ഈ ലേഖയില്‍‍ തിരയുക

സഭാശുശ്രൂഷയില്‍ രണ്ടു് പതിറ്റാണ്ടുകള്‍‍-8

ഡോ. തോമസ്‌ മാര്‍ അത്താനാസ്യോസ് മെത്രാപ്പോലീത്ത

സഭൈക്യശ്രമങ്ങള്‍ പ്രതിസന്ധി നേരിട്ടുകൊണ്ടിരുന്ന സാഹചര്യത്തില്‍ പ്രവര്‍ത്തനങ്ങള്‍ കൂടുതല്‍ ഫലപ്രദമാക്കുന്നതിന്‌ ശക്തമായ നേതൃത്വം നല്‍കുക എന്ന താല്‌പര്യത്തോടെ ‘സഭൈക്യ സമിതി’ എന്ന പേരില്‍ ഒരു പ്രസ്ഥാനം രൂപം കൊണ്ടു. സാഹചര്യങ്ങളുടെയും ബന്ധങ്ങളുടെയും സമ്മര്‍ദ്ദ ഫലമായി ഇരുചേരിയിലുമായി സഭാംഗങ്ങള്‍ നിലനില്‌ക്കുന്നുവെങ്കിലും മലങ്കര സഭയില്‍ ഐക്യവും സമാധാനവും കാംക്ഷിക്കുന്നവരാണ്‌ ബഹുഭൂരിപക്ഷം അംഗങ്ങളും എന്ന വസ്‌തുത ഉറച്ച്‌ പ്രഖ്യാപിക്കുവാനും തദനുസൃതമായി സഭയില്‍ ചലനം സൃഷ്‌ടിക്കുവാനും ഇതുവഴി ലക്ഷ്യമിട്ടു. മുന്‍ കേന്ദ്രമന്ത്രി ശ്രീ. എ. എം. തോമസ്‌ അദ്ധ്യക്ഷനായുള്ള ഇതിന്റെ ഉപദേശക സമിതിയില്‍ ഫാ. ജോര്‍ജ്ജ്‌ ചാലപ്പുറം, ഡോ. ഡി. ബാബുപോള്‍, ശ്രീ. റ്റി.എം. ജേക്കബ്‌, ശ്രീ. കുര്യാക്കോസ്‌ ചെന്നക്കാടന്‍ തുടങ്ങിയവര്‍ ഉണ്ടായിരുന്നു. ഫാ. ഏലിയാസ്‌ ചെറുകാട്ട്‌, അഡ്വ. ജെയിംസ്‌ ജോണ്‍ മുതലായവര്‍ ഇതിന്റെ പ്രധാന പ്രവര്‍ത്തകരായിരുന്നു. ഈ പ്രസ്ഥാനത്തിന്‌ രൂപം കൊടുത്തതില്‍ പ്രധാന പങ്ക്‌ വഹിച്ചത്‌ വരിക്കോലി ഇടവകാംഗം ശ്രീ. എം. സി. പൗലോസ്‌ ആയിരുന്നു. തന്റെ മരണം വരെ സഭൈക്യം എന്ന ആശയത്തോട്‌ പ്രതിബദ്ധത പുലര്‍ത്തുകയും എന്നെ ഏറെ സ്‌ നേഹിക്കുകയും ചെയ്‌ത വ്യക്തിയായിരുന്നു അദ്ദേഹം. തന്റെ ചുറ്റും ശക്തമായ ചലനം സൃഷ്‌ടിക്കുവാന്‍ പൗലോസിനുള്ള കഴിവ്‌ അപാരമായിരുന്നു. സഭൈക്യത്തിനുവേണ്ടി അദ്ദേഹം നിര്‍വ്വഹിച്ച നിസ്‌തുല സേവനം എന്നെന്നും ഐക്യചരിത്രത്തില്‍ സ്‌മരിക്കപ്പെടട്ടെ എന്ന്‌ പ്രാര്‍ത്ഥിക്കുന്നു.

സഭൈക്യസമിതിയുടെ ആഭിമുഖ്യത്തില്‍ കോലഞ്ചേരിയിലും പിറവത്തും നടന്ന യോഗങ്ങള്‍ ജനശ്രദ്ധ ആകര്‍ഷിച്ചു. കോലഞ്ചേരി സെയ്‌ന്റ്‌ പീറ്റേഴ്‌സ്‌ കോളേജ്‌ ഇന്‍ഡോര്‍ സ്റ്റേഡിയത്തില്‍ വച്ച്‌ 1997 നവംബര്‍ 29-ആം തീയതി സമിതിയുടെ ആദ്യ പൊതുസമ്മേളനം നടന്നു. വ്യാപകമായ പ്രചാരണമോ ആവശ്യമായ തയ്യാറെടുപ്പോ കൂടാതെ നടത്തിയ സമ്മേളനത്തില്‍ ആയിരക്കിണക്കിന്‌ സമാധാനകാംക്ഷികള്‍ പങ്കെടുത്ത്‌ സഭൈക്യത്തിന്‌ പിന്തുണ പ്രഖ്യാപിച്ചു. ഇതില്‍ നിന്ന്‌ പ്രചോദനം ഉള്‍ ക്കൊണ്ട്‌ പിറവത്തും ഇതുപോലെതന്നെ ഒരു വലിയ സമ്മേളനം സംഘടിപ്പിച്ചു. ഈ സമ്മേളനങ്ങളില്‍ ശ്രീ. എ. എം. തോമസ്‌, ഡോ. ഡി. ബാബു പോള്‍, യൂഹാനോന്‍ മാര്‍ മിലിത്തിയോസ്‌ മെത്രാപ്പോലീത്ത എന്നിവര്‍ പങ്കെടുത്ത്‌ പ്രസംഗിച്ചു. കോടതിവി ധി നല്‍കിയ അനുകൂല സാഹചര്യം ഉപയോഗപ്പെടുത്തി സഭായോജിപ്പിന്‌ ശ്രമിക്കണമെന്നും ഇത്‌ ദൈവതാല്‌പര്യവും മലങ്കരസഭയിലെ ബ ഹുഭൂരിപക്ഷം ജനങ്ങളുടെ ആഗ്രഹ വുമാണെന്നും പ്രസംഗകര്‍ ചൂണ്ടി ക്കാണിച്ചു.
ഈ സന്ദര്‍ഭത്തില്‍ പലരും പരി. അന്ത്യോഖ്യാ പാത്രിയര്‍ക്കീസ്‌ ബാവയ്‌ക്ക്‌ സഭൈക്യത്തിനു വേണ്ടി കത്തുകളയച്ചു. 1970 കളിലെ വഴക്കുകാലത്ത്‌ എറണാകുളം ജില്ലയില്‍ പാത്രിയര്‍ക്കീസ്‌ പക്ഷത്തിന്‌ ധീരമായ നേതൃത്വം നല്‍കിയ ശ്രീ. കുര്യാക്കോ സ്‌ ചെന്നക്കാടന്‍ പരി. പാത്രിയര്‍ക്കീസ്‌ ബാവാ സഭൈക്യകാര്യത്തില്‍ ഇടപെടണമെന്ന്‌ അഭ്യര്‍ത്ഥിച്ചുകൊണ്ട്‌ എഴുതിയ കത്തിലെ പ്രസക്തഭാഗങ്ങള്‍ താഴെ ചേര്‍ക്കുന്നു.
‘I have been in the forefront of the Patriarch Faction in the present conflict since 1970. Moran blessed us by offering Holy Qur-bana in the Chapel at Kolenchery constructed under my leadership and initiative and financial support.

In disputes, the supreme court is the final word in this country. We do have to act accordingly. More Gregoriose of Alappo was fully convinced of the matter during his recent visit to India. Any effort to scuttle the decision of the Episcopal Synod held on 5-9-1996, should not be tolerated.’

ചേരിതിരിഞ്ഞ്‌ നിയമയുദ്ധങ്ങള്‍ നടത്തിയ കാലങ്ങളിലും പിതാക്കന്മാര്‍ സഭയുടെ ഭിന്നിപ്പിന്റെ പ്രത്യാഘാതങ്ങള്‍ മനസ്സിലാക്കി സഭായോജിപ്പിന്റെ അനിവാര്യത തിരിച്ചറിഞ്ഞിരുന്നു. സഭാവിഭജനത്തെ എങ്ങനെ അവര്‍ കണ്ടു എന്ന്‌ വ്യക്തമാക്കുന്ന ചില രേഖകള്‍ വായിക്കുന്നത്‌ ഈ വസ്‌തുത മനസ്സിലാക്കാന്‍ സാഹായിക്കുമെന്ന്‌ ഞാന്‍ കരുതുന്നു. 1941 മെയ്‌ മാസം പാത്രിയര്‍ക്കീസ്‌ വിഭാഗത്തിലെ മേല്‍പ്പട്ടക്കാര്‍ ചേര്‍ന്ന്‌ പരി. പാ ത്രിയര്‍ക്കീസ്‌ ബാവായ്‌ക്ക്‌ അയച്ച കത്തിന്റെ പ്രസക്ത ഭാഗങ്ങളാണ്‌ താഴെ കൊടുക്കുന്നത്‌.
’വിജയ സമാപ്‌തി വരെ ഈ വ്യവഹാരം വലിച്ചിഴച്ച്‌ കൊണ്ടു പോകുകയാണെങ്കില്‍ക്കൂടി സഭയിലെ പിളര്‍പ്പ്‌ തുടരും. പിളര്‍പ്പ്‌ നിലനില്‍ക്കുന്നിടത്തോളം കാലം ഈ സഭയ്‌ക്ക്‌ സാമൂഹികമായും രാഷ്‌ട്രീയമായും സല്‍പ്പേരോ, ക്ഷേമമോ ഉണ്ടാവുകയില്ല. നീണ്ടകാലത്തെ ശത്രുത വഴി സഭയ്‌ക്ക്‌ മുമ്പുണ്ടായിരുന്ന സ്ഥാനം നഷ്‌ടപ്പെട്ടുകൊണ്ടിരിക്കുകയാണ്‌. സഭയില്‍ സമാധാനം ഉണ്ടാക്കുക എന്നതാണ്‌ സഭക്ക്‌ മുമ്പുണ്ടായിരുന്ന സ്ഥാനം വീണ്ടെടുക്കാനുള്ള ഏകമാര്‍ഗ്ഗം. അതുപോലെ തന്നെ സമുദായത്തിന്റെ ആത്മീകജീവിതത്തകര്‍ച്ച വഴക്ക്‌ നീണ്ടുപോകുന്തോറും രൂക്ഷമായിക്കൊണ്ടിരിക്കുന്നു...
വിദ്യാഭ്യാസത്തിലും സംസ്‌കാരത്തിലും ‘മലബാര്‍’ ഒന്നാം സ്ഥാനത്ത്‌ നില്‍ക്കുന്നു. വിദ്യാസമ്പന്നരായ വ്യക്തികള്‍ കൂടുതല്‍ സ്വാതന്ത്ര്യം ആഗ്രഹിക്കുന്നു. ഈ സാഹചര്യം പരിഗണിക്കുമ്പോള്‍ ഉള്‍ഭരണസ്വാതന്ത്ര്യം എന്ന മറുപക്ഷത്തിന്റെ ആശയത്തെ പരി. പിതാവ്‌ അനുഗ്രഹിക്കുമെന്ന്‌ ഞങ്ങള്‍ വിശ്വസിക്കുന്നു.
പരി. പിതാവ്‌ സ്‌നേഹത്തില്‍ അധിഷ്‌ഠിതമായ ഐക്യം മലങ്കരസഭയില്‍ സ്ഥാപിക്കണമെന്ന്‌ താഴ്‌മയായി അപേക്ഷിക്കുന്നു.’

കഴിഞ്ഞ വഴക്കുകാലത്ത്‌ സഭയുടെ പിളര്‍പ്പ്‌ വഴി സഭയ്‌ക്കുണ്ടായ തിരിച്ചടികളെപ്പറ്റി നല്ല ബോധ്യം നേതൃസ്ഥാനത്തിരുന്നവര്‍ക്കുണ്ടായിരുന്നു. എന്നാല്‍ ഐക്യത്തിന്റെ അനിവാര്യത ഇപ്പോള്‍ നേതൃത്വത്തില്‍ ഉള്ള പലരും തരിച്ചറിയുന്നില്ല എന്നത്‌ അത്യധികം ദുഃഖകരമാണ്‌. സഭാവഴക്കു മൂലം സഭയുടെ ആത്മീകജീവിതത്തിലുണ്ടായ തകര്‍ച്ചയും സഭാഭരണരംഗത്തെ അച്ചടക്കരാഹിത്യവുമൊന്നും അവര്‍ക്ക്‌ വിഷയമല്ല.
ആലുവയിലെ വലിയതിരുമേനി
ആലുവയിലെ വലിയതിരുമേനി (പൗലോസ്‌ മാര്‍ അത്താനാസ്യോസ്‌) യുടെ 1951 - ലെ ഒരു കല്‌പനയുടെ പ്രസക്തഭാഗം വായനക്കാരുടെ അറിവിനായി പ്രസിദ്ധീകരിക്കുന്നു:
’ഒരു സമുദായത്തിന്റെ അഭിവൃദ്ധിയും പുരോഗതിയും അതിലുള്‍‍പ്പെട്ട ജനങ്ങള്‍ കക്ഷിതിരിഞ്ഞുള്ള കേസ്സുകളില്‍ ഒരു ഭാഗം ജയിക്കുന്നതിലല്ല എന്ന്‌ ഓരോരുത്തരെയും ഓര്‍മ്മിപ്പിക്കേണ്ട ചുമതല നമുക്കുണ്ട്‌. ഇന്ന്‌ രണ്ട്‌ കക്ഷിയായി ഭിന്നിച്ചിരിക്കുന്നവര്‍ ഒരേ സഭാമാതാവിന്റെ മക്കളാണെന്നോര്‍ക്കുക. അതിനാല്‍ തമ്മില്‍ തമ്മില്‍ തെറ്റിദ്ധാരണയും ഭിന്നതയും വളര്‍ത്തുന്ന യാതൊന്നും പ്രവര്‍ത്തിക്കരുത്‌. പ്രവര്‍ത്തനത്തിലും സംസാരത്തിലും എന്നല്ല നിങ്ങളുടെ ചിന്തയില്‍ പോലും ഉണ്ടാകരുത്‌ എന്ന്‌ നിങ്ങളുടെ സ്‌നേഹത്തോട്‌ പ്രത്യേകം ആജ്ഞാപിക്കുന്നു. ദൈവത്തിലുള്ള നിങ്ങളുടെ ആശ്രയവും താഴ്‌മയും അന്യോന്യ സ്‌നേഹവുമാണ്‌ നിങ്ങളുടെ പ്രത്യേകതകള്‍ ആ കേണ്ടത്‌. ഉത്തമവിശ്വാസത്തോടും അല്ലാതെയും നമ്മുടെ സഭയില്‍ അഭിപ്രായഭിന്നതയും മത്സരവും കഴിഞ്ഞ നാല്‌പതുവര്‍ഷമായി നിലനിന്നുവരുന്നു. നമ്മുടെ സഭ മേലില്‍ ഒന്നായി പുരോഗമിക്കുന്നതിനുള്ള മാര്‍ഗ്ഗങ്ങള്‍ ആലോചിക്കേണ്ട സമയം അതിക്രമിച്ചിരിക്കുന്നു. ഈ തരത്തില്‍ പ്രവര്‍ ത്തിക്കേണ്ടതിന്റെ ആവശ്യകതയും അതുവഴി ലഭിക്കുന്ന ഐശ്വര്യാഭിവൃദ്ധികളും നമ്മുടെ ചുറ്റുപാടുമുള്ള ഇതര ക്രിസ്‌തീയ വിഭാഗങ്ങളെ നോ ക്കിയാലും അന്യസമുദായങ്ങളെ നോ ക്കിയാലും നിങ്ങള്‍ക്ക്‌ ബോധ്യംവരും. നമ്മുടെ സഭയില്‍ ഭിന്നിപ്പുകള്‍ക്കിടയാക്കിയ കാര്യങ്ങള്‍ എന്തുതന്നെയായാലും ഭിന്നിച്ചു നില്‍ക്കുന്ന സഹോദരങ്ങളെ തിരിച്ചു വരുത്തേണ്ടത്‌ എത്രയും ആവശ്യമാകുന്നു.’

’വിശ്വാസസംരക്ഷകന്‍’ എന്ന്‌ പേരിട്ട്‌ തീവ്രവാദിയായി ഇപ്പോഴത്തെ പാത്രിയര്‍ക്കീസ്‌ കക്ഷിക്കാര്‍ അവതരിപ്പിക്കുന്ന പരമ സാത്വികനായ ആലുവയിലെ വലിയ തിരുമേനിയുടെ ചിന്ത എന്തായിരുന്നുവെന്ന്‌ ഈ ലിഖിതം വ്യക്തമാക്കുകയാണ്‌. ഭിന്നതയ്‌ക്ക്‌ കാരണക്കാരനെ കണ്ടുപിടിക്കലല്ല ഐക്യം കൈവരിക്കുകയാണ്‌ സഭയുടെ ആവശ്യമെന്നാണ്‌ ഈ കല്‌പനയിലെ നിര്‍ദ്ദേശം. ഈ ചിന്ത പുതിയ അന്ത്യോഖ്യാക്കാര്‍ ചെവിക്കൊണ്ടെങ്കില്‍ നല്ലകാര്യം. വലിയ തിരുമേനിയുടെ ആദര്‍ശ ശുഭ്രതയും ചിന്തയുടെ വ്യക്തതയും സഭൈക്യത്തിനുവേണ്ടിയുള്ള തീവ്രാഭിലാഷവുമാണ്‌ ഈ കല്‌പനയില്‍ പ്രതിഫലിക്കുന്നത്‌. കക്ഷിവൈരാഗിയായി അവതരിപ്പിക്കപ്പെടുന്ന ആ പുണ്യപുരുഷന്റെ സുഭഗമനസ്സിന്റെ സ്വച്ഛസുന്ദരമായ തനതാവിഷ്‌കരണമാണ്‌ ഈ കത്തില്‍ പ്രകടമാകുന്നത്‌. ഈ ചിന്തയാണ്‌ അദ്ദേഹത്തെ അനശ്വരനാക്കുന്നത്‌. അദ്ദേഹത്തിന്റെ മനസ്സിന്റെ വ്യഥ പുതിയ വിശ്വാസവീരന്മാരെ സ്വാധീനിക്കില്ല. എങ്കിലും അദ്ദേഹത്തിന്റെ പേര്‌ ലഭിച്ച എനിക്ക്‌ ആ ശുദ്ധമനസ്സിന്റെ തുടിപ്പുകള്‍ ഒഴിവാക്കി ശുശ്രൂഷ നിര്‍വ്വഹിക്കാനാവില്ല.


കാലം ചെയ്‌ത പരി. യാക്കൂബ്‌ തൃതീയന്‍ പാത്രിയര്‍ക്കീസ്‌ ബാവാ എന്തെല്ലാം ചെയ്‌തു എന്ന്‌ നാം ആ ക്ഷേപിച്ചാലും സഭായോജിപ്പ്‌ സംബന്ധിച്ച്‌ മലങ്കരസഭ അദ്ദേഹത്തോട്‌ ഏറെ കടപ്പെട്ടിരിക്കുന്നു എന്നതാണ്‌ സത്യം. പരി. അപ്രേം പ്രഥമന്‍ പാത്രിയര്‍ക്കീസ്‌ ബാവാ അന്ന്‌ ജീവിച്ചിരുന്നെങ്കില്‍ 1958-ലെ സഭാസമാധാനം ഉണ്ടാകുമായിരുന്നില്ല. യൂലിയോസ്‌ ബാവയുടെ നിലപാട്‌ അവഗണിച്ച്‌ മലങ്കരസഭയില്‍ സമാധാനത്തിന്‌ ധീരമായ തീരുമാനമെടുത്തതിന്റെ പിമ്പില്‍ ഇവിടത്തെ സഭാരാഷ്‌ട്രീയം കൊണ്ട്‌ മനം മടുത്ത യാക്കൂബ്‌ തൃതീയന്‍ ബാവയുടെ ഉറച്ച നിലപാടായിരുന്നു. സഭാകേസിന്റെ വ്യവഹാരച്ചെലവ്‌ മുഴുവന്‍ കൊടുക്കുവാന്‍ ത യ്യാറായ സമുദായാംഗങ്ങള്‍ ഇവിടെ ഉണ്ടായിരുന്നു. പക്ഷേ, അതൊക്കെ അവഗണിച്ചാണ്‌ സഭൈക്യത്തിന്‌ പരി. പിതാവ്‌ കല്‌പന അയച്ചത്‌. 1964-ല്‍ കാതോലിക്കാ വാഴ്‌ചയ്‌ക്ക്‌ പാത്രിയര്‍ക്കീസ്‌ ബാവാ ഇവിടെ എത്തിയപ്പോള്‍ അത്‌ തടയാന്‍ അന്ത്യോഖ്യാ ഭക്തന്മാര്‍ തയ്യാറെടുത്തിരുന്നു. എന്നാല്‍ അതും അതിജീവിച്ചാണ്‌ സഭൈക്യത്തെ പ്രതി അന്ന്‌ അദ്ദേഹം കാതോലിക്കാ വാഴ്‌ചയില്‍ മുഖ്യകാര്‍മ്മികനായത്‌.

