം അപകടനില തരണം ചെയ്‌തതായി ആശുപത്രി വൃത്തങ്ങള്‍അറിയിച്ചു.

സംഭവത്തില്‍ എളനാട് പ്രളയക്കാട്ടുകോട്ടയില്‍ ബേബി, മോഴിക്കുളം പൌലോസ്(ഉണ്ണി) എന്നിവര്‍ക്കെതിരെ കേസെടുത്തിട്ടുണ്ട്. ഇവര്‍ സഞ്ചരിച്ചിരുന്ന കാര്‍ പൊലീസ് കസ്റ്റഡിയിലെടുത്തു. പൂര്‍വ വൈരാഗ്യമാണ് അക്രമത്തിനിടയാക്കിയതെന്ന് എസ് ഐ ടി.ടി.സുബ്രഹ്മണ്യന്‍ പറഞ്ഞു.

ശ്രേഷ്ഠ നിയുക്ത കാതോലിക്കാ ബാവാ പൗലോസ് മാര്‍ മിലിത്തിയോസ് ഫാ. മാത്യു ജേക്കബ് പുതുശേരിയെ ആശുപത്രിയില്‍ സന്ദര്‍ശിച്ചു. അക്രമത്തിനുവേണ്ടി മാത്രമായി അന്ത്യോക്യന്‍ യാക്കോബായ സുറിയാനി ക്രിസ്ത്യാനി സഭയില്‍ കേഫാ എന്ന പേരില്‍ സംഘടന പ്രവര്‍ത്തിക്കുന്നുണ്ടെന്നും തീവ്രവാദത്തിന്റെ മറ്റൊരു മുഖമാണിതെന്നും അദ്ദേഹം ആരോപിച്ചു.

പിറവം റാലിയും വലിയപള്ളി ഇടവകസംഗമവും (വീഡിയോ)






നീതി നിഷേധത്തിനെതിരെ ഓര്‍ത്തഡോക്‌സ്‌ സഭ ഉപവാസം നടത്തി

ഓര്‍ത്തഡോക്സ് സഭയെ ചവിട്ടി മെതിക്കാമെന്നു സര്‍ക്കാര്‍ കരുതരുത്: ശ്രേഷ്ഠ നിയുക്ത ബാവാ



ഡോ. തോമസ് മാര്‍ അത്തനാസിയോസ് മെത്രാപ്പോലീത്ത ഉപവാസയോഗത്തെ അഭിസംബോധന ചെയ്യുന്നു

കൊച്ചി: നീതി നിഷേധത്തിനും പൊലീസ് പീഡനത്തിനുമെതിരെ ഓര്‍ത്തഡോക്‌സ്‌ മെത്രാപ്പോലീത്തമാരും മാനേജിങ്‌ കമ്മിറ്റി അംഗങ്ങളും ഹൈക്കോടതി ജങ്‌ഷനില്‍ ഒക്ടോ മാസം 24- ആം തീയതി ഏകദിന ഉപവാസം നടത്തി.

ഓര്‍ത്തഡോക്‌സ്‌ സഭയെ ചവിട്ടി മെതിച്ചു മുന്നോട്ടു പോകാമെന്നു സര്‍ക്കാര്‍ കരുതരുതെന്ന് ഉപവാസ യോഗത്തില്‍ അധ്യക്ഷപ്രസംഗം നടത്തിക്കൊണ്ടു് ശ്രേഷ്ഠ നിയുക്ത കാതോലിക്കാ ബാവാ പൌലോസ് മാര്‍ മിലിത്തിയോസ് മുന്നറിയിപ്പു് നല്‍കി. തര്‍ക്കമുള്ളതും ഓര്‍ത്തഡോക്സ് സഭയ്ക്ക് അവകാശപ്പെട്ടതുമായ പള്ളികളില്‍ പാത്രിയര്‍ക്കീസ് ബാവായുടെ നേതൃത്വത്തില്‍ പ്രവേശിക്കാനുള്ള യാക്കോബായ സുറിയാനി ക്രിസ്ത്യാനി സഭാ മെത്രാപ്പൊലീത്തമാരുടെ ശ്രമം പ്രതിഷേധാര്‍ഹമാണ്. സഭയ്ക്ക് അവകാശപ്പെട്ട ദേവാലയങ്ങളും സ്ഥാപനങ്ങളും സംരക്ഷിക്കുമെന്ന് അദ്ദേഹം പറഞ്ഞു.


