ഈ ലേഖയില്‍‍ തിരയുക

വിദേശ മെത്രാന്‍ വാഴ്ച സഭാ സമാധാനത്തിനായി വരച്ച സമാന്തരരേഖ: ഡി.ബാബു പോള്‍




ഡോ.ഡി.ബാബു പോളുമായുളള പ്രദക്ഷിണം അഭിമുഖം

ചോദ്യം- സഭയില്‍ വീണ്ടും പ്രശ്നങ്ങള്‍ ഉരുണ്ടു് കൂടുകയാണല്ലോ വിദേശമെത്രാന്റെ വാഴിയ്ക്കലും മറ്റും.



സൂക്ഷ്മമായി ചിന്തിച്ചാല്‍ അടുത്ത കാലത്തെ വിവാദമായ വിദേശ മെത്രാന്‍ വാഴ്ച സഭാ സമാധാനത്തിനായി വരച്ച ഒരു സമാന്തരരേഖയാണു് എന്നു് എനിയ്ക്കു് തോന്നുന്നു. അതിന്റെ പ്രത്യക്ഷ മാനവും പരോക്ഷ സൂചനയും മനസ്സിലാക്കിയ ചിലരും മനസ്സിലാക്കാത്ത പലരും ഒരുപോലെ അതിനെ വിമര്‍ശിയ്ക്കുന്നതില്‍ നിന്നും നമുക്കു് മനസ്സിലാകുന്നതു് അതല്ലേ?


ഞാന്‍ പൂര്‍ണ്ണമായും യാക്കോബായ സഭയിലെ അംഗമാണു്. പാത്രിയര്‍ക്കീസ് ബാവായുമായി ഇപ്പോഴും നേരിട്ടു് ബന്ധപ്പെടാറുണ്ടു്. അതുകൊണ്ടു് ഇത്തരം കാര്യങ്ങളില്‍ അഭിപ്രായ പ്രകടനത്തിനു് എനിയ്ക്കു് പരിമിതിയുണ്ടു്.



എങ്കിലും സഭ ഒന്നാണെന്ന കാഴ്ചപ്പാടാണു് എനിയ്ക്കുളളതു്. ഇപ്പോഴത്തെ കാറും കോളും നിറഞ്ഞ അന്തരീക്ഷം ഇന്നല്ലെങ്കില്‍ നാളെ മാറുക തന്നെ ചെയ്യും. പലപ്പോഴും വിവാദങ്ങള്‍ ഉണ്ടാകുന്നതു് അനാവശ്യമായും അനവസരത്തിലുമാണു്. ഓര്‍ത്തഡോക്സ് വിഭാഗത്തിന്റെ കാഴ്ചപ്പാടില്‍ ഈ മെത്രാന്‍ വാഴ്ച വിവാദമായതു് സത്യത്തില്‍ പലരെയും അദ്ഭുതപ്പെടുത്തുന്നുണ്ടു്.



പാത്രിയര്‍ക്കീസ് ബാവായുടെ മലങ്കരയിലെ അനധികൃതമായ ഇടപെടലുകളാണു് മലങ്കരസഭയില്‍ കുഴപ്പങ്ങള്‍ ഉണ്ടാക്കിയതെന്നു് പറയുന്ന ഓര്‍ത്തഡോക്സ് പക്ഷക്കാര്‍ അതേ രീതിയിലുളള ഒരു തിരിച്ചടി പാത്രിയര്‍ക്കീസ് ഭാഗത്തിനു് നല്‍കാന്‍ നടത്തിയ ആസൂത്രിതമായ ഒരു ശ്രമമെന്ന നിലയില്‍ വളരെ ഗൌരവത്തോടെയാണു് എല്ലാവരും ആദ്യം ആ സംഭവത്തെ വീക്ഷിച്ചതു്. ആ വഴി കാര്യങ്ങള്‍ നീങ്ങിയാല്‍ തല്‍ക്കാലം ചില പ്രശ്നങ്ങള്‍ ഉണ്ടായാലും ആത്യന്തികമായ ഒരു സമാധാനശ്രമത്തില്‍ അതു് എത്തിച്ചേരുമായിരുന്നു എന്നു് കരുതുന്നവര്‍ പാത്രിയര്‍ക്കീസ് പക്ഷത്തു് പോലും ഉണ്ടായിരുന്നു.



എന്നാല്‍ ഈ സംഭവം പൂര്‍വ്വവൈരാഗ്യം തീര്‍ക്കാനുളള അവസരമാക്കാന്‍ സ്വാധീനശക്തിയുളള ചിലര്‍ ശ്രമിച്ചെന്ന തോന്നലാണു് പിന്നീടു് തുടരെയുണ്ടായ വാര്‍ത്താ വിവാദങ്ങളില്‍ നിന്നു് തോന്നുന്നതു്.





ഇതാണു് മലങ്കരയുടെ ഇരുപക്ഷത്തെയും ശാപം ധിരമായ നടപടികള്‍ക്കു് തുനിയുന്നവര്‍ക്കു് പിന്‍തുണ നല്‍കാതെ അവര്‍ക്കെതിരെ ഒളിയമ്പു് എയ്യുന്ന വികലമായ മനസ്ഥിതി മാറാതെ ഈ സഭ നന്നാവില്ല എന്നു് തോന്നിപ്പോവുന്നു.



വിദേശ മെത്രാന്‍ വാഴ്ച സമാധാനത്തിനു് വഴിതുറക്കുമായിരുന്നു എന്നു് പറയുന്നതില്‍ വലിയ വൈരുധ്യമില്ലേ. ?



വൈരുധ്യത്തില്‍ നിന്നാണു് വൈവിധ്യമുണ്ടാകുന്നതു്. വൈവിധ്യങ്ങളില്‍ നിന്നാണു് സമാനതകള്‍ ജനിയ്ക്കുന്നതു്.



അന്ത്യോഖ്യന്‍ സഭയില്‍ നിരവധി വംശീയ ഗ്രൂപ്പുകളും അഭിപ്രായവ്യത്യാസങ്ങളുമെല്ലാം എപ്പോഴും ഉണ്ടായിരുന്നു. അബ്ദേദ് മിശിഹായുടെ കാലത്തൊഴികെ അവയൊന്നും ചൂഷണം ചെയ്യാന്‍ മലങ്കര സഭയിലെ ഒരു വിഭാഗവും പരിശ്രമിച്ചിട്ടില്ല. യാക്കോബ് ത്യതീയന്‍ പാത്രിയര്‍ക്കിസ് ബാവാ കാലം ചെയ്തപ്പോള്‍ സുറിയാനിആകമാന സൂന്നഹദോസിനു് അന്നത്തെ കാതോലിക്കാ ബാവ ഒരു നോട്ടീസ് അയച്ചാല്‍ ഫലമുണ്ടാകുമായിരുന്നു. മറ്റൊരു പാത്രിയര്‍ക്കിസ് ഉണ്ടാകുവാനുളള സാധ്യതയും ഉണ്ടാകുമായിരുന്നു. അത്തരം സാധ്യതകള്‍ ചര്‍ച്ചകളിലേയ്ക്കും സമാധാനത്തിലേയ്ക്കും നയിക്കുമായിരുന്നു.