ഒരു ഉപാധിയുമില്ലാതെ അദ്ദേഹം കാതോലിക്കേറ്റിനെ സ്വീകരിക്കാന്‍ ഒരുമ്പെട്ടത്‌ വിവരക്കേടുകൊണ്ടായിരുന്നില്ല. നേരെമറിച്ച്‌ സഭ പിളര്‍ത്തിയതും പിളര്‍പ്പ്‌ നിലനിര്‍ത്തിയതും അന്ത്യോഖ്യയാകരുത്‌ എന്ന്‌ ചിന്തയിലായിരുന്നു. പാത്രിയര്‍ക്കീസ്‌ ഏതെങ്കിലും ഒരു പ്രാര്‍ത്ഥന ചൊല്ലി കാതോലിക്കായെ സ്വീകരിക്കുമെന്നാണ്‌ അന്നത്തെ കാതോലിക്കാകക്ഷി നേതൃത്വം കരുതിയിരുന്നത്‌. നിരുപാധിക സ്വീകരണത്തെപ്പറ്റി പരി. ഗീവര്‍ഗീസ്‌ ദ്വിതീയന്‍ കാതോലിക്കാ ബാവാ ഏറെ ഉത്‌കണ്‌ഠാകുലനായിരുന്നു. കാരണം ആ കാര്യം പറഞ്ഞ്‌ വീണ്ടും ഭിന്നതയുണ്ടാക്കുമോ എന്ന്‌ അദ്ദേഹം ഭയപ്പെട്ടിരുന്നു. അദ്ദേഹം പാത്രിയര്‍ക്കീസ്‌ കക്ഷിനേതാക്കളോട്‌ പറഞ്ഞത്‌, ‘തലയില്‍ കൈവച്ചാലും വേണ്ടില്ല, കാലുകഴുകിയാലും വേണ്ടില്ല ഇതോടെ പ്രശ്‌നം തീരണം. പിന്നെ പട്ടമില്ല, മറ്റേതില്ല എന്നു പറഞ്ഞ്‌ നടക്കരുത്‌!’ അദ്ദേഹം ആത്മാര്‍ത്ഥതയോടെ പറഞ്ഞ കാര്യമായിരുന്നു അത്‌. കേസ്സുനടത്തിപ്പിന്റെ ചുക്കാന്‍ പിടിച്ചിരുന്ന മണലില്‍ യാക്കൂബ്‌ കത്തനാരും നിരുപാധിക സ്വീകരണത്തില്‍ അസ്വസ്ഥനായി. പാത്രിയര്‍ക്കീസ്‌ വിഭാഗത്തില്‍ ഇക്കാര്യം മൂലം പിളര്‍പ്പുണ്ടാകുമോ എന്നായിരുന്നു അദ്ദേഹത്തിന്‌ ഭയം. അത്രയും കാലം കാതോലിക്കായ്‌ക്ക്‌ പട്ടമില്ല എന്നായിരുന്നത്‌ 1970-ല്‍ മാര്‍ത്തോമാ ശ്ലീഹായ്‌ക്കു പോലും പട്ടമില്ല എന്ന്‌ യാക്കൂബ്‌ തൃതീയന്‍ പാത്രിയര്‍ക്കീസ്‌ ബാവാ കണ്ടുപിടിച്ചതോടെ ഗീവര്‍ഗീസ്‌ ദ്വിതീയന്‍ ബാവായുടെയും മണലില്‍ അച്ചന്റെയും ഭയം അടിസ്ഥാനരഹിതമായിരുന്നില്ല എന്ന്‌ വ്യക്തമായി. എങ്കിലും തന്റെ സാഹസിക പ്രസ്‌താവനയ്‌ക്ക്‌ പരിഹാരം തേടി എന്നതാണ്‌ അദ്ദേഹത്തെ ആകര്‍ഷകനാക്കുന്നത്‌.
എന്നാല്‍ ഇവിടത്തെ അസംതൃപ്‌തരായ ചില പാത്രിയര്‍ക്കീസ്‌ ഭക്തന്മാരുടെ സമ്മര്‍ദ്ദത്തിന്‌ വിധേയമായി പരി. യാക്കോബ്‌ തൃതീയന്‍ പാത്രിയര്‍ക്കീസ്‌ ബാവാ ഇറക്കിയ 203-ആം നമ്പര്‍ കല്‌പന പിന്‍വലിക്കുവാനുള്ള നയതന്ത്ര ബന്ധങ്ങള്‍ ഉപയോഗപ്പെടുത്തുന്നതിന്‌ പകരം വളരെ ശക്തമായ പ്രതിഷേധ സന്ദേശം ഇവിടെ നിന്നയച്ച്‌ പ്രശ്‌നം രൂക്ഷമാക്കാനാണ്‌ അന്നത്തെ സഭാനേതൃത്വം ശ്രമിച്ചത്‌. പാത്രിയര്‍ക്കീസ്‌ കാണപ്പെടുന്ന ദൈവമാണ്‌ എന്ന്‌ ചിന്തിച്ച വലിയ വിഭാഗം ജനത്തിന്റെ മനസ്സിനെ മുറിപ്പെടുത്താതിരിക്കാന്‍ ശ്രമിക്കേണ്ടതായിരുന്നു. സഭായോജിപ്പ്‌ നടന്നിട്ട്‌ കാലം അധികമായിരുന്നില്ല എന്നതും ഓര്‍ക്കേണ്ടതായിരുന്നു. പ്രശ്‌നമുണ്ടാകുമ്പോള്‍ സഭാനേതൃത്വം പക്ഷം പിടിക്കുകയല്ല, മദ്ധ്യസ്ഥ പങ്കാണ്‌ ഏറ്റെടുക്കേണ്ടതെന്ന കാര്യം വിസ്‌മരിച്ചു.
യാക്കോബ്‌ തൃതീയന്‍ പാത്രിയര്‍ക്കീസ്‌ ബാവയുടെ 203-ആം നമ്പര്‍ കല്‌പന മലങ്കരയിലെ സഭാന്തരീക്ഷം കലുഷിതമാക്കി എന്നറിഞ്ഞപ്പോള്‍ താന്‍ ചെയ്‌തത്‌ അബദ്ധമായി എന്ന്‌ മനസ്സിലാക്കി പരിഹാര നടപടികള്‍ സ്വീകരിക്കുവാന്‍ അദ്ദേഹം തയ്യാറായിരുന്നു. എന്നാല്‍ മലങ്കരസഭയുടെ പ്രതിഷേധ പ്രകടനത്തോടെ ബന്ധം തകര്‍ന്നിരുന്നു. അതുകൊണ്ട്‌ അദ്ദേഹം കോപ്‌റ്റിക്‌ പാത്രിയര്‍ക്കീസിനോട്‌ ഇക്കാര്യത്തില്‍ മദ്ധ്യസ്ഥതയ്‌ക്ക്‌ അഭ്യര്‍ത്ഥിച്ചു. അതേത്തുടര്‍ന്ന്‌ കോപ്‌റ്റിക്‌ ബിഷപ്പ്‌ മാര്‍ അത്താനാസ്യോസിനെ മലങ്കരയിലേയ്‌ക്കയച്ചു. അദ്ദേഹം ഇവിടെയെത്തി 1973 സെപ്‌റ്റംബര്‍ 13-ാം തീയതി പരി. ഔഗേന്‍ കാതോലിക്കാ ബാവായെ സന്ദര്‍ശിച്ചു. സഭാനേതാക്കന്മാരുമായി ചര്‍ച്ചകള്‍ നടത്തി. ഒത്തുതീര്‍പ്പിനുള്ള നിര്‍ദ്ദേശങ്ങളുമായി അദ്ദേഹം മടങ്ങി. മധ്യപൂര്‍വ്വദേശത്ത്‌ പെട്ടെന്നുണ്ടായ പ്രതിസന്ധികള്‍ മൂലം ആറുമാസം കഴിഞ്ഞാണ്‌ അദ്ദേഹത്തിന്‌ കെയ്‌റോയില്‍ തിരിച്ചെത്താന്‍ കഴിഞ്ഞത്‌. ഈ കാലയളവില്‍ അന്ത്യോഖ്യാ മലങ്കരബന്ധം വീണ്ടും വഷളാവുകയും പുതിയ മെത്രാന്മാരെ ഭരണഘടനാവിരുദ്ധമായി പാത്രിയര്‍ക്കീസ്‌ ബാവാ വാഴിക്കുകയും ചെയ്‌തു. ഇതോടെ സഭ വീണ്ടും രണ്ടായി പിളര്‍ന്നു.
ഇതില്‍ യാക്കൂബ്‌ തൃതീയന്‍ ബാവാ ദുഃഖിതനായിരുന്നു. 1958-ല്‍ കാതോലിക്കേറ്റിനെ നിരുപാധികം സ്വീകരിക്കാന്‍ അദ്ദേഹത്തിന്‌ പ്രേരണ നല്‍കിയത്‌ വട്ടശ്ശേരില്‍ തിരുമേനിയുടെ മുടക്ക്‌ നീതിയായിരുന്നില്ല എന്ന ബോധ്യത്തിലായിരുന്നു. അതുപോലെ 203-ആം നമ്പര്‍ കല്‌പന തിരുത്താനുള്ള ശ്രമം നിഷ്‌ഫലമാവുകയും ചെയ്‌തു. അതിന്റെ പിശക്‌ പരിഹരിക്കുവാനായി മാര്‍ തോമാശ്ലീഹായുടെ പേര്‌ നാലാം തുബ്‌ദേനില്‍ ചേര്‍ത്ത്‌ പരിഹാരക്രിയ നടത്തുകയാണ്‌ അദ്ദേഹം ചെയ്‌തത്‌. അദ്ദേഹം എടുത്ത സാഹസികമായ തീരുമാനങ്ങള്‍ പിശകായി എന്നു തോന്നിയപ്പോള്‍ പിന്‍വലിക്കുവാനുള്ള സല്‍ബുദ്ധി ആ പിതാവിനുണ്ടായിരുന്നു.

ഉറച്ച വ്യക്തിത്വമില്ലാത്ത സഖാ പ്രഥമന്‍ ബാവാ നല്ല മനുഷ്യനാണ്‌. എന്നാല്‍ ധീരമായ തീരുമാനങ്ങള്‍ എടുക്കുന്നതിന്‌ അപ്രാപ്‌തനായിട്ടാണ്‌ എന്നും കണ്ടിട്ടുള്ളത്‌. നല്ല ഭക്ഷണം കഴിച്ച്‌ സുഖജീവിതം നയിക്കുന്ന അ ദ്ദേഹത്തിന്‌ മലങ്കരസഭയുടെ ഐക്യത്തിന്‌ നിര്‍ണ്ണായക ഘട്ടങ്ങളില്‍ തീരുമാനങ്ങള്‍ എടുക്കാന്‍ സാധിക്കാതെ പോയതാണ്‌ 1995 ലെ സുപ്രീം കോടതിവിധിക്കു ശേഷം ഈ സഭയെ രണ്ടാക്കി നിര്‍ത്തിയത്‌. അദ്ദേഹത്തെ അടുത്ത്‌ പരിചയമുള്ള ഒരു ഗ്രീക്ക്‌ ഓര്‍ത്തഡോക്‌സ്‌ പ്രൊഫസറെ ഡബ്ലിയു.സി.സി.യുടെ ഒരു സമ്മേളനത്തില്‍ വച്ച്‌ ഞാന്‍ പരിചയപ്പെടാനിടയായി. അദ്ദേഹം എന്നോട്‌ പറഞ്ഞത്‌, “നിങ്ങളുടെ പാത്രിയര്‍ക്കീസ്‌ സഖാ എന്റെയൊരു സുഹൃത്താണ്‌. അ ദ്ദേഹം പറയുന്നത്‌, ‘എനിക്ക്‌ ഇന്ത്യയില്‍ കുറെ ഭ്രാന്തുപിടിച്ച വിശ്വാസികളുണ്ട്‌. ഒരു കാരണവുമില്ലാതെ തമ്മിലടിയാണ്‌!’എന്നാണ്‌.” സ്വന്തം ഭരണത്തിലിരിക്കുന്ന സഭയെ വേണ്ടവിധത്തില്‍ നയിക്കാനാവാതെ സഭാം ഗങ്ങള്‍ക്ക്‌ ഭ്രാന്തെന്നു വിശേഷിപ്പിക്കുന്ന പാത്രിയര്‍ക്കീസിനെപ്പറ്റി എന്തു പറയാന്‍! ഞാന്‍ പട്ടമേറ്റകാലത്ത്‌ ശ്രേഷ്‌ഠ പൗലോസ്‌ ദ്വിതീയന്‍ ബാവായോട്‌ ‘സഭാപ്രശ്‌നം പരിഹരിക്കാന്‍ പാത്രിയര്‍ക്കീസ്‌ ബാവാ സഹകരിക്കുകയില്ലേ’ എന്ന്‌ ചോദിച്ചു. ബാവയുടെ പ്രതികരണം “സഖാ പ്രഥമനോ! അദ്ദേഹം ഒരു ശുദ്ധ വ ക്കുണ്ണനാണ്‌.” ആ വിശേഷണത്തിന്റെ അര്‍ത്ഥം എനിക്കു മനസ്സിലായില്ല. എന്തെന്ന്‌ ചോദിച്ചറിയാന്‍ ഞാന്‍ ശ്രമിച്ചുമില്ല. ഏതായാലും പ്രതീക്ഷവയ്‌ക്കേണ്ട വ്യക്തിത്വമല്ല അദ്ദേഹത്തിന്റേത്‌ എന്നാണ്‌ ശ്രേഷ്‌ഠ ബാവാ സൂചിപ്പിച്ചത്‌.


ഏതായാലും കാര്യങ്ങള്‍ അവ്യക്തമായി മുമ്പോട്ടു പൊയ്‌ക്കൊണ്ടിരുന്നു. ആയിടെ ആലപ്പോയിലെ യൂഹാനോന്‍ മാര്‍ ഗ്രീഗോറിയോസ്‌ മെത്രാപ്പോലീത്ത കാര്യങ്ങള്‍ മനസ്സിലാക്കുവാനായി കേരളത്തിലെത്തി. അദ്ദേ ഹം പാത്രിയര്‍ക്കീസ്‌ കക്ഷിക്കാര്‍ക്ക്‌ അത്ര അഭിമതന്‍ അല്ലാതിരുന്നതിനാല്‍ നേതൃത്വത്തില്‍ ആരുംതന്നെ അദ്ദേഹത്തെ സ്വീകരിക്കാന്‍ വിമാനത്താവളത്തില്‍ എത്തിയിരുന്നില്ല. എന്നെ കണ്ട്‌ അദ്ദേഹം എന്റെ കൂടെപോന്നു. കാര്യങ്ങള്‍ സംസാരിച്ച്‌ എന്നോടൊപ്പം ദേവലോകത്തെത്തി പരി. കാതോലിക്കാ ബാവയുമായി സമാധാനകാര്യം ചര്‍ച്ച ചെയ്യുവാന്‍ അദ്ദേഹം സന്നദ്ധനായിരുന്നു. ഇതിനിടെ ഞാന്‍ അദ്ദേഹത്തെ എയര്‍ പോര്‍ട്ടില്‍ നിന്ന്‌ ‘ഹൈജാക്ക്‌ ചെയ്‌തു’ എന്ന വാര്‍ത്ത ഏറെ സെന്‍സേഷന്‍ സൃഷ്‌ടിച്ചതിനാല്‍ വിവരം പറഞ്ഞ്‌ ഞാന്‍ അദ്ദേഹത്തെ പുത്തന്‍കുരിശിലിറക്കിവിട്ടു. സഭാ കാര്യത്തില്‍ എന്തെങ്കിലും ചെയ്യാനാവുന്നത്‌ ചെയ്യുക എന്ന്‌ ആശംസിച്ചാണ്‌ ഞാന്‍ സ്ഥലം വിട്ടത്‌. അദ്ദേഹത്തിന്‌ തുടര്‍ന്ന്‌ എന്തുസംഭവിച്ചു എന്നറിയില്ല. പിന്നീട്‌ അദ്ദേഹം എന്നോട്‌ ബന്ധപ്പെട്ടില്ല.

ഞാന്‍ സഭാഭരണഘടന സ്വീകരിച്ചതോടെ കടമറ്റം പള്ളിയിലെ പാത്രിയര്‍ക്കീസ്‌ വിഭാഗം സഭൈക്യത്തിന്‌ തയ്യാറായി രംഗത്തുവന്നു. ഐക്യപ്രക്രിയ ആരംഭിച്ചതറിഞ്ഞ്‌ പാത്രിയര്‍ക്കീസ്‌ കക്ഷിനേതൃത്വം അതിന്‌ തടയിടാന്‍ ശക്തിയായി ശ്രമിച്ചു. എങ്കിലും സാധിച്ചില്ല. ഭിന്നിച്ചിരുന്ന കോലഞ്ചേരി പള്ളി, പുതുവേലിപ്പള്ളി, മാമലശ്ശേരി പള്ളി എന്നിവിടങ്ങളിലെല്ലാം സഭൈക്യത്തിന്റെ സന്ദേശം ആവേശപൂര്‍വ്വം ജനങ്ങള്‍ ഉള്‍ക്കൊണ്ടു. യോജിപ്പിന്‌ എതിര്‍പ്പുകളും പ്രതിസന്ധികളും ഉണ്ടായിക്കൊണ്ടിരുന്നെങ്കിലും ശുഭാപ്‌തിവിശ്വാസത്തോടെ ഇടവകക്കാര്‍ ശ്രമം തുടര്‍ന്നു.