ചെങ്ങന്നൂര്‍ ഭദ്രാസനാധിപന്‍ തോമസ് മാര്‍ അത്തനാസിയോസ് മെത്രാപ്പോലീത്തയാണു് ഉപവാസയോഗം ഉദ്ഘാടനം ചെയ്തതു് . വോട്ടുബാങ്ക് രാഷ്ട്രീയത്തിന്റെ സമ്മര്‍ദത്തിനടിപ്പെട്ട് ഓര്‍ത്തഡോക്സ് സഭയോട് അനീതികാട്ടരുതെന്ന് അദ്ദേഹം സര്‍ക്കാരിനോട് ആവശ്യപ്പെട്ടു. സഭയ്ക്കു രാഷ്ട്രീയമില്ല.

വിശ്വാസികളുടെ രാഷ്ട്രീയ വിശ്വാസത്തെ ചോദ്യംചെയ്യുകയുമില്ല. എന്നാല്‍ സഭ പീഡിപ്പിക്കപ്പെടുമ്പോള്‍ വിശ്വാസികള്‍ അണി ചേരും. വിശ്വാസികളെ കടുത്ത നടപടിക്കു പ്രേരിപ്പിക്കരുത്. എറണാകുളം ജില്ലയ്ക്ക് അപ്പുറവും നിയമസഭാ മണ്ഡലങ്ങള്‍ ഉണ്ടെന്നു സര്‍ക്കാര്‍ മനസിലാക്കണം. അരമനകളില്‍ കയറി സ്തുതിവചനങ്ങള്‍ പറഞ്ഞ ശേഷം വിശ്വാസികളെ തെരുവില്‍ തല്ലുന്നത് നിര്‍ത്തണം. രാഷ്ട്രീയ ഉപജാപം നടത്തി സഭയെ തകര്‍ക്കാന്‍ ആരും ശ്രമി ക്കരുത്.

ഒന്നായിക്കഴിഞ്ഞിരുന്ന വിശുദ്ധ മാര്‍ത്തോമായുടെ മക്കളെ പലതട്ടിലാക്കിയതു വിദേശ മേല്‍ക്കോയ്മയാണെന്നും പാത്രിയര്‍ക്കീസ് ബാവായുടെ സന്ദര്‍ശനത്തിലും അതാണു സംഭവിക്കുന്നതെന്നും അദ്ദേഹം കുറ്റപ്പെടുത്തി. സന്ദര്‍ശക വീസയില്‍ വന്നു സഭയുടെ പള്ളികളില്‍ കടന്നുകയറുന്നതിനെയാണ് എതിര്‍ക്കുന്നത്. നീതി പൂര്‍വ്വകമായ സമാധാന ചര്‍ച്ചകള്‍ക്ക് ഓര്‍ത്തഡോക്സ് സഭ തയാറാണെന്നും അദ്ദേഹം പറഞ്ഞു.


ഡോ. തോമസ് മാര്‍ അത്തനാസിയോസ് മെത്രാപ്പോലീത്ത, യൂഹാനോന്‍ മാര്‍ ക്രിസോസ്റ്റമോസ് മെത്രാപ്പോലീത്ത, സഖറിയാസ് മാര്‍ തെയോഫിലോസ് മെത്രാപ്പോലീത്ത, , കുര്യാക്കോസ് മാര്‍ ക്ളിമ്മീസ് മെത്രാപ്പോലീത്ത, പൌലോസ് മാര്‍ പക്കോമിയോസ് മെത്രാപ്പോലീത്ത, നിയുക്ത മെത്രാപ്പൊലീത്തമാരായ ഫാ. ഡോ. മര്‍ക്കോസ് ജോസഫ്, ഫാ. സ്റ്റീഫന്‍, ഫാ. ഡോ. മാത്യു ബേബി, ഫാ. ഡോ. ജോണ്‍ പണിക്കര്‍, ക്രിസ്റ്റഫോറസ് റമ്പാന്‍, എല്‍ദോ റമ്പാന്‍, സഭാ വൈദിക ട്രസ്റ്റി ഫാ. ഡോ. ജോണ്‍സ് ഏബ്രഹാം കോനാട്ട്, സഭാ സെക്രട്ടറി ഡോ. ജോര്‍ജ് ജോസഫ് എന്നിവര്‍ പ്രസംഗിച്ചു.