സമാനമായ ഒരു സാഹചര്യം ഉണ്ടാകുവാന്‍ ഇപ്പോഴും സാധ്യത ഇല്ലാതില്ല. മലങ്കരയിലെ ഭിന്നത തങ്ങള്‍ മുതലെടുക്കുന്നതുപോലെ തങ്ങളിലെ ഭിന്നത മലങ്കരക്കാരും മുതലെടുക്കുമെന്നൊരുതോന്നല്‍ അന്ത്യോഖ്യക്കാര്‍ക്കു് ഉണ്ടായിരുന്നു എങ്കില്‍ മലങ്കര പ്രശ്നങ്ങള്‍ എന്നേ പരിഹരിയ്ക്കപ്പെടുമായിരുന്നു.



ഇപ്പോഴത്തെ മെത്രാന്‍വാഴ്ച മലങ്കര സഭയിലെ സുന്നഹദോസ് അംഗങ്ങളുടെ പൂര്‍ണ്ണ സഹകരണത്തിലും യോജിപ്പിലും ആണു് നടന്നിരുന്നതെങ്കില്‍ തീര്‍ച്ചയായും അത് അന്ത്യോഖ്യന്‍ സഭയെ ചിന്തിപ്പിയ്ക്കുമായിരുന്നു. ആ ചിന്ത തീര്‍ച്ചയായും സഭാ യോജിപ്പില്‍ എത്തുമായിരുന്നു എന്നു് തന്നെയാണു് ഞാന്‍ ചിന്തിയ്ക്കുന്നതു്.



അന്ത്യോഖ്യന്‍ പാത്രിയര്‍ക്കീസുമായി വ്യക്തിബന്ധം പുലര്‍ത്തുന്ന താങ്കള്‍ ഇങ്ങനെ ചിന്തിക്കുന്നത് ശരിയാണോ ?



അങ്ങനെ ചെയ്യണം എന്നല്ല ഞാന്‍ പറഞ്ഞതു്. അങ്ങനെ ഒരു സാഹചര്യം ഉണ്ടായിരുന്നെങ്കില്‍ അതിന്റെ പരിണിതഫലങ്ങള്‍ എങ്ങനെയാകുമായിരുന്നു എന്നു് ചിന്തിച്ചു നോക്കി എന്നു മാത്രം.



ഇപ്പോഴത്തെ അന്ത്യോഖ്യന്‍ പാത്രിയര്‍ക്കീസ് എല്ലാ അര്‍ത്ഥത്തിലും സമാധാന കാംക്ഷിയാണു്. പക്ഷെ അദ്ദേഹത്തിനു് മേല്‍ സമ്മര്‍ദ്ദങ്ങള്‍ ഏറെയാണു്.



യാക്കോബായ പക്ഷത്തുളള മെത്രാന്മാരും സമാധാനത്തെ സ്വാഗതം ചെയ്യുന്നവരാണു്. പക്ഷെ സ്വന്തം ബോദ്ധ്യത്തിനൊത്തു് പ്രവര്‍ത്തിയ്ക്കുവാന്‍ പലപ്പോഴും അവര്‍ക്കു് സാധിയ്ക്കാറില്ല. ഓര്‍ത്തഡോക്സ് പക്ഷത്തിനാണു് സഭയുടെ ഭാവി നിര്‍ണ്ണയിയ്ക്കാനാവുന്ന തീരുമാനങ്ങള്‍ കൈക്കൊളളാനാവുക എന്നാണ് ഞാന്‍ സൂചിപ്പിച്ചതു്. അതു് അപ്രകാരം ആയിരിയ്ക്കണം എന്നു് സൂചിപ്പിയ്ക്കാന്‍ ഞാന്‍ ആളല്ല.



സഭാ കാര്യങ്ങളില്‍ കോട്ടയം ഇടവകയുടെ ഈവാനിയോസ് തിരുമേനിയുടെ സമീപനങ്ങള്‍ ഓര്‍ത്തഡോക്സ് പക്ഷം കൂടുതലായി ഉള്‍ക്കൊള്ളേണ്ടതുണ്ടു്. ദൈവികസ്പര്‍ശം നേരിട്ടു് അനുഭവിച്ചിട്ടുളള തിരുമേനിയുടെ വാക്കുകളും പ്രവൃത്തികളും പ്രവാചക ദൌത്യമാണു് നിര്‍വ്വഹിക്കുന്നതു് എന്നാണു് എനിയ്ക്കു് തോന്നിയിട്ടുളളതു്.



*******

ചിത്രങ്ങള്‍‍



1) സ്വയംഭരണാവകാശമുള്ള സുറിയാനി ഓര്‍ത്തഡോക്സ് യൂറോപ്യന്‍ ആര്‍ച്ച് ഡയോസിസിന്റെ മെത്രാപ്പോലീത്തയായി വാഴിയ്ക്കപ്പെട്ട മോശ ഗോര്‍ഗുന്‍ മാര്‍ സേവേറിയോസ് പൗരസ്ത്യ കാതോലിക്കോസ് പരിശുദ്ധ ബസേലിയോസ്‌ മാര്‍ത്തോമാ ദിതിമോസ് പ്രഥമന്‍ ബാവയോടും കണ്ടനാടു് -കിഴക്കിന്റെ ഡോ.തോമസ് മാര്‍ അത്താനാസിയോസ് മെത്രാപ്പോലീത്തയോടുമൊപ്പം. [ചിത്രത്തില്‍ ക്ലിക്കിയാല്‍ കൂടിയ പ്രമേയത്തിലുള്ള രൂപം പുതിയ ജാലകത്തില്‍ കാണാം. ](പൊതുഉപയോഗത്തിനു് പകര്‍‍‍പ്പനുമതിയുള്ള ഛായ)

2) ഡോ. ഡി ബാബു പോള്‍‍ (ഛായാ അവലംബം: പ്രദക്ഷിണം)


*****

പശ്ചാത്തലകണ്ണികള്‍







മാര്‍ മക്കാറിയോസിസിന്റെ കബറടക്കം കഴിഞ്ഞു


നിറകണ്ണുകളോടെ വിട
കോട്ടയം: മലങ്കര ഒാര്‍ത്തഡോക്സ് സഭയുടെ യുകെ, യൂറോപ്പ്, കാനഡ ഭദ്രാസനാ ധിപനായിരുന്ന കാലംചെയ്ത ഡോ. തോമസ് മാര്‍ മക്കാറിയോസിന്റെ കബറടക്കം കഴിഞ്ഞു. ദേവലോകം അരമനച്ചാപ്പലിന് തെക്കുവശത്ത് തയ്യാറാക്കിയ കബറിടത്തില്‍ മാര്‍ച്ച് മൂന്നാം തീയതി തിങ്കളാഴ്ച ഉച്ചയ്ക്ക് പന്ത്രണ്ടര മണിയോടെയായിരുന്നു ഡോ. തോമസ് മാര്‍ മക്കാറിയോസ് മെത്രാപ്പോലീത്തയുടെ കബറടക്കം.