സഭൈക്യം എന്റെ ശുശ്രൂഷയുടെ ഭാഗമായി ഞാന്‍ തിരിച്ചറിഞ്ഞ കാര്യമാണ്‌. ഐക്യമാര്‍ഗ്ഗത്തില്‍ നിന്ന്‌ പിന്തിരിപ്പിക്കാനുള്ള പ്രലോഭനങ്ങളെ അതിജീവിക്കാന്‍ ഞാന്‍ കിണഞ്ഞു പരിശ്രമിച്ചുകൊണ്ടിരുന്നു. പില്‌ക്കാലത്തെ പഠനങ്ങളും അനുഭവങ്ങളും അടിസ്ഥാനമാക്കി എടുത്ത തീരുമാനം പുനഃപരിശോധിക്കാന്‍ ഞാന്‍ തുനിഞ്ഞില്ല. ഭൂതകാലത്തെ പഠനങ്ങളില്‍ നിന്നാണ്‌ മുന്നോട്ടു പോകേണ്ടതെന്ന്‌ എനിക്ക്‌ വ്യക്തമായിക്കൊണ്ടിരുന്നു. തിരിച്ചറിവിനോടുള്ള പ്രതിബദ്ധതയില്‍ ജീവിതത്തില്‍ ഏതുകാലത്തും തിരുത്തലുകള്‍ക്ക്‌ മനുഷ്യനും സമൂഹവും തയ്യാറായാല്‍ മാത്രമേ വളര്‍ച്ചയുണ്ടാകൂ.
ഇടുങ്ങിയ വഴികളിലൂടെയുള്ള യാത്ര ഒരിക്കലും എന്നെ തളര്‍ത്തിയിട്ടില്ല. എന്നെ വഴിനടത്തിയ ദൈവത്തോട്‌ നന്ദി പറയുവാന്‍ മാത്രമേ എനിക്കുള്ളൂ. ‘ദൈവം എന്തിനാണ്‌ ഇത്രമാത്രം എന്നെ സ്‌നേഹിക്കുന്നത്‌’ എന്നത്‌ എനിക്കൊരു സമസ്യയാണ്‌. വ്യക്തിപരമായി ഏറെ കുറവുകളും ജീവിതത്തില്‍ അതിലേറെ താളപ്പിഴകളും ഉണ്ടായ എന്നെ ദൈവം ലോപം കൂടാതെ അനുഗ്രഹിച്ചു എന്നത്‌ സത്യമാണ്‌. കൂടെ നടന്ന പലരും മുമ്പില്‍ കണ്ട രാജപാതകളില്‍ പ്രലോഭിതരായി വിടപറഞ്ഞപ്പോഴും നേര്‍വഴിയില്‍ എന്നെ നയിച്ച, എന്നെ കരുതുന്ന ദൈവം തന്നെ അന്നും ഇന്നും എന്റെ സങ്കേതമാണ്‌.
ഭാവിയുടെ വെല്ലുവിളികളും സഭയുടെ ആവശ്യങ്ങളും അറിഞ്ഞ്‌ പ്രവര്‍ത്തിക്കുന്നതു വഴിയാണ്‌ അര്‍ത്ഥവത്തായ സഭാസേവനം നിര്‍വ്വഹിക്കാന്‍ സാധിക്കുക. അതിനുള്ള ദൈവകൃപ സഭയ്‌ക്ക്‌ എന്നും ലഭിക്കട്ടെ.

(തുടരും).
ഡയോസിസൻ ബുള്ളറ്റിൻ 2010 ഡിസംബർ

മെത്രാപ്പോലീത്തായുടെ കത്ത്‌


ക്രിസ്തുമസ് സാമൂഹിക ഇടപെടലുകള്‍‍ക്കു് പ്രേരണ നല്കുന്നു

ദൈവപുത്രന്‍ മനുഷ്യനായി ഈ ലോകത്ത്‌ പിറന്നതിന്റെ സ്‌മരണദിനമാണല്ലോ ക്രിസ്‌തുമസ്‌. ആ മഹാദിവസം ആഘോഷിക്കുന്നതിന്‌ നാം ഒരിക്കല്‍ക്കൂടി ഒരുങ്ങുകയാണ്‌. ക്രിസ്‌മസ്‌ ആഘോഷം ഉണര്‍ത്തുന്ന പൂര്‍വ്വകാല സ്‌മരണകള്‍ക്കും ഈ പെരുന്നാള്‍ സൃഷ്‌ടിക്കുന്ന വിവിധ വികാരതരംഗങ്ങള്‍ക്കും വര്‍ണ്ണശബളമായ അലങ്കാരങ്ങള്‍ക്കും ദീപക്കാഴ്‌ചകള്‍ ഒരുക്കുന്ന മായാപ്രപഞ്ചത്തിനും ഉപരിയായി ദൈവത്തിന്റെ നിത്യസാന്നിധ്യം സൃഷ്‌ടിയില്‍ ലബ്‌ധമാക്കിയ ഈ സംഭവം ജനങ്ങള്‍ക്ക്‌ നല്‍കുന്ന ആഹ്ലാദം അപാരമാണ്‌. യേശുവിന്റെ ജനനം വഴി ദൈവം മനുഷ്യനോട്‌ ചേര്‍ന്ന്‌ ഈ ഭൂമിയില്‍ വസിച്ച്‌ മനുഷ്യന്‌ ദൈവീകജീവിതത്തില്‍ പങ്കാളിത്ത സാധ്യത ഉറപ്പാക്കുകയായിരുന്നു. സത്യത്തില്‍ ദൈവവും മനുഷ്യനും യേശുവില്‍ ഏകമായിത്തീര്‍ന്നപ്പോള്‍ ഒരു പുതിയ വംശമാണ്‌ രൂപം കൊണ്ടത്‌. അതുവഴി മനുഷ്യന്റെ വിധിയും ലക്ഷ്യവും യേശുവില്‍ പ്രകടമാവുകയായിരുന്നു.


ക്രിസ്‌മസ്‌ നല്‍കുന്ന ആഹ്ലാദത്തിനാധാരം പുതിയ മനുഷ്യ-ദൈവ ബന്ധത്തിന്‌ ആരംഭം കുറിച്ചതും മനുഷ്യന്റെ ഭാവിരൂപം വ്യക്തമായതും മാത്രമല്ല. ഈ ജനനം മനുഷ്യരക്ഷയുടെ സൂചകം കൂടിയാണ്‌. ദൈവപുത്രന്‍ മനുഷ്യനായിത്തീര്‍ന്നപ്പോള്‍ ആദാമില്‍ നിന്ന്‌ പൈതൃകമായി ലഭിച്ച പാപത്തിനും ജീര്‍ണ്ണതയ്‌ക്കും വിധേയമായിരുന്ന സ്വത്വം യേശുവില്‍ പുനഃസൃഷ്‌ടിക്കപ്പെട്ടു. വീണ്ടെടുക്കപ്പെട്ട പുതിയ മനുഷ്യത്വം നിലവില്‍ വരുകയായിരുന്നു. അതുകൊണ്ട്‌ ക്രിസ്‌തു രണ്ടാം ആദാമായി രക്ഷിക്കപ്പെട്ട പുതിയ വംശത്തിന്‌ മാതൃകയും പ്രാരംഭവും ആയിത്തീര്‍ന്നു. ആദാം പഴയ മനുഷ്യന്റെ ഉത്ഭവകേന്ദ്രമായിരുന്നതു പോലെ യേശുക്കുഞ്ഞില്‍ പുതിയ മനുഷ്യന്റെ ഉല്‌പത്തി കുറിച്ചു. പഴയ മനുഷ്യന്‍ നവീകരിക്കപ്പെട്ട്‌ രക്ഷിതനായി പുതിയ അസ്‌തിത്വം ആര്‍ജ്ജിച്ച ദിവസമാണ്‌ ക്രിസ്‌മസ്‌. ഈ നവ മനുഷ്യത്വത്തിന്റെ സ്വഭാവമാണ്‌ യോഹന്നാന്‍ തന്റെ സുവിശേഷത്തിന്റെ ആമുഖത്തില്‍ വര്‍ണ്ണിക്കുന്നത്‌. “അവര്‍ രക്തത്തില്‍ നിന്നല്ല, ജഡത്തിന്റെ ഇഷ്‌ടത്താലുമല്ല, പുരുഷന്റെ ഇച്ഛാനുസരണവുമല്ല, ദൈവത്തില്‍ നിന്നാകുന്നു ജനിച്ചത്‌ു്” (യോഹന്നാന്‍ 1:13).

അടിസ്ഥാന പ്രത്യേകതകള്‍ ഉ ള്ള പുതിയ മനുഷ്യവംശത്തിന്‌ പ്രാരംഭം കുറിച്ചുകൊണ്ട്‌ യേശു ജനിച്ചത്‌ മറിയാമില്‍ നിന്നായിരുന്നു. ഈ പുതിയ മനുഷ്യത്വത്തിന്റെ സവിശേഷത മറിയാമില്‍ത്തന്നെ സൂചിതമായി. ദൈവേഷ്‌ടത്തിന്‌ സ്വന്തം ജീവിതത്തില്‍ പ്രഥമ പരിഗണന നല്‍കി ചരിത്രമദ്ധ്യത്തില്‍ ദൈവതീരുമാനം അം ഗീകരിച്ച്‌, “നിന്റെ വചനപ്രകാരം എനിക്ക്‌ ഭവിക്കട്ടെ. ഞാന്‍ കര്‍ത്താവിന്റെ ദാസി” എന്ന്‌ പറയുവാന്‍ മറിയം കരുത്തുകാട്ടി. സ്വന്തം ഇഷ്‌ടത്തിനും ആസക്തികള്‍ക്കും വശംവദമായ മനുഷ്യസമൂഹത്തില്‍ ദൈ വേഷ്‌ടം നിര്‍വ്വഹിക്കപ്പെടട്ടെ എന്ന്‌ ആരോടും ആലോചിക്കാതെ പ്രഖ്യാപിച്ച മറിയാമിന്റെ ഉറച്ച തീരുമാനവും അര്‍പ്പണവുമാണ്‌ ദൈവത്തെ ഭൂമിയില്‍ ഇറക്കി പുതിയ മനുഷ്യവംശത്തിന്‌ മാതൃക കുറിച്ചത്‌. ഹവ്വായില്‍ കണ്ട സ്വാര്‍ത്ഥത ലക്ഷ്യമാക്കിയ പഴയ മനുഷ്യത്വത്തിന്‌ എതിര്‍ മാതൃകയാണ്‌ ദൈവഹിതം എത്ര ദുസ്സഹമാണെങ്കിലും ഏറ്റെടുക്കാനുള്ള ദൈവീക നിശ്ചയത്തോടുള്ള വിധേയത്വവും ഏറ്റു പറയാനുള്ള ധൈര്യവും. മറിയാം പ്രകടമാക്കിയ ദൈവീക അനുസരണവും സമര്‍പ്പണവുമാണ്‌ ദൈവപദ്ധതി പ്രകാരമുള്ള പുത്രന്‍ തമ്പുരാന്റെ ജനനത്തില്‍ മൂര്‍ത്തരൂപം പൂണ്ടത്‌.

യേശുവിന്റെ ജനനം രക്ഷാസംഭവം എന്ന നിലയില്‍ നാം മനസ്സിലാക്കുമ്പോള്‍ അത്‌ സാര്‍വ്വത്രികമായ ലോക ക്രമത്തിന്റെ തന്നെ വീണ്ടെടുപ്പായി കണ്ടെത്താവുന്നതാണ്‌. സാമ്പത്തീക-രാഷ്‌ട്രീയ-ധാര്‍മ്മിക രംഗങ്ങളിലെല്ലാം ഇതൊരു പുനഃക്രമീകരണത്തിന്‌ പ്രേരണ നല്‍കിയതായിട്ടാണ്‌ ആദിമസഭ ഈ ജനനത്തെ മനസ്സിലാക്കിയത്‌. അതായത്‌ യേശുവിന്റെ ജനനത്തിലൂടെ വെളിപ്പെട്ട രക്ഷയുടെ സമഗ്ര സ്വഭാവം സ്‌പഷ്‌ടമാക്കുന്നതാണ്‌ ഈ തിരുപ്പിറവിയുടെ വിവരണങ്ങള്‍. ‘മറിയാമിന്റെ പാട്ട്‌?’ എന്ന കാവ്യാത്മകമായ സുവിശേഷ ഭാഗ ത്ത്‌ (ലൂക്കോസ്‌ 1:46-55) ഈ വീ ക്ഷണം വ്യക്തമായി പ്രതിഫലിക്കുന്നു. അവന്‍ (കര്‍ത്താവ്‌) തന്റെ ഭുജം കൊണ്ട്‌ അത്ഭുതം പ്രവര്‍ത്തിച്ചു. ഹൃദയവിചാരത്തില്‍ അഹങ്കാരികളെ അവന്‍ ചിതറിച്ചിരിക്കുന്നു.

അവന്‍ പ്രഭുക്കന്മാരെ സിംഹാസനങ്ങളില്‍ നിന്ന്‌ ഇറക്കി താഴ്‌ന്നവരെ ഉയര്‍ത്തിയിരിക്കുന്നു.

അവന്‍ വിശന്നിരിക്കുന്നവരെ മൃഷ്‌ടാന്നഭോജനം കൊണ്ട്‌ തൃപ്‌തരാ ക്കി സമ്പന്നന്മരെ വെറുംകയ്യോടെ അയച്ചുകളഞ്ഞിരിക്കുന്നു (52, 53).

ക്രിസ്‌തുവിന്റെ ജനനം മൂലം സമൂഹത്തില്‍ സംഭവിക്കുവാന്‍ പോകുന്ന മൗലീക പരിവര്‍ത്തനങ്ങളാണ്‌ ഇവിടത്തെ പ്രമേയം. യേശുവിന്റെ ജനനം സമസ്‌ത തലങ്ങളിലും പ്രത്യാഘാതങ്ങള്‍ സൃഷ്‌ടിക്കുന്ന ഒന്നായിട്ടാണ്‌ മറിയാം മനസ്സിലാക്കുന്നത്‌. ഈ സംഭവം വെറുമൊരു സ്വകാര്യ-ആത്മീക മതാനുഭവമായിട്ടല്ല കു ഞ്ഞിന്റെ അമ്മ കാണുന്നത്‌. മറിച്ച്‌ വിപ്ലവകരമായ തകിടം മറിച്ചിലുകളും പരിവര്‍ത്തനങ്ങളും സൃഷ്‌ടിക്കുന്ന ഒരു അപൂര്‍വ്വ സംഭവമായിട്ടത്രേ. ഒരു ശിശുവിന്റെ നിസ്സാരവും സാധാരണമെന്ന്‌ തോന്നാവുന്ന ജനനത്തില്‍ ദൈവത്തിന്റെ അതിശക്തമായ ഇടപെടല്‍ സാധ്യതയാണ്‌ ഇവിടെ തെളിയുന്നത്‌. അഹങ്കാരികള്‍ ചിതറുകയും അധികാരികള്‍ നിഷ്‌കാസിതരാവുകയും ചെയ്യുക എന്നത്‌ നീതിനിഷ്‌ഠമായ ഒരു സമൂഹത്തിന്റെ രൂപപ്പെടലിന്റെ നാന്ദിയാണ്‌. ആ സംവിധാനത്തില്‍ ദരിദ്രരും, നിന്ദിതരും, പീഡിതരുമെല്ലാം സംരക്ഷിക്കപ്പെടും. നീതിനിഷ്‌ഠമായ ഒരു ലോകക്രമത്തിന്‌ യേശുവിന്റെ ജനനം തുട ക്കം കുറിക്കുമെന്നാണ്‌ മറിയാമിന്റെ പ്രഖ്യാപനം. ഇത്‌ യിസ്രായേലിന്‌ ആ ശ്വാസമാകുമത്രേ! ഇവിടെ വെറും സാ ന്ത്വനമല്ല വിവക്ഷിക്കുന്നത്‌. രക്ഷാപൂര്‍ണ്ണത ലഭ്യമാകും എന്നതാണ്‌ സൂചന. തിരസ്‌കൃതര്‍ക്കും അടിച്ചമര്‍ത്തപ്പെട്ടവര്‍ക്കും നീതി ലഭിക്കുന്ന ഒരു വ്യവസ്ഥിതി തന്റെ മകന്‍ വഴി നിലവില്‍ വരികയും യിസ്രായേല്‍ ജനം രക്ഷ പ്രാപിക്കുകയും ചെയ്യും എന്നതാണ്‌ മകനെപ്പറ്റി ആ അമ്മയുടെ സ്വപ്‌നം. യേശുവിന്റെ ജനനം സൃഷ്‌ ടിക്കുന്ന അടിസ്ഥാന പരിവര്‍ത്തനങ്ങളെക്കുറിച്ചുള്ള ആദിമസഭയുടെ പ്രതീക്ഷ മറിയാമിന്റെ ഈ പാട്ടി ലൂടെ ആവിഷ്‌കരിക്കപ്പെടുകയാണ്‌.


സാമൂഹിക-രാഷ്‌ട്രീയ- നൈതിക മണ്ഡലങ്ങളിലെ പരിവര്‍ത്തനത്തിലൂടെ രൂപം പ്രാപിക്കുന്ന ദൈവരാജ്യ ആശയം ക്രിസ്‌തുവിന്റെ സുവാര്‍ത്ത പ്രഘോഷണത്തിന്റെയും പരസ്യ ശു ശ്രൂഷയുടെയും കേന്ദ്രഘടകമായിരുന്നു. മനുഷ്യനില്‍ ദൈവീക അധിവാസം വഴി സൃഷ്‌ടിക്കപ്പെടുന്ന പുതിയ അവബോധം സമൂഹത്തിന്റെ പുനഃസൃഷ്‌ടിക്ക്‌ പ്രേരകമാകും എന്നാണ്‌ യേശുവിന്റെ മനുഷ്യാവതാരത്തിന്റെ സവിശേഷത. സമൂഹത്തിലെ സകല അനീതിയ്‌ക്കും ജീര്‍ണ്ണതയ്‌ക്കും എതിരെയുള്ള ചെറുത്തുനില്‌പ്പ്‌ വഴി നീതി സമൂഹസൃഷ്‌ടിക്ക്‌ മാതൃകയും പ്രേരണയും ആകാനുള്ള സഭയുടെ വിളിയാണ്‌ ക്രിസ്‌തുവിന്റെ ജനനത്തില്‍ അന്തര്‍ലീനമായി നാം ദര്‍ശിക്കുന്നത്‌.

ദേവാലയത്തില്‍ വച്ച്‌ ഉണ്ണിയേശുവിനെ കണ്ട വൃദ്ധനായ ശീമോന്‍ പറയുന്നു. “ഇവനെ യിസ്രായേലില്‍ അനേകരുടെ വീഴ്‌ചയ്‌ക്കും മറ്റുചിലരുടെ ഉയര്‍ച്ചയ്‌ക്കുമായി നിയോഗിച്ചിരിക്കുന്നു. ഇവന്‍ എതിര്‍ക്കപ്പെടുന്ന അടയാളവുമായിരിക്കും”(ലൂക്കോസ്‌ 2:34). ഇവിടെയും ഈ ശിശു നിര്‍വ്വഹിക്കേണ്ട സമൂഹ്യ-സാമ്പത്തിക മാറ്റത്തിന്റെ കാര്യമാണ്‌ സൂചിപ്പിക്കുന്നത്‌. യേശുവിന്റെ ജനനത്തോട്‌ ബന്ധപ്പെട്ടാണ്‌ സ്‌നാപകയോഹന്നാന്റെ ജനനവും. യോഹന്നാന്‍ ക്രിസ്‌തുവിന്റെ ശുശ്രൂഷ ലോകത്തിന്‌ പരിചയപ്പെടുത്തുവാന്‍ നിയോഗിതനാണ്‌. അതുകൊണ്ട്‌ അദ്ദേഹം ശുശ്രൂഷ നിര്‍വ്വഹിക്കുന്നത്‌ ക്രിസ്‌തുവിന്റേതിന്‌ ആമുഖമായിട്ടാണ്‌. യോഹന്നാന്റെ പ്രസംഗത്തിലൂടെനീളം പുതിയ നീതി സങ്കല്‌പത്തിന്റെയും പങ്കുവയ്‌ക്കലിന്റെ യും സന്ദേശമാണ്‌ മുഴങ്ങുന്നത്‌. ഈ സാമൂഹ്യമാറ്റത്തിന്റെ അരങ്ങേറ്റമാണ്‌ യേശുവിന്റെ ശുശ്രൂഷയിലും നാം തുടര്‍ന്നു കാണുന്നത്‌. യേശു രാഷ്‌ട്രീയ-സാമ്പത്തിക രംഗങ്ങളില്‍ നേരിട്ട്‌ ഇടപെടും എന്ന സൂചന ഇവിടെ ഇല്ല. എന്നാല്‍ തിരുപ്പിറവിയുടെ പ്രത്യാഘാതം ഈ മേഖലകളില്‍ അലയടിക്കും എന്ന്‌ വ്യക്തമാവുകയാണിവിടെ.