ഓര്‍ത്തഡോക്‌സ്‌ സഭയുടെ പള്ളികളിലെ അക്രമങ്ങള്‍ക്കും കടന്നുകയറ്റങ്ങള്‍ക്കും സര്‍ക്കാര്‍ പിന്തുണ നല്‍കുന്നു

കോട്ടയം:ഓര്‍ത്തഡോക്‌സ്‌ സഭയുടെ പള്ളികള്‍, സ്ഥാപനങ്ങള്‍ എന്നിവിടങ്ങളില്‍ യാക്കോബായ സുറിയാനി ക്രിസ്ത്യാനി സഭാവിഭാഗം (പാത്രിയര്‍ക്കീസ്‌ വിഭാഗം) നടത്തുന്ന അക്രമങ്ങള്‍ക്കും കടന്നുകയറ്റങ്ങള്‍ക്കും സര്‍ക്കാര്‍ പിന്തുണ നല്‍കുകയാണെന്ന്‌ മലങ്കര ഓര്‍ത്തഡോക്‌സ്‌ സഭാ നേതൃത്വം ഒക്ടോ. 21-ആം തീയതി പത്രസമ്മേളനത്തില്‍ ആരോപിച്ചു.


പിറവം വലിയപള്ളിയില്‍ ഇടവക സംഗമത്തിനെത്തിയ വിശ്വാസികള്‍ക്കും വൈദികര്‍ക്കും നേരെ പിറവത്തു മുന്‍പു നല്‍കിയ ഉറപ്പു ലംഘിച്ച് ആര്‍ഡിഒയും ഡിവൈഎസ്പിയും പൊലീസിനെ ഉപയോഗിച്ചു ലാത്തിച്ചാര്‍ജ് നടത്തിയതു ഹീനവും അപലപനീയവുമാണെന്നു നിയുക്ത ബാവാ ശ്രേഷ്ഠ നിയുക്തകാതോലിക്കാ ബാവാ പൌലോസ് മാര്‍ മിലിത്തിയോസ് പറഞ്ഞു.

 

 പിറവത്ത് ആര്‍ഡിഒ നല്‍കിയ ഉറപ്പു പാലിക്കാന്‍ നിര്‍ദേശം നല്‍കുമെന്നു ദേവലോകം അരമനയില്‍ വന്ന് ഉറപ്പു നല്‍കിയ ഇടതു നേതാക്കള്‍ വാക്കു പാലിച്ചില്ല. 1934-ലെ സുപ്രീംകോടതിവിധി അംഗീകരിച്ച മലങ്കര സഭാ ഭരണഘടന അനുസരിച്ച്‌ ഭരിയ്ക്കപ്പെടേണ്ട ഓര്‍ത്തഡോക്‌സ് പള്ളികളില്‍ നിയമവിരുദ്ധമായി പ്രവേശിക്കുന്നതിന്‌ യാക്കോബായ സുറിയാനി ക്രിസ്ത്യാനി സഭാവിഭാഗത്തിന്‌ (പാത്രിയര്‍ക്കീസ്‌  വിഭാഗം) സംസ്‌ഥാന സര്‍ക്കാര്‍ ഒത്താശ ചെയ്‌തുകൊടുക്കുകയാണ്‌. പിറവം വലിയപള്ളിയില്‍ ഓര്‍ത്തഡോക്‌സ് സഭാവിഭാഗത്തിന്‌ നേരെ പോലീസ്‌ നടത്തിയ അതിക്രൂരമായ ലാത്തിച്ചാര്‍ജും സര്‍ക്കാരിന്റെ അറിവോടെയാണെന്ന്‌ സംശയിക്കേണ്ടിയിരിക്കുന്നുവെന്ന്‌ നിയുക്‌ത ബാവ പറഞ്ഞു.