മാര്‍ച്ച് രണ്ടാം തീയതി ഞായറാഴ്ച രാത്രി വൈകി കോട്ടയം പഴയ സെമിനാരിയില്‍ എത്തിച്ചു് പൊതുദര്‍ശനത്തിനു് വച്ച ഭൌതിക ശരീരം ശുശ്രൂഷകള്‍ക്കുശേഷം തിങ്കളാഴ്ച രാവിലെ എട്ടരയ്ക്കു സഭാ ആസ്ഥാനമായ ദേവലോകം അരമന ചാപ്പലിലേയ്ക്കു് നിരവധി വാഹനങ്ങളുടെയും നൂറുകണക്കിനു് വിശ്വാസികളുടെയും അകമ്പടിയോടെ വിലാപയാത്രയായി കൊണ്ടുപോയി.കബറടക്ക ശുശ്രൂഷയുടെ ഭാഗമായ 'നഗരി കാണിക്കല്‍ കൂടിയായിരുന്ന വിലാപയാത്ര ചുങ്കം, കോട്ടയം ടൗണ്‍, ശാസ്ത്രി റോഡ്, കളക്ടറേറ്റ്, കഞ്ഞിക്കുഴി വഴി പത്തര കഴിഞ്ഞപ്പോള്‍ ദേവലോകം അരമനയിലെത്തി.

തുടര്‍ന്നു് അന്ത്യോപചാരം അര്‍പ്പിയ്ക്കാന്‍ ആളുകള്‍ക്കു് അവസരം നല്‍കി.അനുശോചനയോഗവും നടന്നു. 11.15നു് കബറടക്ക ശുശ്രൂഷയുടെ അവസാനഭാഗം തുടങ്ങി.പൗരസ്ത്യ കാതോലിക്കോസ് പരിശുദ്ധ ബസേലിയോസ് മാര്‍ത്തോമാ ദിതിമോസ് പ്രഥമന്‍ ബാവയുടെ പ്രധാന കാര്‍മികത്വത്തില്‍ നടന്ന ശുശ്രൂഷയില്‍ മെത്രാപ്പൊലീത്തമാരും വൈദികരും സഹകാര്‍മികരായിരുന്നു.
മെത്രാപ്പോലീത്തയുടെ ഭൌതികശരീരം മദ്ബഹായ്ക്കുള്ളിലേയ്ക്ക് കൊണ്ടുപോയി, താന്‍ ശുശ്രൂഷിച്ച ദേവാലയത്തോടും ബലിയര്‍പ്പിച്ച മദ്ബഹയോടും പരിപാലിച്ച അജഗണങ്ങളോടും വിടചോദിക്കുന്നതിനായി നാലു് ദിക്കുകളിലേയ്ക്കും എടുത്തുയര്‍ത്തിയശേഷം കബറിടത്തില്‍ എത്തിച്ചു. ഭൌതിക ശരീരത്തില്‍ കാതോലിക്കാ ബാവാ വിശുദ്ധ തൈലമൊഴിച്ചു് കുന്തിരിയ്ക്കവും മണ്ണും വച്ചതോടെ കബറടക്ക ശുശ്രൂഷകള്‍ പൂര്‍ത്തിയായി. തുടര്‍ന്നു് ഭൌതികശരീരം കബറിനുള്ളില്‍ അടക്കം ചെയ്തു.

സംസ്ഥാനസര്‍ക്കാരിനു് വേണ്ടി മന്ത്രിമോന്‍സ് ജോസഫ് പുഷ്പചക്രം സമര്‍പ്പിച്ചു. പ്രതിപക്ഷനേതാവു് ഉമ്മന്‍ചാണ്ടി, മുന്‍ മന്ത്രിമാരായ കെ.എം. മാണി, തിരുവഞ്ചൂര്‍ രാധാകൃഷ്ണന്‍, ടി.യു. കുരുവിള, ലോകസഭാംഗം പി.സി. തോമസ്, എം എല്‍ ‍എമാരായ വി.എന്‍. വാസവന്‍, ജോസഫ് എം. പുതുശ്ശേരി, എം. മുരളി, സി.എസ്.ഐ. മധ്യകേരള ബിഷപ്പ് തോമസ് സാമുവേല്‍, സീറോ മലബാര്‍ കത്തോലിക്കാ സഭയുടെ ആര്‍ച്ച് ബിഷപ്പ് മാര്‍ ജോസഫ് പവ്വത്തില്‍, സീറോ മലങ്കര റീത്തു് കത്തോലിക്കാ സഭാ മേജര്‍ ആര്‍ച്ച് ബിഷപ്പ് മോര്‍ ബസേലിയോസ് ക്ലീമീസ്, സീറോ മലബാര്‍ ക്നാനായ കത്തോലിക്കാസഭയുടെ കോട്ടയം അതിരൂപതാ മെത്രാന്‍ മാര്‍ ‍മാത്യു മൂലക്കാട്ട്, യാക്കോബായ സുറിയാനി ക്രിസ്ത്യാനി സഭയുടെ തോമസ് മാര്‍ തീമോത്തിയോസ് , മലബാര്‍ മാര്‍‍ത്തോമാ സുറിയാനി സഭയുടെ സഖറിയാസ് മാര്‍ തേയോഫിലോസ് സഫ്രഗന്‍ മെത്രാപ്പോലീത്ത, കേരള കൌണ്‍സില്‍ ഓഫ് ചര്‍ച്ചസ് പ്രസിഡന്റ് ഏബ്രഹാം മാര്‍ പൌലോസ്, സീറോ മലങ്കര റീത്തു് കത്തോലിക്കാ സഭയുടെ ഏബ്രഹാം മാര്‍ യൂലിയോസ്, തോമസ് മാര്‍ കൂറിലോസ് എന്നിവരും ഓര്‍ത്തഡോക്സ് സഭയുടെ ഭദ്രാസന മെത്രാപ്പോലീത്താമാരും ജില്ലാ കളക്ടര്‍ ഷര്‍മിള മേരി ജോസഫ്, ജില്ലാ പോലീസ് സൂപ്രണ്ട് മാത്യു പോളി കാര്‍പ്പ്, കോട്ടയം നഗരസഭാധ്യക്ഷ റീബാ വര്‍ക്കി, ഇന്ദിരാ കോണ്‍ഗ്രസ് നേതാവു് കൊടിക്കുന്നില്‍ സുരേഷ്, ജില്ലാ പഞ്ചായത്തു് പ്രസിഡന്റ് തോമസ് കുന്നപ്പള്ളി, സിപിഎം ജില്ലാ സെക്രട്ടറി കെ.ജെ. തോമസ് എന്നിവരും ആദരാഞ്ജലികള്‍ അര്‍പ്പിച്ചു.

ലണ്ടനില്‍ നിന്നു് വിമാന മാര്‍ഗം മാര്‍ച്ച് രണ്ടാം തീയതി ഞായറാഴ്ച രാവിലെ നെടുമ്പാശേരിയിലെത്തിച്ച മാര്‍ മക്കാറിയോസിസിന്റെ ഭൗതിക ശരീരം പൗലോസ് മാര്‍ മിലിത്തിയോസ്, മാത്യൂസ് മാര്‍ സേവേറിയോസ്, പൌലോസ് മാര്‍ പക്കോമിയോസ്, സഭാ സെക്രട്ടറി ഡോ. ജോര്‍ജ് ജോസഫ്, സഭാ ട്രസ്റ്റി എം.ജി. ജോര്‍ജ് മുത്തൂറ്റ് എന്നിവര്‍ ചേര്‍ന്നാണു് ഏറ്റുവാങ്ങിയതു്.കേന്ദ്ര മന്ത്രി വയലാര്‍ രവി, സംസ്ഥാന മന്ത്രിമാരായ കോടിയേരി ബാലകൃഷ്ണന്‍, മോന്‍സ് ജോസഫ്, എംഎല്‍എമാരായ ജോസഫ് എം. പുതുശേരി, എം. മുരളി എന്നിവര്‍ വിമാനത്താവളത്തിലെത്തി ആദരാഞ്ജലിയര്‍പ്പിച്ചു.