ലൂക്കോസിന്റെ സുവിശേഷം നാലാം അദ്ധ്യായത്തില്‍ യേശുവിന്റെ നിയോഗം സംബന്ധിച്ച ആത്മബോധമാണ്‌ യേശയ്യാവിന്റെ പുസ്‌തകത്തില്‍ നിന്നു വായിക്കാന്‍ യേശുവിന്‌ പ്രേകരമാകുന്നത്‌. യേശു വായിക്കുന്നു, “ദരിദ്രരോട്‌ സുവിശേഷം അറിയിക്കുവാന്‍ കര്‍ത്താവ്‌ എന്നെ അഭിഷേകം ചെയ്‌തിരിക്കുന്നതിനാല്‍ അവന്റെ ആത്മാവ്‌ എന്റെ മേലുണ്ട്‌. ഹൃദയം തകര്‍ന്നവരെ സൗഖ്യമാക്കുവാനും തടവുകാര്‍ക്കു മോചനവും കുരുടര്‍ക്ക്‌ കാഴ്‌ചയും പ്രഖ്യാപിക്കുവാനും പീഡിതരെ വിടുവിക്കുവാനും കര്‍ത്താവിന്റെ പ്രസാദവര്‍ഷം വിളംബരം ചെയ്യുവാനും എന്നെ അയച്ചിരിക്കുന്നു” (ലൂക്കോസ്‌ 4:18). മൗലീകമായ സാമൂഹ്യ പരിവര്‍ത്തനങ്ങള്‍ക്ക്‌ ക്രിസ്‌തുവിന്റെ ശുശ്രൂഷ തുട ക്കം കുറിക്കുമെന്നാണ്‌ ഇവിടത്തെ സൂചന. ജൂബിലി (കര്‍ത്താവിന്റെ പ്രസാദവര്‍ഷം) സംബന്ധിച്ച വേദഭാഗങ്ങളിലെയെല്ലാം പരാമര്‍ശവും അതുതന്നെ വ്യക്തമാക്കുന്നു. നീതിപൂര്‍വ്വകമായ പുനഃക്രമീകരണമാണല്ലോ യോവേല്‍ വര്‍ഷത്തില്‍ സംഭവിക്കുന്നത്‌. ഇത്‌ മ്‌ശിഹായുടെ ഭരണവുമായി അടിസ്ഥാനപരമായി ബന്ധമുള്ള ആശയമാണ്‌. യേശുവിന്റെ ദേവാലയ ശുദ്ധീകരണം അനീതിയോടും ചൂഷണത്തോടുമുള്ള ആത്മരോഷത്തിന്റെ നേര്‍ പ്രതികരണമായി കാണേണ്ടതുണ്ട്‌. ഇവയെല്ലാം ക്രിസ്‌ തുവിന്റെ ജനനത്തില്‍ ത്തന്നെ ചൂണ്ടിക്കാണിക്കപ്പെടുന്നു.


യേശുവിന്റെ ജനനവുമായി ബന്ധപ്പെട്ട്‌ നടന്നതായി പരാമര്‍ശിക്കപ്പെടുന്ന ശിശുക്കളുടെ കൂട്ടക്കൊല രാഷ്‌ട്രീയമായ ഒരു പ്രതിക്രിയാശ്രമമാണ്‌. നീതിലോകം സൃഷ്‌ടിക്കപ്പെടാന്‍ പോകുന്നു എന്നു ഭയപ്പെട്ട കിരാതനായ ഒരു ഭരണാധികാരിയുടെ, യേശുവിന്റെ ജനനത്തോടുള്ള നിഷ്‌ ഠൂര പ്രതികരണമാണിത്‌. അനീതിയുടെ മേഖലയില്‍ നീതി സമൂഹത്തിന്റെ സൃഷ്‌ടി അധമന്മാരായ ഭരണാധികാരികളില്‍ ജനിപ്പിക്കുന്ന ഭയവും അരക്ഷിതബോധവും എത്ര വലുതാണ്‌ എന്നാണ്‌ ഇവിടെ കാണുന്നത്‌. ഭൗതീക വളര്‍ച്ചയുടെ മധ്യത്തിലും അനീതിയുടെയും അടിമത്തത്തിന്റെയും സാധ്യത സംഭവ്യമെ ന്നും അതിനെതിരെയുള്ള നിരന്തര പോരാട്ടം ദൈവരാജ്യത്തിന്റെ പ്രാഥമിക നിയോഗമാണെന്നും വ്യക്തം.
അതായത്‌ വിപ്ലവകരങ്ങളായ മാറ്റങ്ങളാണ്‌ ക്രിസ്‌തുവിന്റെ ജനനവുമായി ബന്ധപ്പെട്ട്‌ പുതിയ നിയമഭാഗങ്ങളില്‍ നാം വായിക്കുന്നത്‌. അതുകൊണ്ട്‌ ജനനപ്പെരുന്നാള്‍ തിരുപ്പിറവിയുടെ ആവര്‍ത്തിത അനുഷ്‌ഠാനവും അതു നല്‍കുന്ന ആഹ്ലാദവും കൊണ്ട്‌ അവസാനിക്കുന്ന ഒന്നല്ല. നേരെ മറിച്ച്‌ നാം ജീവിക്കുന്ന അനീ തി നിറഞ്ഞ സാമൂഹ്യ-സാമ്പത്തിക-രാഷ്‌ട്രീയ ഘടനയ്‌ക്ക്‌ വെല്ലുവിളി സൃഷ്‌ടിക്കുന്ന നീതി സമൂഹത്തിന്റെ കെട്ടുപണിക്ക്‌ നിരന്തരമായ പ്രേരണ നല്‍കുന്ന അനുഭവമായി ക്രിസ്‌മസ്‌ ആഘോഷം പരിണമിക്കേണ്ടതുണ്ട്‌. നാം ജീവിക്കുന്ന സമൂഹത്തിന്‌ ഗുണകരമായ മാറ്റം വരുത്തുന്ന ക്രിസ്‌തു സാന്നിധ്യമായി നാം ഭവിക്കേണ്ടതിന്റെ ആവശ്യകത നമ്മെ അനുസ്‌മരിപ്പിക്കുന്ന സംഭവമായി പിറവിപ്പെരുന്നാള്‍ ആകേണ്ടിയിരിക്കുന്നു.


സാമൂഹ്യ-രാഷ്‌ട്രീയ മേഖലകളില്‍ സഭയുടെ സാന്നിധ്യം ഇന്ന്‌ അനുചിതമായി കാണുന്നു. സ്വന്തം കാര്യത്തിനും ലാഭത്തിനും വേണ്ടിയുള്ള ഇടപെടലുകള്‍ ആശാസ്യമല്ല. എന്നാല്‍ ധര്‍മ്മയുദ്ധം ചെയ്യേണ്ട സാഹചര്യങ്ങളില്‍ നാം മടിച്ചു പിന്മാറുകയല്ല; നമ്മുടെ ഇടപെടലുകള്‍ നീതി സമൂഹസൃഷ്‌ടി ലക്ഷ്യമാക്കി മുന്നോട്ടു പോകുവാനുള്ള കരുത്താര്‍ ജ്ജിക്കുകയാണാവശ്യം. ദൈവപുത്രന്റെ ജനനത്തിലൂടെ രൂപം പ്രാപിച്ച പുതിയ മനുഷ്യവംശം നീതി സമൂഹവും അതിന്റെ അടിസ്ഥാന സ്വഭാവം നീതിപൂര്‍വ്വകമായ ലോകക്രമത്തിനുവേണ്ടിയുള്ള നിരന്തര പോരാട്ടവുമാണെന്ന്‌ തിരിച്ചറിയേണ്ടതുണ്ട്‌. അ പ്രധാന വിഷയങ്ങളെ പ്രതി ഭിന്നിച്ചു നില്‍ക്കുന്ന സഭാംഗങ്ങള്‍ക്കും കലാപത്തിന്‌ നേതൃത്വം നല്‍കുന്നവര്‍ക്കും ഈ അടിസ്ഥാന വസ്‌തുത തിരിച്ചറിയാന്‍ ദൈവം വിവേകം നല്‍കട്ടെ എന്ന്‌ പ്രാര്‍ത്ഥിക്കുന്നു. സ്വര്‍ഗ്ഗീയ മഹത്വവും സൗഭാഗ്യങ്ങളും വിട്ട്‌ മനുഷ്യനായി പിറന്ന ദൈവപുത്രന്‌ നീതിനിയോഗങ്ങളെപ്പറ്റി വ്യത്യസ്‌ത കാഴ്‌ ചപ്പാടാണ്‌ ഉള്ളതെന്ന്‌ മനസ്സിലാക്കുവാന്‍ കാലമെത്ര വേണ്ടിവരുമെന്നറിയില്ല. ഈ വര്‍ഷത്തെ ജനനപ്പെരുന്നാളില്‍ പുല്‍ക്കൂട്ടിലെ ശിശു നമുക്ക്‌ പ്രബുദ്ധ ചിന്തകള്‍ സമ്മാനിക്കട്ടെ എന്ന്‌ ആശംസിക്കുന്നു.
എല്ലാവര്‍ക്കും അനുഗൃഹീതമായ ക്രിസ്‌മസും സന്തോഷപ്രദമായ പുതുവത്സരവും നേര്‍ന്നുകൊണ്ട്‌
സസ്‌നേഹം,
നിങ്ങളുടെ
അത്താനാസ്യോസ്‌ തോമസ്‌
മെത്രാപ്പോലീത്ത.

ഡയോസിസൻ ബുള്ളറ്റിൻ 2010 ഡിസംബർ

കൂട്ടുമോ കുറയ്ക്കുമോ?

കണ്ടനാട് ഡയോസിസന്‍ ബുള്ളറ്റിന്‍ ഡിസംബര്‍‍ ലക്കം മുഖപ്രസംഗം

‘സഭാതര്‍ക്കം:മധ്യസ്ഥ പരിഹാര സാധ്യത തേടണമെന്ന്‌ ഹൈക്കോടതി’ 2010 നവംബര്‍ 25-ആം തീയതിയിലെ മലയാള മനോരമ ദിനപത്രത്തില്‍ വന്ന ഒരു വലിയ തലക്കെട്ടാണ്‌ ഇത്‌. കണ്ടനാട്‌ ഭദ്രാസനത്തില്‍ പ്പെട്ട ഓണക്കൂര്‍ സെഹിയോന്‍ പള്ളി സംബന്ധിച്ച ഒരു പരാതി പരിഗണിക്കുമ്പോഴാണ്‌ ജസ്റ്റിസ്‌മാരായ തോട്ടത്തില്‍ രാധാകൃഷ്‌ണന്‍, പി. ഭവദാസന്‍ എന്നിവര്‍ ഈ നിര്‍ദ്ദേശം നല്‍കിയത്‌. മദ്ധ്യസ്ഥതയിലൂടെ സഭാതര്‍ക്കം അവസാനിപ്പിക്കുന്നതിനുള്ള സാധ്യത ഇരുപക്ഷം അഭിഭാഷകരും കക്ഷികളുമായി ചര്‍ച്ച ചെയ്‌ത്‌ രണ്ടാഴ്‌ചയ്‌ ക്കകം കോടതിയെ അറിയിക്കുവാനാണ്‌ ആവശ്യപ്പെട്ടിരിക്കുന്നത്‌. ഒന്നായിപ്പോകാന്‍ സാധിക്കാത്തപക്ഷം രമ്യതയില്‍ കണക്കുകള്‍ തീര്‍ത്തു പിരിയാനുള്ള സാധ്യ തയും ആരായേണ്ടതാണെന്ന്‌ കോടതി അഭിപ്രായപ്പെട്ടു.

ഇത്തരം ഒരു നിര്‍ദ്ദേശം നല്‍കാന്‍ ബഹു: കോടതിയെ പ്രേരിപ്പിച്ചത്‌ രണ്ടു വസ്‌തുതകളാണുപോലും! (1) മലങ്കരസഭാതര്‍ക്കം ഒരു നൂറ്റാണ്ടിലധികമായി കോടതിയില്‍ അനന്തമായി നീളുന്നു. (2) ഇതു സംബന്ധിച്ച കേസുകളുടെ എണ്ണം നിയന്ത്രണാതീതമായി വര്‍ദ്ധിച്ചു വരുന്നു.


സഭാകേസ്‌ മാത്രമല്ല ഏതൊരു തര്‍ക്കവും-വ്യക്തികള്‍ തമ്മിലുള്ളതായാലും സമൂഹങ്ങള്‍ തമ്മിലുള്ളതായാലും-പരസ്‌പരം ഒത്തുതീര്‍പ്പാകുന്നതാണ്‌ ഏറ്റവും നല്ല പരിഹാരമാര്‍ഗ്ഗം എന്നത്‌ എല്ലാവര്‍ക്കും അറിവുള്ള കാര്യമാണ്‌. അതിനാണ്‌ സധാരണഗതിയില്‍ ആളുകള്‍ ശ്രമിക്കാറുള്ളതും. ഇക്കാര്യം മലങ്കരസഭയി ലെ ഇരു കക്ഷികളുടെയും നേതൃത്വത്തിന്‌ അറിയാത്ത കാര്യമല്ല. ഒരു സ്വതന്ത്ര പരമാധികാര റിപ്പബ്ലിക്കായ ഇന്‍ഡ്യയുടെ ജുഡീഷ്യറി തീര്‍പ്പുകല്‌പിച്ച ശേഷവും വിധിയില്‍ പഴുതുകള്‍ തേടുന്ന വിഭാഗത്തെ പ്രത്യേക അധികാരങ്ങളൊന്നുമില്ലാത്ത മധ്യസ്ഥര്‍ക്ക്‌ എങ്ങനെ സ്വാധീനിക്കുവാനും അനുസരിപ്പിക്കുവാനും കഴിയും എന്നതാണ്‌ പ്രശ്‌നം. ഒത്തുതീര്‍പ്പു വ്യവസ്ഥകള്‍ തങ്ങള്‍ക്കനുകൂലമല്ലെങ്കില്‍ അവര്‍ ഇടയും. ഇന്‍ഡ്യയുടെ പരമോന്നത കോടതിയില്‍ രണ്ടാം പ്രാവശ്യവും അനുകൂലമല്ലാത്ത വിധിയുണ്ടായിക്കഴിഞ്ഞപ്പോഴാണ്‌ (1995 ല്‍) മേല്‍പ്പറ ഞ്ഞ വിഭാഗത്തിന്‌ ‘സഭാതര്‍ക്കം കോടതിക്കു വെളിയില്‍ വച്ചു തീര്‍ക്കണം’ എന്ന ആവശ്യം കലശലായി അനുഭവപ്പെടാനും അതിനുവേണ്ടി മുറവിളി കൂട്ടാനും തോന്നിയത്‌. വേണമെങ്കില്‍ കേസുകള്‍ ഇനിയും നൂറ്റാണ്ടുകള്‍ വലിച്ചുനീട്ടാന്‍ സാധിക്കുമെന്ന്‌ ആ കക്ഷിയുടെ നേതാവിന്റെ പ്രഖ്യാപനം ഇതിനോടു ചേര്‍ത്ത്‌ വായിക്കേണ്ടതാണ്‌. കോടതിക്കുവെളിയില്‍ വച്ചു തീര്‍ക്കണമെന്ന്‌ പറഞ്ഞാല്‍ ഗുണ്ടായിസം വഴി അവസാനിപ്പി ക്കണം എന്നാണ്‌ അവര്‍ അര്‍ത്ഥമാക്കുന്നത്‌. ഇത്‌ ബ: കോടതി ഒഴികെ എല്ലാവര്‍ക്കും അറിയാം. സഭ ഒന്നാണെന്നു കോടതി പറയുമ്പോള്‍ സഭ പങ്കുവച്ചു പിരിയണം എന്നാണ്‌ ഈ കക്ഷിനേതാക്കളുടെ ആവശ്യം. കോടതി നിര്‍ദ്ദേശപ്രകാരം വി. കുര്‍ബ്ബാന അര്‍പ്പിക്കാനെത്തിയ ഓര്‍ത്തഡോക്‌സ്‌ വികാരിയുടെ മേല്‍ തിളച്ച വെള്ളമൊഴിച്ചു തലതല്ലിപ്പൊളിച്ച കേസ്‌ നിലവിലുള്ള പള്ളിയാണ്‌ ഓണക്കൂര്‍ സെഹിയോന്‍. ഈ പശ്ചാത്തലത്തില്‍ ബഹു. ഹൈക്കോടതിയുടെ മേലുദ്ധരിച്ച നിര്‍ ദ്ദേശം എത്രമാത്രം പ്രായോഗികവും നിര്‍ദ്ദോഷകരവുമായി കാണാനാകും? പണ്ഡിതരായ ന്യായാധിപരുടെ ഈ വിഷയത്തിലുള്ള അറിവു കുറവെന്നോ, വശംവലിയെന്നോ വിലയിരുത്തിയാല്‍ ജുഡീഷ്യറി എന്ന സ്ഥാപനത്തിനായിരിക്കുമല്ലോ മോശം.


സഭാകേസ്‌ നീണ്ടുപോകുന്നതിനും അതില്‍ ഓരോ വിധിക്കുശേഷവും കേസുകളുടെ എണ്ണം പെരുകുന്നതിനും പരോക്ഷമായ പങ്ക്‌ കോടതിക്കുമില്ലേ? കേസുകള്‍ സമഗ്രമായി പഠിക്കുകയും പ്രതിവാദങ്ങള്‍ ഉയരാത്തവിധം പഴുതടഞ്ഞതും നിര്‍ണ്ണായകവും ബഹുവ്യാഖ്യാന സാധ്യതയില്ലാത്തതുമായ വിധി പ്രസ്‌താവിക്കുകയും ചെയ്‌താല്‍ കേസുകളുടെ നീളത്തിനും എണ്ണത്തിനും കുറവു വരുന്നതാണ്‌. 1958 ല്‍ ഉണ്ടായ വിധിയെത്തുടര്‍ന്ന്‌ സഭ യോജിച്ചതല്ലേ? ഒരുപാധിയും കൂടാതെയായിരുന്നില്ലേ യോജിപ്പ്‌? വീണ്ടും പണ്ടു പരാജയപ്പെട്ട കക്ഷിയുടെ അവശിഷ്‌ടം പിളര്‍പ്പിനു തുനിഞ്ഞ്‌ വിരുദ്ധ നടപടികള്‍ക്കും നിയമയുദ്ധത്തിനും പുറപ്പെട്ടാല്‍ അതിന്റെ ഉദ്ദേശ്യം മനസ്സിലാക്കുവാനുള്ള ബുദ്ധികൂര്‍മ്മത എല്ലാവര്‍ക്കും വേണ്ടതല്ലേ? പോകട്ടെ, വീണ്ടും മുഖ്യവിധി ഉണ്ടായിക്കഴിഞ്ഞപ്പോള്‍ ‘സഭാതര്‍ക്കപരിഹാരം കോടതിക്ക്‌ വെളിയില്‍’, ‘രമ്യമായി പങ്കിട്ടു പിരിയണം’ മുതലായ മുറവിളി ഉയര്‍ത്തുന്നത്‌ എത്ര ബാലിശവും വഞ്ചനാപരവുമാണ്‌! അതിന്റെ അനുരണനങ്ങള്‍ കോടതിയില്‍ നിന്നുമുണ്ടായാലോ? കോടതിവിധിയുടെ ആധികാരികതയിലും ബലത്തിലും പ്രായോഗികതയിലും ന്യായാധിപര്‍ തന്നെ സന്ദേഹിക്കുന്നതായല്ലേ പൊതുജനത്തിനു തോന്നുക?


കണ്ടില്ലേ, യാക്കോബായ ക്രിസ്‌ത്യാനി സഭ പ്രസ്‌തുത കോടതി നിര്‍ദ്ദേശത്തെ വിശദമായും വിസ്‌താരമായും സ്വാഗതം ചെയ്‌തത്‌. സുപ്രീംകോടതിവിധിയുടെ വെളിച്ചത്തില്‍ കീഴ്‌ക്കോടതികളില്‍ നിന്ന്‌ അനുകൂലമായ തീരുമാനം അവര്‍ക്ക്‌ പ്രതീക്ഷിക്കാനാവില്ല. നിയമനിഷേധത്തിലൂടെയും അക്രമ മാര്‍ഗ്ഗങ്ങളിലൂടെയും പിടിച്ചുനില്‍ക്കാന്‍ ശ്രമിക്കുന്ന സഭയാണത്‌. അവയ്‌ക്ക്‌ ‘വിശ്വാസസംരക്ഷണം’, ‘പ്രാര്‍ത്ഥാനായജ്ഞം’ എന്നൊക്കെയാണ്‌ ഓമനപ്പേരുനല്‍കി ജനത്തെ കബളിപ്പിക്കുന്നത്‌.