 

 

ഓര്‍ത്തഡോക്സ് സഭാവിശ്വാസികള്‍ക്കു നേരെ പൊലീസ് ലാത്തിച്ചാര്‍ജ് നടത്തുമ്പോള്‍ അതിനു പ്രേരണ നല്‍കിയ വിഭാഗത്തിന്റെ പരിപാടിയില്‍ പങ്കെടുക്കുകയാണ് ഇടതു നേതാക്കള്‍ ചെയ്തത്. സര്‍ക്കാരില്‍ ഓര്‍ത്തഡോക്‌സ്‌സഭയ്‌ക്കുള്ള വിശ്വാസം നഷ്ടപ്പെട്ടിരിക്കയാണ്‌. രാഷ്ട്രീയനേട്ടം ഉണ്ടാക്കാന്‍ കഴിയാത്തതിനാലാണ്‌ സര്‍ക്കാര്‍ ഓര്‍ത്തഡോക്‌സ്‌  സഭയെ അവഗണിക്കുന്നത്‌. എറണാകുളം ജില്ലയിലെ വോട്ട് ബാങ്ക് തങ്ങളാണെന്ന യാക്കോബായ വിഭാഗത്തിന്റെ പ്രചാരണം വിശ്വസിച്ചാണു സര്‍ക്കാര്‍ പ്രവര്‍ത്തിക്കുന്നതെന്നു ശ്രേഷ്ഠ നിയുക്ത ബാവാ പൌലോസ് മാര്‍ മിലിത്തിയോസ് കുറ്റപ്പെടുത്തി.

 

ഓര്‍ത്തഡോക്സ് സഭാവിശ്വാസികള്‍ക്കും വോട്ട് അവകാശമുണ്ടെന്നു രാഷ്ട്രീയ പാര്‍ട്ടികള്‍ മനസ്സിലാക്കണം. സഭയ്ക്കെതിരെ നടക്കുന്ന അക്രമങ്ങള്‍ക്കു സര്‍ക്കാരിനെ നിയന്ത്രിക്കുന്നവര്‍ കനത്ത വില നല്‍കേണ്ടിവരും നീതി നടക്കാത്ത സാഹചര്യത്തില്‍ സഭയുടെ ചെറുത്തുനില്‍പ്പുണ്ടാകും. യാക്കോബായ സുറിയാനി ക്രിസ്ത്യാനി സഭാവിഭാഗം (പാത്രിയര്‍ക്കീസ്‌ വിഭാഗം) എന്തും ചെയ്യാമെന്ന രീതിയില്‍ മുന്നോട്ടുപോവുകയാണ്‌. അക്രമത്തെ ഓര്‍ത്തഡോക്‌സ്‌ സഭ അംഗീകരിക്കുന്നില്ല. എന്നാല്‍, തങ്ങളുടെമേല്‍ കേസെടുത്താല്‍ വെറുതെയിരിക്കില്ലെന്നും ജയിലില്‍ പോകാന്‍ തയ്യാറാണെന്നും സഭാ നേതൃത്വം വ്യക്തമാക്കി.

 

പിറവം വലിയപള്ളിയില്‍ ലാത്തിച്ചാര്‍ജിന്‌ ഉത്തരവാദികളായ ഉദ്യോഗസ്ഥര്‍ക്കെതിരെ നടപടിയെടുക്കണമെന്നു് നിയുക്ത ബാവാ സര്‍ക്കാരിനോടാവശ്യപ്പെട്ടു. ലാത്തിചാര്‍ജിന്‌ നേതൃത്വം നല്‍കിയ ആര്‍.ഡി.ഒ.യെയും സ്‌ഥലം ഡിവൈ.എസ്‌.പി.യെയും നീക്കംചെയ്യണം.