മുംബൈ ഭദ്രാസനാധിപന്‍ ഡോ. ഗീവര്‍ഗീസ് മാര്‍ കൂറിലോസ് മെത്രാപ്പോലീത്ത, ലണ്ടന്‍ ഇടവക വികാരി ഫാ. ഏബ്രഹാം തോമസ്, മാഞ്ചസ്റ്റര്‍ - ലിവര്‍പൂള്‍ ഇടവക വികാരി ഫാ. ഹാപ്പി ജേക്കബ്, ബ്രിസ്റ്റോള്‍ വികാരി ഫാ. വര്‍ഗീസ് മാത്യു എന്നിവര്‍ ലണ്ടനില്‍നിന്നു് ഭൌതിക ശരീരത്തെ അനുഗമിച്ചിരുന്നു. അലങ്കരിച്ച വാഹനത്തില്‍ നൂറു് കണക്കിനു് വാഹനങ്ങളുടെ അകമ്പടിയോടെ ശീതീകരിച്ച പ്രത്യേക അറയിലാണു് ഭൌതിക ശരീരം ജന്‍മസ്ഥലമായ അയിരൂരിലേയ്ക്കു് കൊണ്ടു് പോയതു്.

ആലപ്പുഴ, ചങ്ങനാശേരി വഴി വിലാപയാത്ര നാലരയോടെ പത്തനംതിട്ട ജില്ലാ അതിര്‍ത്തിയായ ഇടിഞ്ഞില്ലത്തു് എത്തിയപ്പോള്‍ നിരണം ഭദ്രാസന മെത്രാപ്പൊലീത്ത ഡോ. യൂഹാനോന്‍ മാര്‍ ക്രിസോസ്റ്റമോസിന്റെ നേതൃത്വത്തില്‍ ഭൌതിക ശരീരം ഏറ്റുവാങ്ങി. തുടര്‍ന്നു് തിരുവല്ല, ഇരവിപേരൂര്‍, വെണ്ണിക്കുളം, തടിയൂര്‍, തീയാടിക്കല്‍ വഴി 7.30നു് മാര്‍ മക്കാറിയോസിസിന്റെ മാതൃ ഇടവകയായ അയിരൂര്‍ സെന്റ് മേരീസ് ഓര്‍ത്തഡോക്സ് പള്ളിയില്‍ എത്തിച്ചു .നിയുക്ത കാതോലിക്കാ പൌലോസ് മാര്‍ മിലിത്തിയോസ്, മെത്രാപ്പൊലീത്തമാര്‍, വൈദികര്‍ എന്നിവരുടെ നേതൃത്വത്തില്‍ കബറടക്ക ശുശ്രൂഷയുടെ രണ്ടും മൂന്നും നാലും ഭാഗങ്ങള്‍ അയിരൂര്‍ സെന്റ് മേരീസ് ഓര്‍ത്തഡോക്സ് പള്ളിയില്‍ നടത്തി.

മെത്രാപ്പൊലീത്തമാരും രാഷ്ട്രീയ, സാമുദായിക നേതാക്കളും മാര്‍ മക്കാറിയോസിന്റെ തറവാടായ കുറ്റിക്കണ്ടത്തില്‍ കുടുംബത്തിലെ അംഗങ്ങളും ആയിരക്കണക്കിനു വിശ്വാസികളും അവിടെനിന്നുള്ള വിലാപയാത്രയെ അനുഗമിച്ചു. വഴിമദ്ധ്യേ ആയിരക്കണക്കിനാളുകള്‍ വിവിധസ്ഥലങ്ങളില്‍ മാര്‍ മക്കാറിയോസിനു് അന്തിമോപചാരം അര്‍പ്പിക്കുകയും ചെയ്തു. രാത്രി വൈകിയാണു് കോട്ടയം പഴയ സെമിനാരിയില്‍ എത്തിച്ചതു് .

ഓര്‍ത്തഡോക്സ് സഭാ സുന്നഹദോസ്‌ സമാപിച്ചു


കോട്ടയം: സഭാ വൈദിക ട്രസ്‌റ്റിയുടെ മുഖ്യ ചുമതലയില്‍ സുശക്തമായ പബ്ലിക്‌ റിലേഷന്‍ സംവിധാനം ക്രമീകരിയ്ക്കാന്‍ ഇന്ത്യന്‍ ഓര്‍ത്തഡോക്‌സ് സഭാ എപ്പിസ്കോപ്പല്‍ സുന്നഹദോസ്‌ തീരുമാനിച്ചു.

പൗരസ്ത്യ കാതോലിക്കോസ് പരിശുദ്ധ ബസേലിയോസ് മാര്‍ത്തോമാ ദിദിമോസ് പ്രഥമന്‍ ബാവയുടെ അദ്ധ്യക്ഷതയില്‍ 2008ഫെബ്രുവരി 18മുതല്‍ 23 വരെ കോട്ടയംപഴയ സെമിനാരിയില്‍ ‍സമ്മേളിച്ച സുന്നഹദോസില്‍ ഇങ്ഗ്ലണ്ടിലെ ന്യൂകാസിലില്‍ ചികില്‍സയിലായിരുന്ന യുകെ, യൂറോപ്പ്, കാനഡ ഭദ്രാസനാധിപന്‍ ഡോ. തോമസ് മാര്‍ മക്കാറിയോസ് ഒഴിച്ചുള്ള എല്ലാ മെത്രാപ്പോലീത്താമാരും പങ്കെടുത്തു. യുകെ, യൂറോപ്പ്, കാനഡ ഭദ്രാസനഭരണക്രമീകരണങ്ങള്‍ക്കു് ആവശ്യമായ നടപടികള്‍ പൗരസ്ത്യ കാതോലിക്കോസ് കൈക്കൊണ്ടു.

സഭാവക സംഘടനകളുടെയും സ്‌ഥാപനങ്ങളുടെയും പ്രസ്‌ഥാനങ്ങളുടെയും 2008-2009 ലെ ബജറ്റ്‌ അംഗീകരിച്ചു. വിദ്യാര്‍ഥിപ്രസ്‌ഥാന ശതാബ്‌ദി ആഘോഷത്തിന്റെ ഭാഗമായുള്ള പദ്ധതികള്‍ക്കും അനുമതി നല്‍കി.