ബഹു. ഹൈക്കോടതിയുടെ വിലപ്പെട്ട ഈ നിര്‍ദ്ദേശം വളരെ വൈകിപ്പോയി എന്ന്‌ പറയാതെ വയ്യ. മുഖ്യ കേസ്‌ ഹൈക്കോടതിയുടെ പരിഗണനയ്‌ക്ക്‌ വന്നപ്പോഴെങ്കിലും ഈ നിര്‍ദ്ദേശം വച്ചിരുന്നെങ്കില്‍ മനസ്സിലാകുമായിരുന്നു. സുപ്രീംകോടതിയുടെ വിധിയും കഴിഞ്ഞ്‌ ഈ നിര്‍ദ്ദേശം വയ്‌ക്കുന്നതിന്റെ ഔചിത്യം ദുരൂഹമാണ്‌. അതുകൊണ്ടാണ്‌ മലങ്കര ഓര്‍ത്തഡോക്‌സ്‌ സഭാനേതൃത്വം സുപ്രീംകോടതിവിധിയുടെയും സഭാഭരണഘടനയുടെയും അടിസ്ഥാനത്തില്‍ ഏത്‌ ഒത്തുതീര്‍പ്പ്‌ വ്യവസ്ഥകള്‍ക്കും തയ്യാറാണെന്ന്‌ വ്യക്തമാക്കിയിട്ടുള്ളത്‌. മലങ്കരസഭയുടെ പള്ളികളെല്ലാം 34-ലെ ഭരണഘടന പ്രകാരമാണ്‌ ഭരിക്കപ്പെടേണ്ടതെന്ന്‌ സുപ്രീംകോടതിവിധിയില്‍ പ്രസ്‌താവിച്ചിട്ടുണ്ട്‌. 1958 ല്‍ യോജിച്ച സഭയിലെ പള്ളികളെല്ലാം മലങ്കര ഓര്‍ത്തഡോക്‌സ്‌ സുറിയാനിസഭയുടേതാണ്‌. അവയെല്ലാം സഭാഭരണഘടനയനുസരിച്ച്‌ ഭരിക്കപ്പെട്ടിരുന്നതാണല്ലോ. പള്ളികള്‍ കൈവിട്ടു പോകാതിരിക്കാന്‍ യാക്കോബായക്കാര്‍ ഏത്‌ അടവും മാര്‍ഗ്ഗവും അവലംബിക്കും. സാധാരണ പള്ളികള്‍ പലതിനും ‘സിംഹാസനപ്പള്ളികള്‍’ എന്ന്‌ പുനര്‍ നാമകരണം ചെയ്‌തു സ്വന്തമാക്കുവാന്‍ ശ്രമിക്കുന്നത്‌ കാണാമല്ലോ.


സുപ്രീംകോടതിവിധിക്ക്‌ വിപരീതമാകരുതല്ലോ പിന്നീടുണ്ടാകുന്ന വിധികള്‍. അപ്പോള്‍ സഭാകേസുകള്‍ക്ക്‌ മദ്ധ്യസ്ഥതയിലൂടെ പരിഹാരം കാണാമെന്ന്‌ പറയുമ്പോള്‍ അത്‌ സുപ്രീംകോടതിവിധിക്കും ഭരണഘടനയ്‌ക്കും അനുസൃതമായിരിക്കണമെന്ന്‌ അനുമാനിക്കാം.


ചില ജഡ്‌ജിമാര്‍ സഭാകേസുകള്‍ കേള്‍ക്കാന്‍ വിരക്തിയും വിസമ്മതവും പ്രകടിപ്പിക്കുന്നതായി പറഞ്ഞുകേള്‍ ക്കുന്നുണ്ട്‌. ന്യായാധിപരാണെങ്കിലും കേസുകള്‍ കേള്‍ക്കുന്ന കാര്യത്തില്‍ ഒരു ‘ചോയ്‌സ്‌’ പാടുള്ളതാണോ ആവോ! മടിയന്മാരും മടയന്മാരുമായ കുട്ടികളെ പഠിപ്പിക്കുകയില്ലെന്ന്‌ ഒരദ്ധ്യാപകന്‌ പറയാനാകുമോ?

നീതിനിര്‍വ്വഹണത്തിന്റെ പ്രതീകം കണ്ണുകള്‍ മൂടിക്കെട്ടി, ഒരു കയ്യില്‍ വാളും മറുകയ്യില്‍ തുലാസുമായി നില്‍ ക്കുന്ന വ്യക്തിയുടേതാണ്‌. മുഖം നോക്കാതെ, പക്ഷപാത മോ, ചാഞ്ചാട്ടമോ കൂടാതെ, നിര്‍ഭയം സത്യസന്ധമായി വിധികല്‌പിക്കണമെന്നാണല്ലോ അതിന്റെ സൂചന.

അനുരഞ്‌ജനത്തിലൂടെ തര്‍ക്കങ്ങള്‍ക്ക്‌ പരിഹാരം കാണുക എന്ന കേവലവും ശുദ്ധവുമായ കാഴ്‌ചപ്പാടില്‍ ബഹു. ഹൈക്കോടതിയുടെ നിര്‍ദ്ദേശം തികച്ചും സ്വാഗതാര്‍ഹമാണ്‌. പക്ഷേ, പ്രശ്‌നപരിഹാരത്തിന്‌ എങ്ങനെയും കോടതിയെ ഒഴിവാക്കുവാന്‍ എതിര്‍ കക്ഷികളില്‍ ഒരുകൂട്ടര്‍ ശ്രമിക്കുമ്പോള്‍ ഈ നിര്‍ദ്ദേശം പ്രശ്‌നപരിഹാരത്തിന്‌ ആക്കം കൂട്ടുമോ കുറയ്‌ക്കുമോ എന്ന്‌ കണ്ടുതന്നെ അറിയേണ്ടിയിരിക്കുന്നു.

കുറിഞ്ഞി പള്ളിയില്‍‍ വി. മൂന്നിന്മേല്‍ കുര്‍ബ്ബാന അര്‍പ്പിച്ചു


കോലഞ്ചേരി: കുറിഞ്ഞി സെന്റ്‌ പീറ്റേഴ്‌സ്‌ & സെന്റ്‌ പോള്‍സ്‌ ഓര്‍ത്തഡോക്‌സ്‌ പള്ളിയിലെ പ്രധാന പെരുന്നാളിന്‌ ആരംഭം കുറിച്ച്‌ 2010 ഡിസംബര്‍‍ 8 ബുധനാഴ്‌ച അങ്കമാലി ഭദ്രാസത്തിന്റെ അഭി. യൂഹാനോന്‍ മാര്‍ പോളികാര്‍പ്പോസ്‌ മെത്രാപ്പോലീത്തായുടെ മുഖ്യകാര്‍മ്മികത്വത്തില്‍ വി. മൂന്നിന്മേല്‍ കുര്‍ബ്ബാന അര്‍പ്പിച്ചു. കൊച്ചുപറമ്പില്‍ ഗീവര്‍ഗീസ്‌ റമ്പാന്‍, ഫാ. യാക്കോബ്‌ തോമസ്‌ എന്നിവര്‍ സഹകാര്‍മ്മികരായിരുന്നു.

ബഹുമാനപ്പെട്ട ജില്ലാ കോടതിയുടെ ഉത്തരവനുസരിച്ച്‌ കഴിഞ്ഞ ഏതാനും വര്‍ഷങ്ങളായി ഓര്‍ത്തഡോക്‌സ്‌, യാ ക്കോബായ വിഭാഗങ്ങള്‍ ഒന്നിടവിട്ട്‌ ആഴ്‌ചയില്‍ പള്ളിയില്‍ ശുശ്രൂഷ നടത്തിവരികയാണ്‌. കഴിഞ്ഞ തിങ്കളാഴ്‌ച ബഹു. കേരളാ ഹൈക്കോടതിയില്‍ നിന്ന്‌ പെരുന്നാള്‍ നടത്തിപ്പിനായി പ്രത്യേക ഉത്തരവ്‌ ഓര്‍ത്തഡോക്‌സ്‌ വിഭാഗത്തിന്‌ ലഭിച്ചിരുന്നു. ഈ ഉത്തരവനുസരിച്ചാണ്‌ ഇന്നേദിവസം പെരുന്നാളിന്റെ ചടങ്ങുകള്‍ നടത്തപ്പെട്ടത്‌. പെരുന്നാളിന്റെ ചടങ്ങുകള്‍ തടസ്സപ്പെടുത്തുന്നതിനും പള്ളിയിലെ പ്രധാന പെരുന്നാള്‍ അലങ്കോലപ്പെടുത്തുന്നതിനും യാക്കോബായ വിഭാഗം നടത്തിയ നീക്കങ്ങളില്‍ പ്രതിഷേധിച്ച്‌ വി. കുര്‍ബ്ബാനാനന്തരം പള്ളിയില്‍ വച്ച്‌ പ്രതിഷേധയോഗം നടത്തി. പള്ളി വികാരി ചിറക്കടകുന്നേല്‍ ജോണ്‍ കോര്‍ എപ്പിസ്‌കോപ്പ അദ്ധ്യക്ഷത വഹിച്ചു. അഭി. യൂഹാനോന്‍ മാര്‍ പോളികാര്‍പോസ്‌ പ്രസംഗിച്ചു. ഓര്‍ത്തഡോക്‌സ്‌ സഭയ്‌ക്ക്‌ നീതിപൂര്‍വ്വം ലഭിക്കുന്ന അവകാശങ്ങള്‍ ക്കുവേണ്ടി സഭ ഒന്നടങ്കം നിലപാടെടുത്ത്‌ പ്രവര്‍ത്തിക്കുമെന്നും ഏത്‌ പ്രതിസന്ധികളെയും അതിജീവിക്കുവാന്‍ സഭ സന്നദ്ധമാണെന്നും അഭി. തിരുമേനി ഓര്‍മ്മിപ്പിച്ചു. കൊച്ചുപറമ്പില്‍ ഗീവര്‍ഗീസ്‌ റമ്പാന്‍, ഫാ. യാക്കോബ്‌ തോമസ്‌, ട്രസ്റ്റിമാരായ കെ.വി. മാത്തുക്കുട്ടി, തോമസ്‌ ജോര്‍ജ്‌ എന്നിവര്‍ പ്രസംഗിച്ചു. പെരുന്നാളിന്റെ ഭംഗിയായ നടത്തിപ്പിലേയ്‌ക്ക്‌ കമ്മിറ്റിയുടെ പ്രവര്‍ത്തനം ഊര്‍ജ്ജിതമാക്കുവാന്‍ യോഗം തീരുമാനിച്ചു.

മൂവാറ്റുപുഴ കത്തീഡ്രല്‍ പെരുന്നാള്‍

മൂവാറ്റുപുഴ: കണ്ടനാട്‌ ഭദ്രാസന ആസ്ഥാന ദേവാലയത്തില്‍ മാര്‍ തോമാശ്ലീഹായുടെ ഓര്‍മ്മപ്പെരുന്നാള്‍ 2010 ഡിസംബര്‍ 18, 19 (ശനി, ഞായര്‍) തീയതികളില്‍ അഹമ്മദാബാദ്‌ ഭദ്രാസനത്തിന്റെ പ്രഥമ മെത്രാപ്പോലീത്ത അഭി. ഡോ. ഗീവര്‍ഗീസ്‌ മാര്‍ യൂലിയോസ്‌ തിരുമേനിയുടെ പ്രധാന കാര്‍മ്മികത്വത്തില്‍ നടത്തപ്പെടുന്നു.

കണ്‌ടനാട്‌ (കിഴക്കു്) ഭദ്രാസന കൗൺസിൽ കാലാവധി നീട്ടി

കണ്ടനാട്‌ ഈസ്റ്റ്‌ ഭദ്രാസനത്തിന്റെ വാര്‍ഷിക പൊതുയോഗം 2010 നവംബര്‍ 13-ആം തീയതി ശനിയാഴ്‌ച നടന്നു
മൂവാറ്റുപുഴ, നവംബര്‍ 13 : മലങ്കര സുറിയാനി സഭയുടെ കണ്‌ടനാട്‌ (കിഴക്കു്) ഭദ്രാസന കൗൺസിലിന്റെയും തെരഞ്ഞെടുക്കപ്പെട്ട സ്ഥാനികളുടെയും പ്രവര്‍‍ത്തന കാലാവധി രണ്ടുവര്‍‍ഷത്തേയ്ക്കു് കൂടി നീട്ടി. നവംബര്‍ 13 ശനിയാഴ്ച ഉച്ചകഴിഞ്ഞു് മൂവാറ്റുപുഴ അരമനപള്ളിയില്‍ കൂടിയ ഭദ്രാസന വാര്‍ഷിക പള്ളിപ്രതിപുരുഷയോഗത്തിന്റെ തീരുമാനപ്രകാരമാണു് ഈ നടപടി. ഭദ്രാസന മെത്രാപ്പോലീത്ത ഡോ. തോമസ് മാര്‍‍ അത്താനാസിയോസ് അദ്ധ്യക്ഷനായിരുന്നു.

ഉച്ചകഴിഞ്ഞ്‌ 2 മണിക്ക്‌ ആരംഭിച്ച രജിസ്‌ട്രേഷനോടെയാണ്‌ മീറ്റിംഗ്‌ ആരംഭിച്ചത്‌. പ്രാരംഭ പ്രാര്‍ത്ഥനയ്‌ക്ക്‌ ശേഷം ഓഫീസ്‌ മാനേജര്‍ ഫാ. മേരീദാസ്‌ സ്റ്റീഫന്‍ അഭി. തിരുമേനിയുടെ നോട്ടീസ്‌ കല്‌പന വായിച്ചു. ഡീ. എബിന്‍ എബ്രാഹം പ്രാരംഭധ്യാനം നടത്തി. ഒരു വര്‍ഷത്തെ ഭദ്രാസനത്തിന്റെ പ്രവര്‍ത്തനങ്ങളെ സംക്ഷിപ്‌തമായി പ്രതിപാദിച്ചുകൊണ്ടും പുതിയ ലക്ഷ്യങ്ങളെ പരിചയപ്പെടുത്തിക്കൊണ്ടും അഭി. തിരുമേനി അദ്ധ്യക്ഷപ്രസംഗം നടത്തി.

ഭദ്രാസനത്തിന്റെ 1-4-2009 മുതല്‍ 31-3-2010 വരെയുള്ള വരവ്‌ ചെലവ്‌ കണക്കും വാര്‍ഷിക റിപ്പോര്‍ട്ടും പൊതുയോഗം പാസ്സാക്കി. പുതിയ സാമ്പത്തിക വര്‍ഷത്തേയ്‌ക്കുള്ള ബഡ്‌ജറ്റും യോഗം പാസ്സാക്കി. തുടര്‍ന്ന്‌ ഭദ്രാസന കൗണ്‍സിലിലേയ്‌ക്ക്‌ പിറവം വലിയപള്ളി ഇടവകാംഗം ശ്രീ. കെ.വി. മാത്യു കാരിത്തടത്തിനെ തിരഞ്ഞെടുത്തു. ഭദ്രാസനത്തിലെ വൈദീകരുടെ പുതിയ ശമ്പളപദ്ധതിക്ക്‌ യോ ഗം അംഗീകാരം നല്‍കി. ഭദ്രാസനത്തിലെ വിവിധ ഇടവകകളില്‍ നിന്ന്‌ തിരഞ്ഞെടുക്കപ്പെട്ടവര്‍ക്കായി ആത്മായ പരിശീലന പരിപാടി ആരംഭിക്കാനും യോഗം തീരുമാനിച്ചു. യോഗത്തിന്‌ ഭദ്രാസന സെക്രട്ടറി ഫാ. എബ്രാഹാം കാരാമ്മേല്‍ സ്വാഗതവും സഭാ വര്‍ക്കിംഗ്‌ കമ്മിറ്റിയംഗം ഫാ. ഏലിയാസ്‌ ചെറുകാട്ട്‌ നന്ദിയും പറഞ്ഞു.

ഓര്‍ത്തഡോക്‌സ്‌ സഭ കണ്‌ടനാട്‌ (കിഴക്കു്) ഭദ്രാസന പള്ളിപ്രതിപുരുഷയോഗം

മൂവാറ്റുപുഴ, നവംബര്‍ 11 : മലങ്കര സുറിയാനി സഭയുടെ കണ്‌ടനാട്‌ (കിഴക്കു്)ഭദ്രാസനത്തിന്റെ വാര്‍ഷിക പള്ളിപ്രതിപുരുഷയോഗം സഭാഭരണഘടനപ്രകാരം നവംബര്‍ 13 ശനിയാഴ്ച ഉച്ചകഴിഞ്ഞു് 2 നു് മൂവാറ്റുപുഴ അരമനപള്ളിയില്‍ ഭദ്രാസന അധിപന്‍ ഢോ തോമസ് മാര്‍‍ അത്താനാസിയോസ് മെത്രാപ്പോലീത്തയുടെ അദ്ധ്യക്ഷതയില്‍ നടക്കും.

പുതിയ കാതോലിക്കാ ബാവായില്‍ നിന്നു് സഭ വളരെ പ്രതീക്ഷിയ്ക്കുന്നു - മാര്‍ അത്തനാസിയോസ് മെത്രാപ്പോലീത്ത

.



പുതുപ്പള്ളി, നവംബര്‍ 6: പരിശുദ്ധ ബസേലിയോസ് മാര്‍ത്തോമ്മാ പൗലോസ് ദ്വിതീയന്‍ കാതോലിക്കാ ബാവായില്‍ സഭയ്ക്കു് വളരെ പ്രതീക്ഷകളുണ്ടെന്നു് കണ്ടനാടു് (കിഴക്കു്) ഭദ്രാസനാധിപന്‍ നിതാന്ത വന്ദ്യ ദിവ്യ ശ്രീ ഡോ. തോമസ് മാര്‍ അത്തനാസിയോസ് മെത്രാപ്പോലീത്ത പ്രസ്താവിച്ചു. പുതുപ്പള്ളി സെന്റ് ജോര്‍ജ് വലിയപള്ളിയുടെ നേതൃത്വത്തില്‍ പുതിയ പൗരസ്ത്യ കാതോലിക്കാ പരിശുദ്ധ ബസേലിയോസ് മാര്‍‍ത്തോമ്മാപൗലോസ് ദ്വിതീയന്‍ ബാവക്ക് നല്‍കിയ സ്വീകരണത്തില്‍ ആശംസയര്‍‍പ്പിച്ചു് സംസാരിക്കുകയായിരുന്നു അഭിവന്ദ്യ പിതാവു്.

ദിശാബോധത്തോടെയുള്ള നേതൃത്വമാണു് സഭ പുതിയ കാതോലിക്കാ ബാവയില്‍ നിന്നു് പ്രതീക്ഷിക്കുന്നതു്. വിപണിയുടെ ആധിപത്യത്തില്‍ നിന്നു് ജനത്തെ വിമോചിപ്പിച്ചു് ദൈവരാജ്യത്തിനനുസൃതമായി ലോകത്തെ പരിവര്‍‍ത്തനപ്പെടുത്തുന്നതിനുള്ള നേതൃത്വം നല്കാന്‍ സഭ ബാദ്ധ്യസ്ഥമാണു് . കാലാകാലങ്ങളിലുണ്ടാകുന്ന ചുറ്റുപാടുകളുടെ അടിസ്ഥാനത്തില്‍ വിശ്വാസ പ്രതികരണങ്ങള്‍ക്കു് വ്യതിയാനം സംഭവിക്കുന്നുണ്ടു്. കഷായത്തിന്റെ കുറിപ്പടിപോലെയുള്ള ഒന്നല്ല വിശ്വാസം.