സാക്കാ പ്രഥമന്‍ പാത്രിയര്‍ക്കീസിന്റെ  സന്ദര്‍ശനത്തിനെതിരല്ല

 സാക്കാ പ്രഥമന്‍ പാത്രിയര്‍ക്കീസ്‌ ബാവയുടെ സന്ദര്‍ശനത്തിന്‌ ഓര്‍ത്തഡോക്‌സ്‌ സഭ തടസ്സമല്ല, തടസ്സപ്പെടുത്തേണ്ട ആവശ്യവുമില്ല. എന്നാല്‍, 1934-ലെ ഭരണഘടന അനുസരിച്ച്‌ ഭരിക്കപ്പെടേണ്ട പള്ളികളില്‍ സാക്കാ പ്രഥമന്‍ പാത്രിയര്‍ക്കീസ്‌ ബാവ കയറിയത്‌ ഓര്‍ത്തഡോക്‌സ്‌ സഭയെ വ്രണപ്പെടുത്തി. സാക്കാ പ്രഥമന്‍ പാത്രിയര്‍ക്കീസിനെ മുന്‍നിര്‍ത്തി കോടതി വിലക്കിയിട്ടുള്ള പള്ളികളില്‍ ശ്രേഷ്ഠ ബസേലിയോസ് തോമസ് പ്രഥമന്‍ കാതോലിക്കാ ബാവാ പ്രവേശിക്കാന്‍ നടത്തുന്ന ശ്രമങ്ങള്‍ക്കു് പൊലീസ് സംരക്ഷണം നല്‍കുകയാണ്. സന്ദര്‍ശനം സംബന്ധിച്ച്‌ സഭ, മന്ത്രിമാര്‍ക്ക്‌ നിവേദനം നല്‍കിയിരുന്നു. എന്നാല്‍, വാഗ്‌ദാനമല്ലാതെ നടപടിയൊന്നുമുണ്ടായില്ല. വിദേശ മേല്‍ക്കോയ്‌മ ഓര്‍ത്തഡോക്‌സ്‌ സഭ ആഗ്രഹിക്കുന്നില്ല.


കോട്ടയം പഴയ സെമിനാരിയില്‍ നടത്തിയ വാര്‍ത്താസമ്മേളനത്തില്‍ നിയുക്ത കാതോലിക്ക ഡോ. പൗലോസ്‌ മാര്‍ മിലിത്തിയോസ്‌,സഭാ സുന്നഹദോസ്‌ സെക്രട്ടറി മാത്യൂസ്‌ മാര്‍ സേവേറിയോസ്‌ മെത്രാപ്പോലീത്ത, കണ്ടനാട്‌  ഈസ്റ്റ്‌ ഭദ്രാസനാധിപന്‍ ഡോ. തോമസ്‌ മാര്‍ അത്താനാസ്യോസ്‌, ചെങ്ങന്നൂര്‍ ഭദ്രാസനാധിപന്‍ തോമസ്‌ മാര്‍ അത്താനാസ്യോസ്‌, സഭാ സെക്രട്ടറി ഡോ. ജോര്‍ജ്‌ ജോസഫ്‌ ഫാ. ജോണ്‍ ഏബ്രഹാം കോനാട്ട്‌, എം.ജി. ജോര്‍ജ്‌ മുത്തൂറ്റ്‌ , പ്രൊഫ. പി.സി. ഏലിയാസ്‌എന്നിവര്‍ പങ്കെടുത്തു.

 

പകര്‍പ്പനുമതി വിവരം

പകര്‍പ്പകാശ വിവരം പ്രത്യേകം പരാമര്‍‍ശിയ്ക്കാത്തവ പകര്‍പ്പവകാശനുമതിയുള്ളതായിരിയ്ക്കും. അവ എടുത്തു് പ്രസിദ്ധീകരിയ്ക്കുമ്പോള്‍ ഈ ഉറവിടത്തെ ഉദ്ധരിയ്ക്കേണ്ടതാണു്.