ഈ വര്‍ഷം സെപ്‌റ്റംബറില്‍ അര്‍മീനിയയിലെ എച്ച്‌മിയാഡ്‌സിനില്‍ നടക്കുന്ന വിശുദ്ധ മൂറോന്‍ കൂദാശയിലും എത്യോപ്യയില്‍ നടക്കുന്ന ഓറിയന്റല്‍ സഭകളുടെ സമ്മേളനത്തിലും പങ്കെടുക്കാന്‍ പ്രതിനിധികളെ അയയ്ക്കും. അര്‍മീനിയന്‍ സഭകളുടെ പരിശുദ്ധ കരേക്കിന്‍ രണ്ടാമന്‍ കാതോലിക്കോസ് ഈ വര്‍ഷത്തെ പരുമലപ്പെരുന്നാളിനോടനുബന്ധിച്ചും ലബനോനിലെ പരിശുദ്ധ അരാം പ്രഥമന്‍ കാതോലിക്കോസ് സെപ്‌റ്റംബറിലെ മലങ്കര അസോസിയേഷന്‍ യോഗത്തോടനുബന്ധിച്ചും മലങ്കരസഭ സന്ദര്‍ശിക്കുന്നതിനു് ക്രമീകരണം നടത്തും.

പരുമല സെന്റ്‌ ഗ്രീഗോറിയോസ്‌ മിഷന്‍ ആശുപത്രിയോടനുബന്ധിച്ചു് കാന്‍സര്‍ കെയര്‍ സെന്റര്‍ ‍ആരംഭിക്കും. പഴയ സെമിനാരിയില്‍ ചരിത്ര മ്യൂസിയവും ആരംഭിക്കും.

പരിശുദ്ധ വട്ടശേരില്‍ തിരുമേനിയുടെ ചരമ പ്ലാറ്റിനംജൂബിലിവര്‍ഷമായി 2008-2009 വിവിധ പരിപാടികളോടെ ആചരിക്കാനും സുന്നഹദോസില്‍ തീരുമാനമായി. പുലിക്കോട്ടില്‍ ജോസഫ്‌ മാര്‍ ദീവന്നാസിയോസ്‌ രണ്ടാമന്‍ മെത്രാപ്പോലീത്തായുടെ ചരമ ശതാബ്‌ദിയോടനുബന്ധിച്ചു് വിപുലമായ പദ്ധതികള്‍ ആസൂത്രണം ചെയ്യും. ഇതിനായി പ്രത്യേകസമിതിയെ ചുമതലപ്പെടുത്തി.
‍
അടുത്ത സമ്മേളനം ഓഗസ്‌റ്റ് 19 മുതല്‍ 23 വരെ പഴയ സെമിനാരിയില്‍ ചേരും.

മാര്‍ മക്കാറിയോസിന്റെ കബറടക്ക ശുശ്രൂഷയുടെ ഒന്നാംഘട്ടം


ലണ്ടന്‍: മലങ്കര ഓര്‍ത്തഡോക്സ് സഭയുടെ യു.കെ, യൂറോപ്പ്, ക്യാനഡ ഭദ്രാസനാധിപനായിരുന്ന കാലംചെയ്ത ഡോ. തോമസ് മാര്‍ മക്കാറിയോസിന്റെ കബറടക്ക ശുശ്രൂഷയുടെ ഒന്നാംഘട്ടം ലണ്ടന്‍ സെന്റ് ഗ്രിഗോറിയോസ് പള്ളിയില്‍ ഫെബ്രുവരി 29 ഗ്രീനിച്ച് മെറീഡിയന്‍ സമയം 18.00 മണിയ്ക്കു് ഗീവര്‍ഗീസ് മാര്‍ കൂറിലോസ് മെത്രാപ്പോലീത്തയുടെ മുഖ്യ കാര്‍മികത്വത്തില്‍ ‍നടത്തി. മറ്റു് ഓറിയന്റല്‍ ഓര്‍ത്തഡോക്സ് സഭകളിലെ മെത്രാപ്പോലീത്തമാരും വൈദീകരും ഭദ്രാസനത്തിലെ വിവിധ പള്ളികളില്‍നിന്നെത്തിയ വൈദികരും കാര്‍മികരായിരുന്നു.

യുകെ — അയര്‍ലണ്ട് ഓറിയന്റല്‍ ഓര്‍ത്തഡോക്സ് സഭാ കൌണ്‍സിലിന്റെ പ്രസിഡന്റായ കോപ്ടിക് ഓര്‍ത്തഡോക്സ് സഭയുടെ ആഞ്ചലോസ് മെത്രാപ്പോലീത്ത ആര്‍മീനിയന്‍ ഓര്‍ത്തഡോക്സ് സഭയുടെ നാഥാന്‍ മെത്രാപ്പോലീത്ത എത്തിയോപ്പീയന്‍ ഓര്‍ത്തഡോക്സ് സഭയുടെ അന്തോനിയൂസ് മെത്രാപ്പോലീത്ത ബ്രിട്ടീഷ് ഓര്‍ത്തഡോക്സ് സഭയുടെ അബ്ബാ സെറാഫിം മെത്രാപ്പോലീത്ത എന്നീ ഓറിയന്റല്‍ ഓര്‍ത്തഡോക്സ് സഭാ നേതാക്കള്‍ കാന്റര്‍ബറി മെത്രാപ്പോലീത്തയുടെ പ്രതിനിധി ക്രിസ്റ്റഫര്‍ ചെസ്സുന്‍ മെത്രാന്‍ തുടങ്ങിയപ്രമുഖര്‍ കബറടക്ക ശുശ്രൂഷയുടെ ഒന്നാംഘട്ടത്തില്‍ പങ്കെടുത്തു . കാന്റര്‍ബറി മെത്രാപ്പോലീത്ത മഹാഭിവന്ദ്യ റോവാന്‍ വില്യംസിന്റെ അനുശോചനസന്ദേശം പ്രതിനിധി ക്രിസ്റ്റഫര്‍ ചെസ്സുന്‍ മെത്രാന്‍ വായിച്ചു.


ഭൌതികശരീരം പള്ളിയില്‍ പൊതുദര്‍ശനത്തിനുവച്ചപ്പോള്‍ മലയാളി സമൂഹവും വിവിധ സഭാവിഭാഗങ്ങളില്‍പ്പെട്ട വൈദികരും ഒട്ടേറെ സഭാംഗങ്ങളുംആദരാഞ്ജലിയര്‍പ്പിച്ചു. വികാരി ഫാ.ഏബ്രഹാം തോമസും സഭാ മാനേജിങ് കമ്മിറ്റിയംഗങ്ങളും ക്രമീകരണങ്ങള്‍ക്കു നേതൃത്വം നല്‍കി.


ഭൗതികശരീരം മാര്‍ച്ച് ഒന്നാംതീയതി ലണ്ടനില്‍നിന്ന് എമിരേറ്റ്സ് വിമാനത്തില്‍ മുംബൈ വഴി നെടുമ്പാശേരിയിലേയ്ക്കു് യാത്രയാക്കി. രണ്ടാം തീയതി ഒന്‍പതേകാല്‍ മണിയോടെ നെടുമ്പാശേരിയിലെത്തിച്ച ഭൗതികശരീരം അവിടെനിന്നു് മാര്‍ മക്കാറിയോസിന്റെ സ്വദേശമായ അയിരൂരിലേക്കു കൊണ്ടുപോയി രാത്രി വൈകി കോട്ടയം പഴയ സെമിനാരിയിലെത്തിച്ചു.