ചുറ്റുപാടുകളോടു് ചേര്‍‍ന്നു് ഗൗരവമായിട്ടുള്ള വിശ്വാസ പ്രതികരണങ്ങള്‍‍ സഭയില്‍നിന്നുണ്ടാകുവാന്‍ പരിശുദ്ധ ബാവ നേതൃത്വം നല്കണം. പരിശുദ്ധ ബസേലിയോസ് ഗീവറുഗീസ് ദ്വിതീയന്‍ ബാവയെ അനുസ്മരിപ്പിയ്ക്കുന്ന വിധം ദീര്‍ഘകാലം സഭാഭരണം നടത്താനും ബസേലിയോസ് മാര്‍ത്തോമ്മാ പൗലോസ് ദ്വിതീയന്‍ യുഗം തന്നെ സൃഷ്ടിയ്ക്കുവാനും പുതിയ കാതോലിക്കാ ബാവയ്ക്കു് കഴിയട്ടെ എന്നു് മെത്രാപ്പോലീത്ത ആശംസിച്ചു.

മാര്‍ അപ്രേം മെത്രാപ്പോലീത്ത

ഇന്ത്യയിലെ പൗരസ്ത്യ അസ്സിറിയന്‍ സഭാധ്യക്ഷന്‍ ആര്‍‍ച്ച് ബിഷപ് മാര്‍ അപ്രേം ഉദ്ഘാടനം ചെയ്തു. സഭകള്‍ തമ്മിലുള്ള ബന്ധം വളരുന്നത് സഭക്കും സമൂഹത്തിനും നല്ലതാണെന്ന് അദ്ദേഹം ചൂണ്ടിക്കാട്ടി.
ശ്രീരാമകൃഷ്ണ മഠാധിപതി സ്വാമി ഗോലോകാനന്ദജി, പ്രതിപക്ഷ നേതാവും മുന്‍ മഖ്യമന്ത്രിയുമായ ഉമ്മന്‍ ചാണ്ടി, ഡോ. മാത്യുസ് മാര്‍ സേവേറിയോസ്, ജോസ്.കെ.മാണി എം.പി, ജില്ലാ കലക്ടര്‍ മിനി ആന്റണി, ജോസഫ് എം. പുതുശേരി എം.എല്‍.എ തുടങ്ങിയവരും ആശംസയര്‍‍പ്പിച്ച് സംസാരിച്ചു

സഭാധ്യക്ഷന്മാരുടെ കടമ അധികാരവും ശുശ്രൂഷയും സമന്വയിപ്പിയ്ക്കല്‍

പരസ്‌പര വിരുദ്ധങ്ങളായ അധികാരവും ശുശ്രൂഷയും സമന്വയിപ്പിക്കുകയാണ് സഭാധ്യക്ഷന്മാരുടെ കടമയെന്ന് പൗരസ്ത്യ കാതോലിക്കാ പരിശുദ്ധ ബസേലിയോസ് മാര്‍‍ത്തോമ്മാപൗലോസ് ദ്വിതീയന്‍ ബാവ മറുപടി പ്രസംഗത്തില്‍ പറഞ്ഞു. സമൂഹത്തില്‍ സഭ തിരുത്തല്‍ ശക്തിയായി നിലനില്‍ക്കണം. വെല്ലുവിളികളെ അതിജീവിക്കാന്‍ ജനങ്ങളുടെ പിന്തുണ ആവശ്യമാണെന്ന് അദ്ദേഹം പറഞ്ഞു.

പരിശുദ്ധ ദിദിമോസ്‌ ബാവായുടെ പിന്‍ഗാമിയായി ബസേലിയോസ് മാര്‍ത്തോമ പൗലോസ് ദ്വിതീയന്‍ അവരോധിതനായി

.

പരിമല: പരിശുദ്ധ ബസേലിയോസ്‌ മാര്‍ത്തോമ്മാ ദിദിമോസ്‌ പ്രഥമന്‍ ബാവാ സ്‌ഥാനത്യാഗം ചെയ്തതിനെ തുടര്‍‍ന്നു് ഒക്ടോബർ 30-നുചേര്‍‍ന്ന പരിശുദ്ധ എപ്പിസ്കോപ്പല്‍ സുന്നഹദോസിന്റെ തീരുമാന പ്രകാരം നവംബർ1ആം തീയതി തിങ്കളാഴ്ച രാവിലെ കുന്നംകുളം ഭദ്രാസനാധിപനായിരുന്ന നിയുക്ത കാതോലിക്ക പൗലോസ് മാര്‍ മിലിത്തിയോസിനെ ബസേലിയോസ് മാര്‍ത്തോമ പൗലോസ് ദ്വിതീയന്‍ എന്ന പേരില്‍ കിഴക്കിന്റെ കാതോലിക്കായും മലങ്കര മെത്രാപ്പോലീത്തായുമായി പരുമല പള്ളിയില്‍ വച്ചു് അവരോധിച്ചു.



തന്റെ നവതി ആഘോഷത്തിന്റെ അന്നു്, ഒക്ടോബർ 29നു് വൈകുന്നേരം പരിശുദ്ധ ബസേലിയോസ്‌ മാര്‍ത്തോമ്മാ ദിദിമോസ്‌ പ്രഥമന്‍ ബാവാ ദേവലോകത്ത് വിളിച്ചുചേര്‍‍ത്ത അസാധാരണ എപ്പിസ്കോപ്പല്‍ സുന്നഹദോസിലാണു് തന്റെ സ്‌ഥാനത്യാഗതീരുമാനം അറിയിച്ചതു്. അതിന്മേല്‍ തീരുമാനമെടുക്കുന്നതിനു് എപ്പിസ്കോപ്പല്‍ സുന്നഹദോസ് പിറ്റേന്നത്തേയ്ക്കു വച്ചു. അങ്ങനെയാണു് കിഴക്കിന്റെ കാതോലിക്കായുടെയും മലങ്കര മെത്രാപ്പോലീത്തായുടെയും സ്ഥാനത്തേയ്ക്കു് 2006-ല്‍ തെരഞ്ഞെടുത്ത പൗലോസ് മാര്‍ മിലിത്തിയോസിനെ സ്ഥാനാരോഹണം ചെയ്യിക്കുവാന്‍ എപ്പിസ്കോപ്പല്‍ സുന്നഹദോസ് നടപടിയാരംഭിച്ചതു്. സ്ഥാനത്യാഗംചെയ്ത പരിശുദ്ധ ബസേലിയോസ് മാര്‍ത്തോമ ദിദിമോസ് പ്രഥമന്‍ ബാവയുടെ മുഖ്യകാര്‍മികത്വത്തില്‍ നടന്ന പുതിയകാതോലിക്കയുടെ സ്‌ഥാനാഭിഷേക ശുശ്രൂഷയില്‍ കണ്ടനാട് (കിഴക്കു്) ഭദ്രാസനത്തിന്റെ ഡോ.തോമസ് മാർ അത്താനാസിയോസ് മെത്രാപ്പോലീത്തയടക്കം സഭയിലെ ഇരുപത്തഞ്ചോളം മേല്‍‍പട്ടക്കാര്‍ പങ്കെടുത്തു.

മലങ്കര സഭയുടെ ശ്രേഷ്‌ഠ പാരമ്പര്യത്തിന്റെ പ്രഖ്യാപനമായിരുന്നു സ്‌ഥാനാരോഹണം. രാവിലെ 6.15-ന് സ്ഥാനമൊഴിഞ്ഞ പരിശുദ്ധ ബസേലിയോസ് മാര്‍ത്തോമാ ദിദിമോസ് പ്രഥമന്‍ ബാവ, നിയുക്ത കാതോലിക്ക, മെത്രാപ്പോലീത്തമാര്‍ എന്നിവരെ പള്ളിമേടയില്‍ നിന്ന് മദ്ബഹയിലേക്ക് സ്വീകരിച്ചാനയിച്ചു. തുടര്‍ന്ന് ചെങ്ങന്നൂര്‍ ഭദ്രാസനാധിപന്‍ തോമസ് മാര്‍ അത്താനാസിയോസ് മെത്രാപ്പോലീത്തയുടെ കാര്‍മികത്വത്തില്‍ പ്രഭാത പ്രാര്‍ഥന നടന്നു.
പ്രഭാതപ്രാര്‍ഥനയ്‌ക്കു ശേഷം ദിദിമോസ്‌ ബാവാ മുഖ്യകാര്‍മികനായി കുര്‍ബാന ആരംഭിച്ചു. വിശുദ്ധകുര്‍ബാനയുടെ മധ്യേയായിരുന്നു സ്ഥാനാരോഹണച്ചടങ്ങ്. മഹാപൗരോഹിത്യത്തെക്കുറിച്ചുള്ള ഫാ. ഡോ. കെ.എം. ജോര്‍ജിന്റെ പ്രസംഗത്തിനു് ശേഷമായിരുന്നു സ്‌ഥാനാരോഹണ ശുശ്രൂഷ. ബസേലിയോസ് മാര്‍ത്തോമാ ദിദിമോസ് പ്രഥമന്‍ കാതോലിക്കാ ബാവയുടെ മുഖ്യ കാര്‍മികത്വത്തിലും മറ്റ്‌മെത്രാപ്പോലീത്തമാരുടെ സഹകാര്‍മികത്വത്തിലും സ്ഥാനാരോഹണ ശുശ്രൂഷ ആരംഭിച്ചു. സഭാസ്‌ഥാപനവും ശ്ലൈഹിക പിന്തുടര്‍ച്ചയും ഘോഷിക്കുന്ന വേദഭാഗം (ഏവന്‍ഗേലിയോന്‍) ദിദിമോസ്‌ പ്രഥമന്‍ ബാവാ വായിച്ചു.

പരി. ദിമോസ് പ്രഥമന്‍ ബാവാ നിയുക്ത കാതോലിക്കയുടെ തലയില്‍ ശോശപ്പ ധരിപ്പിച്ച് പടിഞ്ഞാറോട്ട് അഭിമുഖമായി മുട്ടുകുത്തി ആഹ്വാന പ്രഖ്യാപനം നടത്തി. 2006-ല്‍ മലങ്കര അസോസിയേഷന്‍ പൗരസ്ത്യ കാതോലിക്കായുടെ പിന്‍ഗാമിയായി തെരഞ്ഞെടുത്തിട്ടുള്ള പൗലോസ്‌ മാര്‍ മിലിത്തിയോസ്‌ മെത്രാപ്പോലീത്തയെ കാതോലിക്കായായി അഭിഷേകം ചെയ്യാന്‍ വിളിയ്ക്കുന്നതായി പരി. ദിദിമോസ്‌ പ്രഥമന്‍ ബാവ അറിയിച്ചു. തുടര്‍ന്ന്‌ മാര്‍ മിലിത്തിയോസ്‌ മെത്രാപ്പോലീത്ത സമ്മതം അറിയിച്ചു. ദിദിമോസ്‌ പ്രഥമന്‍ ബാവയുടെ കാര്‍മികത്വത്തില്‍ വിശുദ്ധ കുര്‍ബാന ആരംഭിച്ചു.

മെത്രാപ്പോലീത്തമാരായ ഗീവര്‍ഗീസ് മാര്‍ ഇവാനിയോസ്, ഗീവര്‍ഗീസ് മാര്‍ ഒസ്ത്താത്തിയോസ്, ഡോ. തോമസ് മാര്‍ അത്തനാസ്യോസ്, കുര്യാക്കോസ് മാര്‍ ക്ലിമീസ് എന്നിവര്‍ പ്രാര്‍ഥനയും വേദപുസ്തക വായനയും നടത്തി.
തോമസ് മാര്‍ അത്തനാസ്യോസ് മെത്രാപ്പോലീത്ത നിയുക്ത കാതോലിക്കയുടെ തലയില്‍ ഏവന്‍ ഗേലിയോന്‍ വെച്ച് വായിച്ചു.  സുന്നഹദോസ്‌ സെക്രട്ടറി ഡോ. മാത്യൂസ്‌ മാര്‍ സേവേറിയോസ്‌ ശ്രേഷ്‌ഠ നിയുക്‌ത ബാവായെ മദ്‌ബഹമധ്യത്തിലേക്ക്‌ ആനയിച്ചു. നിയുക്ത ബാവ മദ്ബഹയില്‍ പടിഞ്ഞാറോട്ട് അഭിമുഖമായി നിന്ന് 'അമലോഗിയ' (വിശ്വാസപ്ര്യാപനം) വായിച്ച് പേരെഴുതി ഒപ്പിട്ട് പരിശുദ്ധ ദിദിമോസ്‌ പ്രഥമന്‍ ബാവയെ ഏല്‍പ്പിച്ചു. ക്രിസ്തുവിലുംസഭയിലുമുള്ള വിശ്വാസം ഏറ്റുപറഞ്ഞ് അജഗണങ്ങള്‍ക്ക് നേര്‍വഴി കാട്ടുന്ന സത്യത്തിന്റെ പാതയിലെ ഇടയനാവുമെന്ന പ്രതിജ്ഞയാണതു്.

ഗീവര്‍ഗീസ് കൂറിലോസ്, തോമസ് മാര്‍ അത്തനാസ്യോസ് മെത്രാപ്പോലീത്തമാര്‍ രഹസ്യ-പരസ്യ പ്രാര്‍ഥനകള്‍ നടത്തി. തുടര്‍ന്ന് ദിദിമോസ് പ്രഥമന്‍ ബാവയും മറ്റ് മേല്‍പ്പട്ടക്കാരും ചേര്‍ന്നു അഭിഷിക്തനാവുന്നയാളുടെ തലയില്‍ കൈവച്ചു് പരിശുദ്ധാത്മാവാസത്തിനുവേണ്ടി പ്രാര്‍ഥനയോടെ കാതോലിക്കാ ബാവയെ പേരുചൊല്ലി വിളിച്ചു പ്രഖ്യാപനം നടത്തി. നിയുക്ത കാതോലിക്ക പൗലോസ് മാര്‍ മിലിത്തിയോസിന്റെ തലയില്‍ വലതുകൈ വെച്ച് നെറ്റിയില്‍ മൂന്നുതവണ കുരിശുവരച്ചു്, `പരിശുദ്ധ ബസേലിയോസ്‌ മാര്‍ത്തോമ്മാ പൗലോസ്‌ ദ്വിതീയന്‍ എന്ന് പേരു്ചൊല്ലി വിളിച്ചു് പരിശുദ്ധ ദിദിമോസ് ബാവ സ്ഥാനാരോഹണ പ്രഖ്യാപനം നടത്തുകയായിരുന്നു. പുതിയ കാതോലിക്കയെ മാത്യൂസ് മാര്‍ സേവേറിയോസ് മെത്രാപ്പോലീത്ത അംശവസ്‌ത്രങ്ങള്‍ (സ്‌ഥാനവസ്‌ത്രങ്ങള്‍ ) അണിയിച്ചു. ശീലമുടി, കാപ്പ, കാതോലിക്കാ-പാത്രിയര്‍ക്കാ സ്ഥാനത്തിന്റെ പ്രതീകമായ മൂന്നു മാലകളും മോതിരവും പിന്‍ഗാമിയെ ബസേലിയോസ്‌ ദിദിമോസ്‌ പ്രഥമന്‍ ബാവ അണിയിച്ചു. കുരിശും കൈമാറി.


പൂര്‍ണ അംശവസ്ത്രധാരിയായി പുതിയ ബാവ സിംഹാസനത്തില്‍ ആരൂഢനായി വിശ്വാസികളെ ആശിര്‍വദിച്ചു. കാതോലിക്കയും മലങ്കര മെത്രാപ്പോലീത്തയുമായി അഭിഷിക്തനായ ബാവയെ സഭ അംഗീകരിക്കുന്നതിന്റെ ഭാഗമായി സ്ഥാനചിഹ്‌നങ്ങളോടെ സിംഹാസനത്തിലിരുത്തി സഹകാര്‍മികരായ മേല്‍പ്പട്ടക്കാര്‍ ചേര്‍ന്ന് സിംഹാസനം മൂന്നുതവണ ഉയര്‍ത്തി താഴ്ത്തിയപ്പോള്‍ മൂന്നുപ്രാവശ്യം ബസേലിയോസ്‌ മാര്‍ത്തോമ്മാ പൗലോസ്‌ ദ്വിതീയന്‍ ബാവ സര്‍വഥാ യോഗ്യന്‍ എന്ന അര്‍ഥത്തില്‍ എല്ലാ കണ്ഠങ്ങളില്‍നിന്നും 'ഓക്‌സിയോസ്...ഓക്‌സിയോസ്' വിളി ഉയര്‍ന്നു. ഡോ. യൂഹാനോന്‍ മാര്‍ തേവോദോറോസ്, യാക്കോബ് മാര്‍ ഏലിയാസ്, ജോഷ്വാ മാര്‍ നിക്കോദിമോസ്, ഡോ. ഗീവര്‍ഗീസ് മാര്‍ യൂലിയോസ്, ഡോ. സഖറിയാസ് മാര്‍ അപ്രേം ,എബ്രഹാം മാര്‍ സെറാഫിം എന്നീ മെത്രാന്മാരാണു് സിംഹാസനത്തിലിരുന്ന ബാവയെ മൂന്നുതവണ ഉയര്‍ത്തുകയും താഴ്ത്തുകയും ചെയ്തതു്. തുടര്‍ന്ന് ഉയര്‍ത്തിയ സിംഹാസനത്തിലിരുന്ന് ബസേലിയോസ്‌ മാര്‍ത്തോമ്മാ പൗലോസ്‌ ദ്വിതീയന്‍ 'ഏവന്‍ ഗേലിയോന്‍' വായിച്ചു. ആടുകള്‍ക്കു വേണ്ടി ജീവനെ കൊടുക്കുന്ന നല്ല ഇടയന്റെ ഉപമയായിരുന്നു ഏവന്‍ഗേലിയോന്‍ ഭാഗം.


കൃതജ്ഞതാ പരസ്യ പ്രാര്‍ഥനകള്‍ക്കുശേഷം മെത്രാപ്പോലീത്തമാരുടെ മൂപ്പുമുറയനുസരിച്ച് അംശവടിയുടെ മുകളില്‍നിന്ന് താഴേക്ക് കൈപിടിച്ചു. ഏറ്റവും താഴെ പുതിയ കാതോലിക്കയും കൈപിടിച്ചു. കാതോലിക്കാ സ്ഥാനത്തിന്റെയും അജപാലനശുശ്രൂഷയുടെയും അധികാരം നല്കുന്നതിന്റെ പ്രതീകമായി അംശവടി കൈമാറിയതോടെ സ്ഥാനാരോഹണ ശുശ്രൂഷ പൂര്‍ത്തിയായി.
തുടര്‍ന്നു്, പരിശുദ്ധ ബസേലിയോസ്‌ മാര്‍ത്തോമ്മാ പൗലോസ്‌ ദ്വിതീയന്‍ ബാവായാണു് കുര്‍ബാന പൂര്‍ത്തിയാക്കിയത്‌. അഞ്ചുമണിക്കൂര്‍ ദൈര്‍ഘ്യമുണ്ടായിരുന്ന ശുശ്രൂഷകള്‍ പതിനൊന്നേകാലിനാണവസാനിച്ചതു്.
വലിയ ബാവാ പരിശുദ്ധ ബസേലിയോസ്‌ മാര്‍ത്തോമ്മാ ദിദിമോസ്‌ പ്രഥമനും പരിശുദ്ധ ബസേലിയോസ്‌ മാര്‍ത്തോമ്മാ പൗലോസ്‌ ദ്വിതീയന്‍ ബാവായും പരസ്‌പരം ഹാരമണിയിച്ച ശേഷം വൈദിക ട്രസ്‌റ്റി ഫാ. ഡോ. ജോണ്‍സ്‌ ഏബ്രഹാം കോനാട്ട്‌, അല്‍മായ ട്രസ്‌റ്റി എം.ജി. ജോര്‍ജ്‌ മുത്തൂറ്റ്‌, സഭാ സെക്രട്ടറി ഡോ. ജോര്‍ജ്‌ ജോസഫ്‌ എന്നിവരും വിവിധ പ്രതിനിധികളും ബാവായെ ഹാരമണിയിച്ചു.

