കോട്ടയം: മനഃപൂര്‍വം സംഘര്‍ഷമുണ്ടാക്കി ക്രമസമാധാന പ്രശ്‌നം സൃഷ്‌ടിച്ച്‌ ഓര്‍ത്തഡോക്‌സ്‌ സഭയുടെ കോലഞ്ചേരി, മാമ്മലശേരി, മണ്ണത്തൂര്‍, കുറുഞ്ഞി തുടങ്ങിയ സ്‌ഥലങ്ങളിലെ പള്ളികള്‍ പൂട്ടിക്കയും നുണപ്രചാരണത്തിലൂടെ പൊതുജനങ്ങളെ തെറ്റിധരിപ്പിക്കയും ചെയ്യുന്ന വിമത യാക്കോബായ വിഭാഗ നേതാക്കളുടെ ശൈലി അപലപനീയമാണെന്ന്‌ വൈദിക ട്രസ്‌റ്റി ഫാ. ജോണ്‍സ്‌ ഏബ്രഹാം കോനാട്ട്‌ പറഞ്ഞു.
കുറുഞ്ഞി പള്ളിയില്‍ കുര്‍ബാന അര്‍പ്പിക്കാനെത്തിയ കണ്ടനാട്‌ ഈസ്‌റ്റ്‌ ഭദ്രാസനാധിപന്‍ ഡോ. തോമസ്‌ മാര്‍ അത്താനാസിയോസിനെ വഴിയില്‍ തടയുകയും പള്ളി പൂട്ടിക്കാന്‍ ഇടയാകുകയും ചെയ്‌തു. പുത്തന്‍കുരിശ്‌ സര്‍ക്കിള്‍ ഇന്‍സ്‌പെക്‌ടര്‍ ബിജു സ്‌റ്റീഫനെ തലയ്‌ക്ക്‌ കമ്പിവടികൊണ്ട്‌ അടിച്ചുവീഴ്‌ത്തി, പൊലീസുകാരെ മര്‍ദിച്ചു. കണ്യാട്ടുനിരപ്പ്‌ പള്ളിയില്‍ വികാരി ഫാ. ജോണ്‍ മൂലമറ്റത്തെ തടയുകയും ആക്രമണം നടത്തുകയും ചെയ്‌തു.
മാമ്മലശേരി പള്ളിയില്‍ വൈദികന്റെ കാര്‍ അടിച്ചു തകര്‍ത്തു. മണ്ണത്തൂര്‍, വെട്ടിത്തറ, ഓണക്കൂര്‍ എന്നിവിടങ്ങളിലെ പള്ളികളില്‍ കോടതിവിധി അനുസരിക്കാതെയും സ്‌റ്റാറ്റസ്‌കോ ലംഘിച്ചും ഉഭയകക്ഷിധാരണകള്‍ അവഗണിച്ചും മധ്യസ്‌ഥ തീരുമാനങ്ങള്‍ക്കു വഴങ്ങാതെയും അരാജകത്വം സൃഷ്‌ടിച്ച്‌ പള്ളികളില്‍ അനധികൃത അവകാശം സ്‌ഥാപിക്കാനുള്ള ഗൂഢതന്ത്രം അംഗീകരിക്കാനാവില്ലെന്നും അദ്ദേഹം പറഞ്ഞു.
0 അഭിപ്രായപ്രകടനം ഇവിടെ:
അഭിപ്രായം എഴുതൂ
Note: only a member of this blog may post a comment.