മാര്‍ച്ച് മൂന്നാംതീയതി തിങ്കളാഴ്ച രാവിലെ ഏഴിനു് ദേവലോകം അരമന ചാപ്പലിലേയ്ക്കു നഗരികാണിയ്ക്കല്‍. ഒന്‍പതു മണിക്കു കബറടക്ക ശുശ്രൂഷയുടെ തുടക്കം.

അനുഗൃഹീതനായ മെത്രാപ്പൊലീത്ത


ദേവലോകം(കോട്ടയം): പകലോമറ്റം തറവാടിന്റെ ശാഖയായ അയിരൂര്‍ താഴമണ്‍ കുറ്റിക്കണ്ടത്തില്‍ കുടുംബത്തില്‍ ചാക്കോയുടെയും മറിയാമ്മയുടെയും പുത്രനായി 1926 മേയ് 26നു ജനിച്ച കെ.സി. തോമസ് (തങ്കച്ചന്‍) ആണു് കാലംചെയ്ത
ഡോ.തോമസ് മാര്‍ മക്കാറിയോസ് മെത്രാപ്പൊലീത്ത.

ഇന്റര്‍മീഡിയേറ്റ് പാസായശേഷം കുമ്പളന്താനം സ്കൂളില്‍ അധ്യാപകനായി. ദൈവവിളി സ്വീകരിച്ചു് പെരുനാടു് ബഥനി ആശ്രമാധിപന്‍ മാര്‍ തേവോദോസിയോസിനെ തേടിച്ചെന്ന അദ്ദേഹം 1947-ല്‍ സ്കൂളില്‍നിന്നു് പിരിഞ്ഞു് ബാഹ്യകേരളത്തിനു് വേണ്ടി മെത്രാപ്പൊലീത്തയുടെ ഉപദേശപ്രകാരം പഴയ സെമിനാരിയില്‍ ചേര്‍ന്നു് വൈദിക പഠനം ആരംഭിച്ചു. കെ.സി. തോമസിനെ മറ്റു് 11 പേര്‍ക്കൊപ്പം 1951 ഫെബ്രുവരി 23നു് പരിശുദ്ധ ഗീവര്‍ഗീസ് ദ്വിതീയന്‍ കാതോലിക്കാ ബാവാ ശെമ്മാശനായി ഉയര്‍ത്തി. പരിശുദ്ധ ബസേലിയോസ് ഗീവര്‍ഗീസ് ദ്വിതീയന്‍ കാതോലിക്കാ ബാവാ തന്നെ 1952 സെപ്റ്റംബറില്‍ മദ്രാസ് കത്തീഡ്രലില്‍ വച്ചു് വൈദികപട്ടം നല്‍കി.

പഞ്ചാബ് യൂണിവേഴ്സിറ്റിയില്‍നിന്നു ചരിത്രത്തിലും പൊളിറ്റിക്സിലും ബിരുദം നേടിയ ഫാ. കെ.സി. തോമസ് തുടര്‍ന്നു് അമേരിക്കയിലെ വിസ്കോണ്‍സിന്‍ യൂണിവേഴ്സിറ്റിയില്‍ നിന്നു് ബി ഡിയും അലക്സാന്‍ഡ്രിയ എപ്പിസ്കോപ്പല്‍ സെമിനാരിയില്‍നിന്നു് എസ് ടി എമ്മും റിച്ച്മോണ്‍ഡ് യൂണിയന്‍ തിയളോജിക്കല്‍ സെമിനാരിയില്‍നിന്നു് ഡോക്ടറേറ്റും കരസ്ഥമാക്കി.

1975-ല്‍ നിരണത്തു് പരിശുദ്ധ ഔഗേന്‍ കാതോലിക്കാ ബാവായില്‍നിന്നു് തോമസ് മാര്‍ മക്കാറിയോസ് എന്ന പേരില്‍ മെത്രാന്‍ പട്ടം സ്വീകരിച്ചു. മക്കാറിയോസ് എന്ന വാക്കിന്റെ അര്‍ഥം അനുഗൃഹീതന്‍‍ എന്നാണ്. മലങ്കര സഭയില്‍ ആ നാമത്തില്‍ അഭിഷിക്തനായ ആദ്യ മഹാചാര്യനാണു് അദ്ദേഹം. സുദീര്‍ഘമായ എപ്പിസ്കോപ്പല്‍ ഭരണകാലത്തു് മാര്‍ മക്കാറിയോസ്
ബോംബെ, അമേരിക്ക എന്നീ ഭദ്രാസനങ്ങളുടെ അധിപനായി പ്രവര്‍ത്തിച്ചു. 1993 ഓഗസ്റ്റിലാണു് യു.കെ, യൂറോപ്പ്, കാനഡ ഭദ്രാസനാധിപനായതു്.

റമ്പാന്‍ ലാസറസ് കോര്‍ എപ്പിസ്കോപ്പ (കാനഡ), കെ.സി. മാത്യു കോര്‍ എപ്പിസ്കോപ്പ, സിസ്റ്റര്‍ മറിയം (ബഥനി കോണ്‍വന്റ്), കെ.സി. അന്നമ്മ (റാന്നി) എന്നിവര്‍ മാര്‍ മക്കാറിയോസിന്റെ സഹോദരങ്ങളാണു്.

ഡോ. തോമസ് മാര്‍ മക്കാറിയോസ് മെത്രാപ്പോലീത്ത കാലം ചെയ്തു
H.E. Dr. Thomas Mar Makarios Metropolitan Passes Into Eternal Rest
------
വിഷയ സൂചികയിലേയ്ക്കു്

പുറം താളിലേയ്ക്ക്

സത്യത്തിനു് സാക്ഷികളാകുക_ഡോ. തോമസ് മാര്‍ അത്താനാസിയോസ്


കൂത്താട്ടുകുളം : സത്യം കണ്ടെത്തി ജീവിതവ്രതമാക്കുവാനും സ്വന്തം ജീവിതത്തില്‍ അതു് പ്രതിഫലിപ്പിച്ചു് സത്യത്തിനു് സാക്ഷികളാകുവാനും കണ്ടനാട് ഈസ്റ്റ് മെത്രാപ്പോലീത്ത ഡോ. തോമസ് മാര്‍ അത്താനാസിയോസ് ജനങ്ങളെ ആഹ്വാനം ചെയ്തു. കൂത്താട്ടുകുളം ബൈബിള്‍ ക്ലാസ്സിന്റെ ആഭിമുഖ്യത്തില്‍ കെ. റ്റി. ജേക്കബ് മെമ്മോറിയല്‍ ടൌണ്‍ ഹാളില്‍ ഫെബ്രുവരി 24 നു് ആരംഭിച്ച 58-മതു് ഓര്‍ത്തഡോക്സ് സിറിയന്‍ ക്രിസ്ത്യന്‍ കണ്‍വന്‍ഷന്‍ ഉദ്ഘാടനം ചെയ്തു് സംസാരിയ്ക്കുകയായിരുന്നു അദ്ദേഹം.