സഭയിലെ മെത്രാപ്പോലീത്താമാര്‍, വിശ്വാസി സഹസ്രങ്ങള്‍ എന്നിവര്‍ക്കൊപ്പം ഡോ. ഫിലിപ്പോസ്‌ മാര്‍ ക്രിസോസ്‌റ്റം മാര്‍ത്തോമ്മാ വലിയ മെത്രാപ്പോലീത്ത, ആര്‍ച്ച്‌ ബിഷപ്പുമാരായ മാര്‍ ജോസഫ്‌ പൗവത്തില്‍, മാര്‍ ജോസഫ്‌ പെരുന്തോട്ടം, രാഷ്‌ട്രീയ നേതാക്കള്‍ തുടങ്ങി പ്രമുഖര്‍ സ്‌ഥാനാരോഹണത്തിനു് സാക്ഷികളായി. പരുമല തിരുമേനിയുടെ കബറിടത്തിലും പിന്നീടു കോട്ടയം പഴയസെമിനാരി, ദേവലോകം, വള്ളിക്കാട്ട്‌ ദയറാ എന്നിവിടങ്ങളിലെ സഭാപിതാക്കന്മാരുടെ കബറുകളിലും പരിശുദ്ധ ബാവാ ധൂപപ്രാര്‍ഥന നടത്തി. ദേവലോകം കാതോലിക്കേറ്റ്‌ ഓഫിസിലെത്തി ബാവാ ചുമതല ഏറ്റെടുക്കുകയും ചെയ്‌തു.


സഭയുടെ പ്രധാന മേലധ്യക്ഷനായി ഉയര്‍ത്തപ്പെട്ട മാര്‍മിലിത്തിയോസ് തൃശ്ശൂര്‍ കുന്നംകുളം സ്വദേശിയാണ്. കുന്നംകുളം മങ്ങാട്ട് പടിഞ്ഞാറ് കൊള്ളന്നൂര്‍ ഐപ്പ്-കുഞ്ഞീറ്റ ദമ്പതിമാരുടെ രണ്ടാമത്തെ മകനായി ജനിച്ച കെ.സി. പോള്‍ 1972 ജൂണ്‍ രണ്ടിനാണ് വൈദികനായത്. 91ല്‍ പൗലോസ് മാര്‍ മിലിത്തിയോസ് എന്ന പേരില്‍ എപ്പിസ്കോപ്പയും മെത്രാപ്പോലീത്തയായി വാഴിക്കപ്പെട്ടു. 2006 ലാണ് നിയുക്ത കാതോലിക്കയായത്.

സന്തുല ട്രസ്റ്റിന്റെ പുസ്‌തകം പ്രകാശനം ചെയ്‌തു



കൂത്താട്ടുകുളം,സെപ്തം 21: സന്തുല ട്രസ്റ്റ്‌ ഹോസ്‌പിറ്റല്‍ പ്രസിദ്ധീകരിച്ച ഹാന്‍ഡ്‌ ബുക്ക്‌ ഓഫ്‌ ഡിസേബിലിറ്റി സര്‍ട്ടിഫിക്കേഷന്‍ ഇന്‍ സൈക്യാട്രി എന്ന പുസ്‌തകം കോലഞ്ചേരി മെഡിക്കല്‍ കോളജ്‌ സ്ഥാപക ഡയറക്‌ടര്‍ ഡോ. കെ.സി മാമ്മന്‍ പ്രകാശനം ചെയ്‌തു. ഹോസ്‌പിറ്റലില്‍ നടന്ന ചടങ്ങില്‍ സന്തുല ട്രസ്റ്റ്‌ പ്രസിഡന്റായ കണ്ടനാടു് കിഴക്കു്-ഭദ്രാസനത്തിന്റെ ഡോ. തോമസ്‌ മാര്‍ അത്താനാസിയോസ്‌ മെത്രാപ്പോലീത്ത പുസ്‌തകം ഏറ്റുവാങ്ങി. ഡോ. തോമസ്‌ ജോണ്‍ രചിച്ച പുസ്‌തകം ഹോസ്‌പിറ്റല്‍ ഡയറക്‌ടര്‍ ഫാ. എഡ്വേര്‍ഡ്‌ ജോര്‍ജ്‌ പരിചയപ്പെടുത്തി. വൈസ്‌പ്രസിഡന്റ്‌ പി.വി തോമസ്‌, ഡയറക്‌ടര്‍ ബോര്‍ഡംഗം വിന്‍സന്റ്‌ ജോണ്‍, അഡ്‌മിനിസ്‌ട്രേറ്റര്‍ ശാലിനി ജൂലി മാത്യു എന്നിവര്‍ പ്രസംഗിച്ചു.

പ്രവാചകപ്രബോധനത്തിന്‌ വിരുദ്ധമായി പ്രവര്‍ത്തിക്കുമ്പോള്‍ മതനിന്ദ സംഭവിക്കുന്നു: ഡോ. തോമസ്‌ മാര്‍ അത്താനാസിയോസ്‌

അധ്യാപകനെതിരെയുള്ള ആക്രമണം: ഭീകരതയ്‌ക്കു താക്കീതായി മൂവാറ്റുപുഴയില്‍ മൗന ജാഥ

മൂവാറ്റുപുഴ: മതനിന്ദയും പ്രവാചകനിന്ദയും യഥാര്‍ഥത്തില്‍ സംഭവിക്കുന്നത്‌ പ്രവാചക പ്രബോധനത്തിന്‌ വിരുദ്ധമായി ആയുധമെടുക്കുമ്പോഴും മറ്റുള്ളവരെ ഉപദ്രവിക്കുമ്പോഴുമാണെന്ന സത്യം തീവ്രവാദികളും ഭീകരവാദികളും തിരിച്ചറിയണമെന്ന്‌ മലങ്കര ഓര്‍‍ത്തഡോക്സ് സുറിയാനി സഭയുടെ കണ്ടനാട്‌ ഈസ്റ്റ്‌ ഭദ്രാസനാധിപന്‍ ഡോ. തോമസ്‌ മാര്‍ അത്താനാസിയോസ്‌ മെത്രാപ്പോലീത്ത പ്രസ്താവിച്ചു. തൊടുപുഴ ന്യൂമാന്‍ കോളജ്‌ അധ്യാപകന്‍ പ്രൊഫ. ടി.ജെ. ജോസഫിന്റെ കൈപ്പത്തി വെട്ടിമാറ്റുകയും കുടുംബത്തെയടക്കം ആക്രമിക്കുകയും ചെയ്ത സംഭവത്തില്‍ പ്രതിഷേധിച്ച്‌ ജൂലൈ 9-നു് മൂവാറ്റുപുഴ മേഖലയിലെ ക്രിസ്‌തീയ ദേവാലയങ്ങളുടെ ആഭിമുഖ്യത്തില്‍ നടത്തിയ മൗന റാലി ഫ്‌ളാഗ്‌ ഓഫ്‌ ചെയ്യുകയായിരുന്നു മെത്രാപ്പോലീത്ത.

യഥാര്‍ഥ ഹിന്ദുവിനും മുസ്ലിമിനും ക്രിസ്‌ത്യാനിക്കും ആളുകളെ ഇല്ലായ്‌മ ചെയ്യാനോ ഉപദ്രവിക്കാനോ കഴിയില്ലെന്നും മെത്രപ്പോലീത്ത ചൂണ്ടിക്കാട്ടി.

സംഘാടക സമിതി കണ്‍വീനര്‍ അഡ്വ.പോള്‍ ജോസഫിന്‌ മെത്രാപ്പോലീത്ത കറുത്തകൊടി കൈമാറിയാണ്‌ റാലി ആരംഭിച്ചത്‌. മൂവാറ്റുപുഴ ഹോളിമാഗി ഫൊറോനാ പള്ളി അങ്കണത്തില്‍ വികാരി ഫാ. ജോസഫ്‌ മക്കോളിലിന്റെ അധ്യക്ഷതയില്‍ റാലിയുടെ തുടക്കത്തില്‍ ചേര്‍ന്ന യോഗം കാലടി സര്‍വകലാശാല മുന്‍ വൈസ്‌ ചാന്‍സലര്‍ ഡോ. കെ.എസ്‌ രാധാകൃഷ്‌ണന്‍ ഉദ്‌ഘാടനം ചെയ്‌തു.

ഭീകരതയ്‌ക്കുള്ള താക്കീതിനൊപ്പം മതസൗഹാര്‍ദവും വിളിച്ചോതുന്നതായിരുന്നു റാലി. റാലിയില്‍ അണിനിരന്നവര്‍ നിശബ്‌ദരായാണ്‌ നീങ്ങിയതെങ്കിലും ഇവരുടെ കൈകളിലെ പ്ലക്കാര്‍ഡുകള്‍ വാചാലമായിരുന്നു. മതസൗഹാര്‍ദാന്തരീഷം തകര്‍ക്കുന്നവര്‍ക്കെതിരേ മൗനമായ മുന്നറിയിപ്പായി റാലി മാറി. നിയമവാഴ്‌ചയെ നിരാകരിക്കുന്ന ഭീകര ആക്രമണത്തില്‍ പ്രതിഷേധിക്കുക, അക്രമത്തിനെതിരേ മനുഷ്യ മനസാക്ഷി ഉണരുക, അക്രമികളെ ഉടന്‍ പിടികൂടുക, മതസൗഹാര്‍ദം തകര്‍ക്കാന്‍ ആരെയും അനുവദിക്കാതിരിക്കുക, കേസന്വേഷണം പ്രത്യേക കേന്ദ്ര സംഘത്തെ ഏല്‌പിക്കുക എന്നീ ആവശ്യങ്ങള്‍ ഉന്നയിച്ചും ആത്മസംയമനം ഭീരുത്വമോ ബലഹീനതയോ അല്ലെന്നു പ്രഖ്യാപിച്ചുമുള്ള പ്ലക്കാര്‍ഡുകളാണ്‌ റാലിയില്‍ ഉയര്‍ന്നത്‌.

മൂവാറ്റുപുഴ മേഖലയിലെ വിവിധ ക്രൈസ്‌തവ ദേവാലയങ്ങളുടെ ആഭിമുഖ്യത്തില്‍‍ നടത്തിയ പ്രതിഷേധ ജാഥയില്‍ നൂറുകണക്കിനാളുകള്‍ പങ്കെടുത്തു. മുന്‍ എം പി കെ. ഫ്രാന്‍സിസ്‌ ജോര്‍ജ്‌, മുന്‍ എംഎല്‍എ ജോണി നെല്ലൂര്‍, എം. മാത്തപ്പന്‍, നഗരസഭാധ്യക്ഷ മേരി ജോര്‍ജ്‌, കെ.സി ജോര്‍ജ്‌, ജോയ്‌സ്‌ മുക്കുടം, പ്രഫ. ജോസുകുട്ടി ജെ. ഒഴുകയില്‍, എന്‍.ടി ചെറിയാന്‍, വില്‍സണ്‍ കുരിശിങ്കല്‍, അഡ്വ. ജോണി ജോര്‍ജ്‌, തോമസ്‌ പാറക്കല്‍, ഫാ. പോള്‍ നെടുമ്പുറം, ഫാ. ആന്റണി ഓവേലില്‍, ഫാ. ജോണ്‍ കടവന്‍, റവ. ഡോ. പയസ്‌ മലേക്കണ്‌ടം, ജോയി നടുക്കുടി, ജോര്‍ഡി പിട്ടാപ്പിള്ളി, ആന്റണി മടേക്കല്‍, ജോഷി മുണ്‌ടയ്‌ക്കല്‍, ഫാ. വിന്‍സന്റ്‌ നെടുങ്ങാട്ട്‌, ഫാ. ജോര്‍ജ്‌ വടക്കേല്‍, സിസ്റ്റര്‍ ജോവിയറ്റ്‌, റോഷന്‍ പള്ളിക്കുടി, ടോണി വെളിയന്നൂര്‍ക്കാരന്‍, കീപ്പന്‍ ആലുമൂട്ടില്‍, റോയി പോള്‍, ജോര്‍ജ്‌ കാക്കനാട്‌, അഡ്വ. ഇ.കെ ജോസ്‌, ദീപക്‌ ചേര്‍ക്കോട്ട്‌, റോയ്‌സണ്‍ കുഴിഞ്ഞാലില്‍ എന്നിവര്‍ റാലിക്ക്‌ നേതൃത്വം നല്‍കി. സ്ത്രീകളും കുട്ടികളും വിദ്യാര്‍ഥികളും വൈദികരും സന്യാസിനിമാരും റാലിയില്‍ അണിനിരന്നു. ഹോളിമാഗി ഫൊറോനാ പള്ളിയങ്കണത്തില്‍നിന്ന്‌ ആരംഭിച്ച റാലിയില്‍ കറുത്ത ബാഡ്‌ജ്‌ ധരിച്ച്‌ സ്‌ത്രീകളും യുവജനങ്ങളുമടക്കം ആയിരങ്ങള്‍ പങ്കെടുത്തു. മേഖലയിലെ വൈദികരും കന്യാസ്‌ത്രീകളും റാലിയില്‍ അണിനിരന്നു. ഗതാഗതതടസം പരമാവധി ഒഴിവാക്കി രണ്‌ടുവരിയായി ചിട്ടയോടെ സമാധാനപരമായി നീങ്ങിയ റാലി നഗരം ചുറ്റി ഹോളിമാഗി ഫൊറോനാ പള്ളിയങ്കണത്തില്‍ സമാപിച്ചു.

കേസ്‌ എന്‍ഐഎയെ ഏല്‌പിക്കുക, അധ്യാപകന്റെ ചികിത്സാ ചെലവ്‌ വഹിക്കുക, കുടുംബത്തിന്‌ സംരക്ഷണം നല്‍കുക, അക്രമികളെ ഉടന്‍ പിടികൂടുക എന്നീ ആവശ്യങ്ങള്‍ സമാപന യോഗം പ്രമേയത്തിലൂടെ സര്‍ക്കാരിനോട്‌ ഉന്നയിച്ചു.

പിറവം വലിയപള്ളി ഇടവക പ്രാര്‍‍ത്ഥനായോഗവാര്‍ഷികം


പിറവം, ജൂണ്‍ 20 : പിറവം വലിയപള്ളി ഇടവക പ്രാര്‍‍ത്ഥനായോഗത്തിന്റെ വാര്‍ഷികം മലങ്കര ഓര്‍ത്തഡോക്‌സ് സുറിയാനി സഭയുടെ കണ്ടനാട് ഈസ്റ്റ് ഭദ്രാസനാധിപന്‍ ഡോ.തോമസ് മാര്‍ അത്താനാസിയോസ് മെത്രാപ്പോലീത്ത ഉദ്ഘാടനം ചെയ്തു. വികാരി വന്ദ്യ സൈമണ്‍ വറുഗീസ് കശീശ അദ്ധ്യക്ഷം വഹിച്ചു. ഫാ. ഗീവറുഗീസ് കൊച്ചുപറമ്പില്‍ റമ്പാന്‍, ഫാ. ബിനോയ് പട്ടകുന്നേല്‍, ഫാ. വി എ മാത്യൂസ്, ഫാ. ജോസഫ് മങ്കിടിയില്‍ വിപി വറുഗീസ് കെ പി ജോണി തുടങ്ങിയവര്‍ സംസാരിച്ചു.

കൂത്താട്ടുകുളം മേഖലയില്‍‍ നിന്നും പാമ്പാക്കുട തീര്‍ഥയാത്ര നടത്തി



കൂത്താട്ടുകുളം: പാമ്പാക്കുട ചെറിയപള്ളിയില്‍ കബറടങ്ങിയിരിക്കുന്ന ഇന്ത്യയിലെ ആദ്യത്തെ പൗരസ്‌ത്യ കാതോലിക്കോസ് പരിശുദ്ധ ബസേലിയോസ്‌ പൗലോസ്‌ ഒന്നാമന്‍ ബാവയുടെ ഓര്‍മപ്പെരുന്നാളിനോടനുബന്ധിച്ചുള്ള പ്രഥമ കൂത്താട്ടുകുളം മേഖലാ തീര്‍ഥയാത്ര മെയ് 2-നു നടന്നു.


ഓര്‍ത്തഡോക്‌സ്‌ സഭ വൈദികട്രസ്റ്റി റവ.ഡോ. ജോണ്‍സ്‌ ഏബ്രഹാം കോനാട്ട്‌ യാത്ര ഉദ്‌ഘാടനം ചെയ്‌തു. കണ്ടനാട് ഈസ്റ്റ് കൂത്താട്ടുകുളം മേഖലാ സഭാകേന്ദ്രത്തില്‍ നിന്നാണ്‌ സംഘം യാത്ര തിരിച്ചത്‌.
ഫാ. മാത്യൂസ്‌ ചെമ്മനാപ്പാടം, ഫാ. ജോണ്‍ വി. ജോണ്‍, ഫാ. ജോയി കടുകംമാക്കീല്‍, ഫാ. ഏലിയാസ്‌ ചെറുകാട്‌, ഫാ. ഏലിയാസ്‌ മണ്ണാത്തിക്കുളം, ഫാ. ഷിബു കുര്യന്‍, ജോസഫ്‌ ജോര്‍ജ്‌, ബിജു പാറത്തൊട്ടായില്‍, മത്തായി ഏറമ്പടം, മാത്തുക്കുട്ടി പറപ്പേടത്ത്‌, എം.സി ജോയി എന്നിവര്‍ നേതൃത്വം നല്‌കി.

ഉറവിടം കൂത്താട്ടുകുളം ഓര്‍ത്തഡോക്‌സ് സഭാകേന്ദ്രം
.

സെന്റ്‌ ഫിലോമിനാസ്‌ പബ്ലിക്‌ സ്‌കൂളില്‍ നിര്‍മിക്കുന്ന പുതിയ മന്ദിരത്തിന്റെ ശിലാസ്ഥാപനം





കൂത്താട്ടുകുളം - ഇലഞ്ഞി സെന്റ്‌ ഫിലോമിനാസ്‌ പബ്ലിക്‌ സ്‌കൂളില്‍ നിര്‍മിക്കുന്ന പുതിയ മന്ദിരത്തിന്റെ അടിസ്ഥാനശില ഡോ. തോമസ്‌ മാര്‍ അത്താനാസിയോസ്‌ മെത്രാപ്പോലീത്ത ആശിര്‍വദിക്കുന്നു. മാത്യു മല്ലിപ്പുറത്ത്‌, സ്‌കറിയ മൂലംതുരുത്തില്‍, ബേബി വര്‍ക്കി, റവ. ഡോ. ജോണ്‍ ഏര്‍ണ്യാകുളത്തില്‍, ഫാ. കുര്യാക്കോസ്‌ പോത്താറയില്‍ കോര്‍-എപ്പിസ്‌കോപ്പ, ജോയ്‌സ്‌ മാമ്പിള്ളില്‍, സുനില്‍ കള്ളാട്ടുകുഴി, രാജീവ്‌ മംഗലത്ത്‌ എന്നിവര്‍ സമീപം.

കടപ്പാടു്-കൂത്താട്ടുകുളം വാര്‍‍ത്ത

കൂത്താട്ടുകുളം ചന്തപ്പള്ളിയിലെ ഒവിബിഎസ്


കൂത്താട്ടുകുളം: എം ജി എം സണ്‍ഡേ സ്‌കൂളിന്റെ ആഭിമുഖ്യത്തില്‍ കൂത്താട്ടുകുളം ടൗണ്‍ സെന്റ്‌ ജോണ്‍സ്‌ ഓര്‍‍ത്തഡോക്സ് സുറിയാനി ചാപ്പലില്‍ (ചന്തപ്പള്ളി) ഏപ്രില്‍ 6 മുതല്‍ 16 വരെ നടന്ന ഒ വി ബി എസ്‌ ഫാ. ജോണ്‍ വി. ജോണ്‍ ഉദ്‌ഘാടനം ചെയ്‌തു. യോഗത്തില്‍ സണ്‍ഡേ സ്‌കൂള്‍ ഹെഡ്‌മാസ്റ്റര്‍ സി.കെ ഏലിയാസ്‌, ഇത്താക്ക്‌ മംഗലത്ത്‌ എന്നിവര്‍ പ്രസംഗിച്ചു.

ഉറവിടം കൂത്താട്ടുകുളം ഓര്‍ത്തഡോക്‌സ് സഭാകേന്ദ്രം
.