വ്യത്യസ്ത സാമൂഹിക - വൈജ്ഞാനിക-രാഷ്ട്രീയ സാഹചര്യങ്ങളില്‍ ആലേഖനം ചെയ്യപ്പെട്ട വേദപുസ്തക സൂക്തങ്ങളെ വസ്തുനിഷ്ഠമായ പഠനങ്ങളുടെ അടിസ്ഥാനത്തില്‍ കാലിക പ്രസക്തിയോടെ വ്യാഖ്യാനിക്കുകയും അനുവര്‍ത്തിക്കുകയും ചെയ്യേണ്ടതുണ്ടെന്നും അദ്ദേഹം വ്യക്തമാക്കി. തുടര്‍ന്നു് വചന ശുശ്രൂഷ നിര്‍വ്വഹിച്ച ജോയി ജോര്‍ജ് സത്യവിശ്വാസത്തിലേക്കും സ്നേഹത്തിലേക്കും വിനയപൂര്‍വ്വം മടങ്ങിവന്നു് പ്രത്യാശയോടെ ധന്യജീവിതം നയിക്കുക എന്ന സന്ദേശമാണു് നല്‍കിയതു്.

ഫെബ്രുവരി 25, 26, 27 തീയതികളിലെ യോഗങ്ങളില്‍ യഥാക്രമം ഫാ. മോഹന്‍ ജോസഫ്, ഫാ. ബാബു വര്‍ഗീസ്, ഫാ. ഡോ. ഒ. തോമസ് എന്നിവര്‍ പ്രസംഗിച്ചു. ഫാ. മാത്യൂസ് ചെമ്മനാപ്പാടം, ഫാ. ജോണ്‍ വി. ജോണ്‍, ജോസഫ് ജോര്‍ജ്ജ് കളത്തില്‍ എന്നിവരായിരുന്നു മുഖ്യസംഘാടകര്‍‍.

ഡോ. തോമസ് മാര്‍ മക്കാറിയോസ് മെത്രാപ്പോലീത്ത കാലം ചെയ്തു


ന്യൂകാസില്‍ (ലണ്ടന്‍): മലങ്കര ഓര്‍ത്തഡോക്സ് സഭയുടെ യു.കെ, കാനഡ ഭദ്രാസനാധിപന്‍ ഡോ. തോമസ് മാര്‍ മക്കാറിയോസ് കാലം ചെയ്തു. കാറപകടത്തില്‍ പരുക്കേറ്റ് ഇവിടെ ജനറല്‍ ആശുപത്രിയില്‍ ചികില്‍സയിലായിരുന്ന അദ്ദേഹത്തിന്റെ അന്ത്യം ഫെബ്രുവരി 23-നു് വൈകുന്നേരം 4:12 നു് (ഇന്ത്യന്‍ സമയം) ആയിരുന്നു.

നെഞ്ചിലും വയറ്റിലും ഗുരുതരമായി പരുക്കേറ്റ മെത്രാപ്പോലീത്തായുടെ ജീവന്‍ വെന്റിലേറ്ററിന്റെ സഹായത്തോടെയായിരുന്നു നിലനിര്‍ത്തിയിരുന്നതു്. ഫെബ്രുവരി 23-നു് ഉച്ചയ്ക്കു് വെന്റിലേറ്റര്‍ സംവിധാനം വേര്‍പെടുത്തി. ജീവന്‍ നിലനിര്‍ത്താന്‍ കഴിയില്ലെന്നു് വ്യക്‌തമായതിനെത്തുടര്‍ന്നു് അദ്ദേഹത്തെ ചികിത്സിച്ച ഡോക്ടര്‍മാര്‍ ദേവലോകം കാതോലിക്കാസന അരമനയുമായി ഫോണില്‍ ബന്ധപ്പെട്ടശേഷമാണു് വെന്റിലേറ്റര്‍ നീക്കം ചെയ്തതു്. അപകടശേഷം മെത്രാപ്പോലീത്ത അബോധാവസ്‌ഥയിലായിരുന്നു.

ആശുപത്രിയില്‍ സൂക്ഷിച്ചിരിയ്ക്കുന്ന ഭൌതികശരീരം കേരളത്തിലേയ്ക്കു് കൊണ്ടുപോയി സഭാ ആസ്ഥാനമായ കോട്ടയം ദേവലോകം അരമനയില്‍ മാര്‍ച്ച് നാലിനു് കബറടക്കും. ദേവലോകം അരമന ചാപ്പലിനു തെക്കുവശത്തു് പ്രത്യേകം തയാറാക്കുന്ന കബറിടത്തിലായിരിക്കും കബറടക്കമെന്നു സഭാ അധികൃതര്‍ കോട്ടയത്ത് അറിയിച്ചു. വടക്കുവശത്താണു ബാവാമാരുടെ അന്ത്യവിശ്രമസ്ഥലം.

മാര്‍ച്ച് മൂന്നിന് മൃതദേഹം നാട്ടിലെത്തിക്കുന്നതിനുള്ള ക്രമീകരണങ്ങളാണ് നടന്നു വരുന്നത്. മാര്‍ മക്കാറിയോസിന് അമേരിക്കന്‍ പൌരത്വം ഉള്ളതിനാല്‍ മൃതദേഹം നാട്ടിലെത്തിക്കാന്‍ ചില സാങ്കേതിക തടസങ്ങള്‍ ഉണ്ട്. ശനി, ഞായര്‍ ദിവസങ്ങളില്‍ ഇംഗ്ളണ്ടില്‍ അവധിയായതിനാല്‍ തിങ്കളാഴ്ചയെ ഇന്ത്യന്‍ എംബസിയില്‍ അതിനുവേണ്ട ക്രമീകരണങ്ങള്‍ നടത്താനാകൂ എന്ന് ഇന്ത്യന്‍ ഓര്‍ത്തഡോക്സ് സഭയുടെ വക്താക്കള്‍ അറിയിച്ചു. കേന്ദ്രമന്ത്രിമാരായ വയലാര്‍ രവിയും ഇ. അഹമ്മദും ലണ്ടനിലെ ഇന്ത്യന്‍ എംബസിയില്‍ വിളിച്ച് വേണ്ട നിര്‍ദേശങ്ങള്‍ നല്കുകയും ഇന്ത്യന്‍ ഓര്‍ത്തഡോക്സ് സഭയുടെ മേലധ്യക്ഷന്മാരെ അനുശോചനം അറിയിക്കുകയും ചെയ്തു.

പരിശുദ്ധ കാതോലിക്കാ ബാവായുടെ അധ്യക്ഷതയില്‍ വൈകുന്നേരം ദേവലോ കം അരമനയില്‍ ചേര്‍ന്ന അടി യന്തര സിനഡ് കബറടക്കം സംബന്ധിച്ച ക്രമീകരണങ്ങള്‍ ചര്‍ച്ചചെയ്തു. മുംബൈ ഭദ്രാസാധിപന്‍ ഡോ. ഗീവര്‍ഗീസ് മാര്‍ കൂറിലോസ് ഇന്നു ന്യൂകാസിലിലേക്കു പോകും. ഭൌതിക ശരീരം കൊണ്ടു വരുന്നതി നുള്ള നടപടിക്രമങ്ങ ള്‍ക്കായി ഗീവര്‍ഗീസ് മാര്‍ കൂറിലോസ് മെത്രാപ്പോലീത്ത ലണ്ടനിലേക്കു പോകും. തിരുവ നന്തപുരത്തെ ത്തുന്ന ഭൌതിക ശരീരം വിലാപ യാത്രയായി മാര്‍ മക്കാറിയോസിന്റെ ജന്മസ്ഥലമായ പത്തനംതിട്ട അയിരൂര്‍ വഴി ചുങ്കം പഴയ സെമി നാരിയില്‍ എത്തിക്കും.

അവിടെ പൊതു ദര്‍ശനത്തിന് വച്ച ശേഷം വിലാപ യാത്രായി ദേവലോകം അരമനയിലേക്കു കൊണ്ടു പോകും. അരമന ചാപ്പലിന്റെ മദ്ബഹയുടെ തെക്കു വശത്ത് ഭൌതിക ശരീരം സംസ്കരിയ്ക്കുമെന്നു സുന്നഹദോസ് സെക്രട്ടറി മാത്യൂസ് മാര്‍ സേവേറിയോസ് പറഞ്ഞു.

ജനുവരി ആറിന് ന്യൂകാസില്‍ സെന്റ് തോമസ് ഓര്‍ത്തഡോക്സ് ഇടവക പ്രഖ്യാപനത്തിനുശേഷം ലണ്ടന്‍ വിമാനത്താവളത്തിലേക്ക് പോകുന്നതിനിടെ മെത്രാപ്പോലീത്ത സഞ്ചരിച്ചിരുന്ന ഹോണ്ട കാറില്‍ എതിരെവന്ന ബി.എം.ഡബ്ള്യു കാര്‍ വന്നിടിച്ചാണ് അദ്ദേഹത്തിനു ഗുരുതരമായി പരുക്കേറ്റത്. നട്ടെല്ലിനും വാരിയെല്ലിനും ആന്തരികാവയവങ്ങള്‍ക്കും ക്ഷതമേറ്റു് ന്യൂകാസില്‍ ജനറല്‍ ആശുപത്രിയിലെ തീവ്രപരിചരണ വിഭാഗത്തില്‍ ചികിത്സയിലായിരുന്ന മാര്‍ മക്കാറിയോസ് നിരവധി ശസ്ത്രക്രിയകള്‍ക്കു വിധേയനായി. ഇടയ്ക്കു് സ്ഥിതി മെച്ചപ്പെടുകയും പരീക്ഷണാര്‍ഥം ശ്വസനസഹായ യന്ത്രങ്ങള്‍ നീക്കംചെയ്യുകയും ചെയ്തെങ്കിലും പിന്നീടു് സ്ഥിതി മോശമായി അന്ത്യം സംഭവിക്കുകയായിരുന്നു. എട്ടാഴ്ചയോളം അദ്ദേഹം ചികിത്സയിലായിരുന്നു.

അന്ത്യോപചരം അര്‍പ്പിക്കുന്നതിനുള്ള അവസരം ലണ്ടനിലെ മലയാളികള്‍ക്ക് നല്‍കുന്നതിനുവേണ്ടി ന്യൂകാസില്‍ ജനറല്‍ ആശുപത്രിയില്‍ ഒരുമണിക്കൂറോളം അദ്ദേഹത്തിന്റെ ഭൌതീകശരീരം പൊതുദര്‍ശനത്തിന് വച്ചതിനുശേഷം ഔദ്യോഗിക സ്ഥാനവസ്ത്രങ്ങള്‍ അണിയിച്ച് മൃതദേഹം ആശുപത്രിയിലെ മോര്‍ച്ചറിയിലേക്ക് മാറ്റി.

മൃതദേഹം നാട്ടിലെത്തിച്ച് സംസ്കരിക്കാനുള്ള ക്രമീകരണങ്ങളാണ് നടക്കുന്നത്. മാര്‍ മക്കാറിയോസിന്റെ സഹോദരനായ ലാസര്‍ റമ്പാന്‍, ഫാ. ഹാപ്പി ജേക്കബ്, ഫാ. ഏബ്രഹാം തോമസ്, ഫാ. വര്‍ഗീസ് ജോണ്‍ എന്നിവരാണ് ഇതിന് നേതൃത്വം നല്കുന്നത്.

മലങ്കര മെത്രാപ്പോലീത്തയായിരുന്ന പരിശുദ്ധ വട്ടശേരില്‍ തിരുമേനിയുടെ ഒാര്‍മപ്പെരുന്നാളില്‍ പങ്കെടുക്കാന്‍ എല്ലാവര്‍ഷവും കോട്ടയത്ത് എത്തിയിരുന്ന തോമസ് മാര്‍ മക്കാറിയോസിന്റെ ദേഹവിയോഗം വട്ടശേരില്‍ തിരുമേനിയുടെ 74-ആം ചരമവാര്‍ഷിക ദിനത്തിലായിരുന്നു.

വൈദികവൃത്തിയിലേക്കു പ്രവേശിച്ചതിന്റെ 57-ആം വാര്‍ഷിക ദിനത്തിലാണു് മാര്‍ മക്കാറിയോസ് കാലംചെയ്തതെന്നത് മറ്റൊരു യാദൃച്ഛികതയാണു്. 1951 ഫെബ്രുവരി 23ന് ആണു പരിശുദ്ധ ഗീവര്‍ഗീസ് ദ്വിതീയന്‍ കാതോലിക്കാ ബാവാ അദ്ദേഹത്തിനു ശെമ്മാശുപട്ടം നല്‍കിയത്.

സുറിയാനി ഓര്‍ത്തഡോക്സ് യൂറോപ്യന്‍ ആര്‍ച്ച് ഡയോസിസിന്റെ മെത്രാപ്പോലീത്തയായി ജര്‍‍മനിയിലെ മാര്‍ സേവേറിയോസ് മോശ ഗോര്‍ഗുനെവാഴിച്ച മെത്രാപ്പോലീത്തമാരുടെ അഞ്ചംഗ ഉപസമിമിതിയിലെ അംഗമായിരുന്നു അദ്ദേഹം. മെത്രാഭിഷേകശുശ്രൂഷയില്‍ പങ്കെടുക്കാന്‍‍‍ മാര്‍ മക്കാറിയോസിനു് കഴിഞ്ഞില്ലെങ്കിലും അദ്ദേഹത്തിന്റെ പിന്തുണയുണ്ടായിരുന്നതുകൊണ്ടാണു് മെത്രാഭിഷേകശുശ്രൂഷ നടക്കാനിടയായതു് .

ചിത്രം — ഡോ. തോമസ് മാര്‍ മക്കാറിയോസ് മെത്രാപ്പോലീത്ത

ചിത്രത്തില്‍ ക്ലിക്കിയാല്‍ ശരിവലിപ്പത്തില് കൂടിയ പ്രമേയത്തിലുള്ള രൂപം പുതിയ ജാലകത്തില്‍ കാണാം.

പകര്‍പ്പനുമതി വിവരം

പകര്‍പ്പകാശ വിവരം പ്രത്യേകം പരാമര്‍‍ശിയ്ക്കാത്തവ പകര്‍പ്പവകാശനുമതിയുള്ളതായിരിയ്ക്കും. അവ എടുത്തു് പ്രസിദ്ധീകരിയ്ക്കുമ്പോള്‍ ഈ ഉറവിടത്തെ ഉദ്ധരിയ്ക്കേണ്ടതാണു്.