കുവൈത്ത് മാര്‍ ഗ്രിഗോറിയോസ്‌ മൂവ്‌മെന്റ്‌ - സ്ലീബാദാസ സമൂഹ ഭവനപദ്ധതിയിലെ ആദ്യവീട് നല്കി




കൂത്താട്ടുകുളം : സ്ലീബാദാസ സമൂഹത്തിനായി കുവൈറ്റ്‌ മാര്‍ ഗ്രിഗോറിയോസ്‌ മൂവ്‌മെന്റ്‌ നിര്‍മ്മിച്ചുനല്‍കുന്ന നൂറു് വീടുകളില്‍ ആദ്യത്തേത്തിന്റെ താക്കോല്‍ മാറിക വലിയകണ്ടത്തില്‍‍ ജോണ്‍‍ പത്രോസിനു് നല്‍‍കിക്കൊണ്ടു് കണ്ടനാട്‌ ഈസ്റ്റ്‌ ഭദ്രാസനാധിപന്‍ ഡോ.തോമസ്‌ മാര്‍ അത്താനാസിയോസ്‌ മെത്രാപ്പോലീത്ത താക്കോല്‍ദാനം നിര്‍വഹിച്ചു. മാറികപ്പള്ളി വികാരി ഫാ. മാത്യൂസ്‌ ചെമ്മനാപ്പാടം, ഫാ. പി.എം. ജോണ്‍, സഭാ സെക്രട്ടറി ഡോ.ജോര്‍ജ്‌ ജോസഫ്‌, മാര്‍ ഗ്രിഗോറിയോസ്‌ മൂവ്‌മെന്റ്‌ വൈസ്‌ പ്രസിഡന്റ്‌ ഇ.പി. വര്‍ഗീസ്‌, വി.കെ. വറുഗീസ്‌ വൈശ്യംപറമ്പില്‍, സുശീല വര്‍ഗീസ്‌, ബഹനാന്‍, രാജി കുര്യാക്കോസ്‌, സാബു വൈശ്യംപറമ്പില്‍ എന്നിവര്‍‍ പങ്കെടുത്തു.

ഫോട്ടോ : താക്കോല്‍ദാനത്തിനുമുമ്പു് ഡോ.തോമസ്‌ മാര്‍ അത്താനാസിയോസ്‌ മെത്രാപ്പോലീത്തയുടെയും മാറികപ്പള്ളി വികാരി ഫാ. മാത്യൂസ്‌ ചെമ്മനാപ്പാടത്തിന്റെയും (വലത്തേയറ്റം) ഫാ. പി.എം. ജോണിന്റെയും കാര്‍‍മികത്വത്തില്‍ വീടു് കൂദാശ ചെയ്യുന്നു. സഭാ സെക്രട്ടറി ഡോ.ജോര്‍ജ്‌ ജോസഫിനെയും ചിത്രത്തില്‍ കാണാം.
ഫോട്ടോ ക്രെഡിറ്റ് : ഓര്‍ത്തഡോക്‌സ്‌ സഭാകേന്ദ്രം, കൂത്താട്ടുകുളം

കൂത്താട്ടുകുളം കണ്‍വന്‍ഷന്‍ സമാപിച്ചു

.


മാതാപിതാക്കള്‍ മക്കള്‍ക്ക്‌ നല്ല മാതൃകയാകണം - കൊച്ചുപറമ്പില്‍ ഗീവറുഗീസ്‌ റമ്പാന്‍‍

കൂത്താട്ടുകുളം : മാര്‍ച്ച്‌ 10-ാം തീയതി ബുധനാഴ്‌ചയാരംഭിച്ച കൂത്താട്ടുകുളം ഓര്‍ത്തഡോക്‌സ്‌ സിറിയന്‍ ബൈബിള്‍ കണ്‍വന്‍ഷന്‍ വിജയകരമായി സമാപിച്ചു. സമാപന ദിവസമായ 14-ാം തീയതി ഞായറാഴ്‌ച സന്ധ്യയിലെ വചനശുശ്രൂഷ നടത്തിയത്‌ കോട്ടയം ബസേലിയോസ്‌ കോളേജിലെ അദ്ധ്യാപകനായ തോമസ്‌ കുരുവിളയായിരുന്നു. കൊച്ചുപറമ്പില്‍ ഗീവറുഗീസ്‌ റമ്പാന്‍‍ സമാപന സന്ദേശം നല്‍കി. ജോണ്‍ തളിയച്ചിറ കോര്‍ എപ്പിസ്‌കോപ്പ സ്വാഗതവും ഫാ.ജോണ്‍ വി. ജോണ്‍ നന്ദിയും പറഞ്ഞു.

കൂത്താട്ടുകുളം പ്രദേശത്തിന്റെയും മേഖലയുടെയും വിളക്കായി അറുപതുവര്‍ഷമായി ശോഭിക്കുന്ന കൂത്താട്ടുകുളം ഓര്‍ത്തഡോക്‌സ്‌ ബൈബിള്‍ കണ്‍വന്‍ഷന്‍ ചൊരിയുന്ന അനുഗ്രഹം ഈ പ്രദേശത്തിന്റെ ആത്മീയ ചൈതന്യ മാണെന്ന്‌ കൊച്ചുപറമ്പില്‍ ഗീവറുഗീസ്‌ റമ്പാന്‍ അഭിപ്രായപ്പെട്ടു. കര്‍ത്താവിന്റെ വഴിയില്‍ ജീവിക്കുവാനും ക്രിസ്‌തീയസാക്ഷ്യം നിര്‍വ്വഹിക്കാനും ഈ സുവിശേഷ മഹായോഗത്തിന്റെ പ്രകാശം പ്രചോദനം നല്‌കട്ടെ എന്ന്‌ അദ്ദേഹം ആശംസിച്ചു.

മാതാപിതാക്കള്‍ മക്കള്‍ക്ക്‌ നല്ല മാതൃകയാവാന്‍ ശ്രമിയ്ക്കണമെന്ന്‌ അദ്ദേഹം ഉദ്‌ബോധിപ്പിച്ചു. ലോകത്തിന്റെ വെല്ലുവിളിയെ അഭിമുഖീകരിക്കുമ്പോള്‍ വഴിതെറ്റാതിരിക്കുവാന്‍ പ്രാര്‍ത്ഥനയുടെ അനുഭവം തുണയാകും. അദ്ദേഹം പറഞ്ഞു.

ഫോട്ടോ ക്രെഡിറ്റ് :- ഓര്‍ത്തഡോക്‌സ്‌ സഭാകേന്ദ്രം, കൂത്താട്ടുകുളം

.

വഴിതെറ്റാതിരിക്കുവാന്‍ ക്രിസ്‌തുവിനെ ഉറ്റുനോക്കുക: തോമസ്‌ കുരുവിള



ജീവനുള്ള ജീവിതമുള്ളവരായി രൂപാന്തരപ്പെടണം

കൂത്താട്ടുകുളം : നിരാശയുടെയും തിരിച്ചുപോക്കിന്റെയും വഴിയില്‍ നിന്നും ദൈവിക വഴിയിലേക്ക്‌ മടങ്ങിപ്പോകണമെന്നതാണ്‌ എമ്മാവൂസിലേക്കുള്ള യാത്രയുടെ അവസാനം വെളിപ്പെടുത്തുന്നതെന്നു് യുവ സുവിശേഷകനായ തോമസ്‌ കുരുവിള പ്രസ്താവിച്ചു. 60-ആമത്‌ കൂത്താട്ടുകുളം ഓര്‍ത്തഡോക്‌സ്‌ സിറിയന്‍ ബൈബിള്‍ കണ്‍വെന്‍ഷന്റെ അഞ്ചാം ദിവസമായ മാര്‍‍ച്ച് 14-ആം തീയതി ഞായറാഴ്‌ച സന്ധ്യക്ക്‌ കൂത്താട്ടുകുളം സെന്റ് ജോണ്‍സ് നഗറില്‍ (കെ.ടി. ജേക്കബ് സ്മാരക ടൗണ്‍ ഹാളില്‍) വചന ശുശ്രൂഷ നടത്തുകയായിരുന്നു കോട്ടയം ബസേലിയോസ്‌ കോളേജിലെ അദ്ധ്യാപകന്‍ കൂടിയായ തോമസ്‌ കുരുവിള.


നന്‍മയുടെ വേഷം ധരിച്ചെത്തുന്ന തിന്മയെ സൂക്ഷിക്കണം. സത്യമാണെന്നു വിചാരിച്ച്‌ തിന്മയുടെ പിന്നാലെ പോകാതെ സത്യത്തെ തിരിച്ചറിയാന്‍ ശ്രമിക്കണം. സത്യവചനത്തെയും തിരുവെഴുത്തുകളെയും ആണ്‌ ആധാരമാക്കേണ്ടത്‌:ഭക്ത സീരിയലുകളെയല്ല. തിരുവെഴുത്തുകളാണ്‌ സത്യമായിട്ടുള്ളത്‌. പുതിയ വാര്‍ത്തകള്‍ വരുമ്പോള്‍ അസത്യമാകുന്ന പഴയ വാര്‍ത്തകളും പരസ്യങ്ങളും വഴിതെറ്റിക്കുന്നതാണ്‌.


തങ്ങള്‍ പറയുന്നത്‌ മാതാപിതാക്കള്‍ക്ക്‌ മനസ്സിലാകുന്നില്ലെന്ന് മക്കളും മക്കള്‍ തങ്ങളോട്‌ ഹൃദയം തുറന്ന്‌ സംസാരിക്കുന്നില്ലെന്നു് മാതാപിതാക്കളും പറയുന്നതു് മാതാപിതാക്കള്‍ മക്കള്‍ക്ക്‌ മാതൃകയാകാത്തതുകൊണ്ടാണ്‌.


ക്രിസ്‌തുവിന്റെ വഴിയിലൂടെ നടക്കുവാനുള്ള വെല്ലുവിളിയാണ്‌ ഈ ബൈബിള്‍ കണ്‍വന്‍ഷന്‍ ഉയര്‍ത്തിക്കൊണ്ടിരിക്കുന്നത്‌ എന്ന് അദ്ദേഹം ചൂണ്ടിക്കാട്ടി. തുറക്കപ്പെടാതെ കടന്നുപോയ ജീവിതമായി അവസാനിക്കാതെ ചുറ്റുപാടുമുള്ള സമൂഹത്തിലേക്ക്‌ ജീവന്റെ തെളിവുകള്‍ പ്രസരിപ്പിക്കുവാനും അവശേഷിപ്പിക്കുവാനും കഴിയുന്ന വിധത്തില്‍ രൂപാന്തരപ്പെടണം.


ജീവിതത്തിലെ വഴിയാത്രകള്‍ തെറ്റിപ്പോകുമ്പോള്‍ സത്യവും വഴിയും ജീവനുമാകുന്ന യേശുവിലേക്ക്‌ ഉറ്റുനോക്കണം. അല്‍ഭുത രോഗശാന്തി വാഗ്‌ദാനം ചെയ്യുന്ന കപടവചന പ്രഘോഷണ യോഗങ്ങളുമടക്കമുള്ളവയെ തിരിച്ചറിഞ്ഞ്‌ യേശു പഠിപ്പിച്ച വഴിയിലേക്ക്‌ മടങ്ങണം- തോമസ്‌ കുരുവിള പറഞ്ഞു.

കൊച്ചുപറമ്പില്‍ ഗീവറുഗീസ്‌ റമ്പാന്‍‍ സമാപന സന്ദേശം നല്‍കി. ജോണ്‍ തളിയച്ചിറ കോര്‍ എപ്പിസ്‌കോപ്പ സ്വാഗതവും ഫാ.ജോണ്‍ വി. ജോണ്‍ നന്ദിയും പറഞ്ഞു.

ഫോട്ടോ ക്രെഡിറ്റ് :- ഓര്‍ത്തഡോക്‌സ്‌ സഭാകേന്ദ്രം, കൂത്താട്ടുകുളം

സാത്താന്റെ ശാപങ്ങളെയും തന്ത്രങ്ങളെയും ഭയക്കരുത്‌ - ഫാ. ജോണ്‍ വി. ജോണ്‍



കൂത്താട്ടുകുളം: കല്ലുകളെ അപ്പമാക്കണമെന്ന സാത്താന്‍ എന്ന പരീക്ഷകന്റെ ആവശ്യമാണ്‌ വികലമായ ആദ്ധ്യാത്മികതയില്‍ ഉന്നയിക്കപ്പെടുന്നതെന്ന്‌ ഫാ.ജോണ്‍ വി.ജോണ്‍ ചൂണ്ടിക്കാട്ടി. 60 -ആ മത്‌ കൂത്താട്ടുകുളം ബൈബിള്‍ കണ്‍വന്‍ഷന്റെ 4-ആം ദിവസമായ മാര്‍ച്ച്‌ 13-ആം തീയതി ശനിയാഴ്‌ച സന്ധ്യക്ക്‌ കൂത്താട്ടുകുളം സെന്റ് ജോണ്‍സ് നഗറില്‍ (കെ.ടി. ജേക്കബ് സ്മാരക ടൗണ്‍ ഹാളില്‍) വചനശുശ്രൂഷ നടത്തുകയായിരുന്നു അദ്ദേഹം. യേശുവിനെ പരീക്ഷിച്ച സാത്താന്റെ നിര്‍ദ്ദേശങ്ങളെ പാലിച്ചാല്‍ കിട്ടുന്ന പ്രശസ്തിയും നേട്ടവും യേശു നിരാകരിച്ചതാണ്‌.

വീണ്ടും ജനിക്കുകയും സ്വര്‍ഗ്ഗസ്ഥനായ പിതാവിന്റെ മക്കളാകുകയും ഭയത്തില്‍ നിന്നു മോചനം പ്രാപിക്കുകയും ദൈവരാജ്യത്തെ കൈക്കൊള്ളുകയും ചെയ്യുവാനാണ്‌ യേശു പഠിപ്പിച്ചത്‌.

ജനപ്രിയതകൊണ്ടും അല്‍ഭുതങ്ങള്‍കൊണ്ടും അടയാളങ്ങള്‍കൊണ്ടും സ്വര്‍ഗസ്ഥനായ പിതാവിന്റെ മക്കളാകാന്‍ സാധിക്കുകയില്ല. വീണ്ടും ജനിക്കുക തന്നെ വേണം. സാത്താന്റെ ശാപങ്ങളെയും തന്ത്രങ്ങളെയും ഭയക്കരുത്‌. ദൈവം മനുഷ്യരില്‍ക്കൂടി പ്രവര്‍ത്തിക്കാനാണ്‌ ശ്രമിക്കുന്നത്‌. ഈ ലോകത്തിന്‌ അനുരൂപരാകാതെ ലോകത്തിന്റേതല്ലാത്തവരായി ദൈവരാജ്യത്തെ കൈക്കൊള്ളണം.

നമ്മുടെ നോമ്പും ഉപവാസവും ദൈവത്തിനുമുമ്പാകെ ശ്രേഷ്‌ഠമാകണം. നമ്മുടെ ജീവിതത്തിലെ കുറവ്‌ പരിഹരിക്കുവാന്‍ യേശുകല്‌പിച്ചതുപോലെ പ്രവര്‍ത്തിക്കണം.

കണ്ടനാട്‌ (പടിഞ്ഞാറ്‌) മെത്രാപ്പോലീത്ത ഡോ.മാത്യൂസ്‌ മാര്‍ സേവേറിയോസ്‌ വരാതിരുന്നതുകൊണ്ടാണ്‌ ജോണ്‍ വി. ജോണ്‍ ഈ ദിവസം വചനശുശ്രൂഷ നടത്തിയത്‌.

ഫോട്ടോ ക്രെഡിറ്റ് :- ഓര്‍ത്തഡോക്‌സ്‌ സഭാകേന്ദ്രം, കൂത്താട്ടുകുളം

കഴിവിനും അപ്പുറത്ത്‌ ദൈവത്തെ അന്വേഷിക്കുക

.


കൂത്താട്ടുകുളം : ദൈവം എങ്ങനെയായിരിക്കുന്നുവോ അങ്ങനെ ദൈവത്തെ അംഗീകരിക്കുക എന്നതാണ്‌ യഥാര്‍ത്ഥ ആരാധനയും ദൈവസ്തുതിയുമെന്ന്‌ പ്രമുഖ സുവിശേഷപ്രസംഗകനും പൗരസ്ത്യ കാതോലിക്കോസിന്റെ അരമനപ്പള്ളിയായ കോട്ടയം ഏലിയ കത്തീഡ്രലിന്റെ വികാരിയുമായ ഫാ.മോഹന്‍ ജോസഫ്‌ പ്രസ്‌താവിച്ചു. 60-ാമത്‌ കൂത്താട്ടുകുളം ഓര്‍ത്തഡോക്‌സ്‌ സിറിയന്‍ ബൈബിള്‍ കണ്‍വെന്‍ഷന്റെ മൂന്നാം ദിവസം മാര്‍‍ച്ച് 12-ആം തീയതി വെള്ളിയാഴ്‌ച സന്ധ്യക്ക്‌ കൂത്താട്ടുകുളം സെന്റ് ജോണ്‍സ് നഗറില്‍ (കെ.ടി. ജേക്കബ് സ്മാരക ടൗണ്‍ ഹാളില്‍) വചന ശുശ്രൂഷ നടത്തുകയായിരുന്നു അദ്ദേഹം.

ക്രിസ്‌തുവില്‍നിന്നും കിട്ടുന്നതല്ല ക്രിസ്‌തുവിന്‌ നല്‍കുന്നതാണ്‌ ക്രിസ്‌തുസാക്ഷ്യം. വേദനകളുടെ അടിസ്ഥാനത്തിലല്ല ദൈവത്തെ അന്വേഷിക്കേണ്ടത്‌. മനുഷ്യന്റെ കഴിവുകള്‍ മൂക്കുകുത്തുമ്പോഴാണ്‌ ദൈവത്തിന്റെ ഇടപെടല്‍ ഉണ്ടാകുന്നത്‌. ലഭിച്ച സൗകര്യങ്ങളെ കവിയുന്ന വിധത്തില്‍ ദൈവാന്വേഷണം നടത്തുകയും സ്ഥായിയായ ദൈവബന്ധം നിലനിര്‍ത്തുകയും ചെയ്യണം.


തിന്‍മയുമായി പൊരുത്തപ്പെടരുതെന്നും തിന്മയുടെ പ്രവണതകളെ എതിര്‍ത്തുകൊണ്ട്‌ നന്മയ്‌ക്കുവേണ്ടി ഒറ്റക്കു നിലകൊള്ളണമെന്നും അദ്ദേഹം ഉദ്ബോധിപ്പിച്ചു.


ക്രിസ്‌തുവിനോട്‌ രഹസ്യമായി ആഭിമുഖ്യം പുലര്‍ത്തിയ യഹൂദപ്രമാണിയും പരീശനുമായിരുന്ന നിക്കോദിമോസിന്റെ ദൈവാന്വേഷണം സുപ്രധാനമാണ്‌. അവിശ്വാസികളുടെയിടയില്‍ വിശ്വാസിയായിരിക്കുകയെന്നത്‌ വളരെ ദുഷ്‌കരമാണ്‌. പരസ്യമായി സാക്ഷിക്കുന്നവരെയും രഹസ്യമായി തന്റെ കഴിവിനെ ക്രിസ്‌തുവിനുവേണ്ടി വിനിയോഗിക്കുന്നവരെയും ദൈവത്തിനാവശ്യമുണ്ടെന്നു് ഫാ.മോഹന്‍ ജോസഫ്‌ എടുത്തുപറഞ്ഞു.

1949 ല്‍ പരേതനായ കരോട്ടുവീട്ടില്‍ കെ.ഒ. തോമസ്‌ കശീശയുടെ നേത്യത്വത്തിലും 1948-ല്‍ തുടങ്ങിയ ബൈബിള്‍ ക്ലാസിന്റെ ആഭിമുഖ്യത്തിലുമായി ആരംഭിച്ച കൂത്താട്ടുകുളം ബൈബിള്‍ കണ്‍വെന്‍ഷന്‍ വടക്കന്‍ പ്രദേശത്തെ പ്രധാന കണ്‍വെന്‍ഷനായാണ്‌ അറിയപ്പെടുന്നത്‌.


ഫോട്ടോ ക്രെഡിറ്റ് :- ഓര്‍ത്തഡോക്‌സ്‌ സഭാകേന്ദ്രം, കൂത്താട്ടുകുളം

.

നോമ്പ്‌ തലവിധിയെ വരെ മാറ്റിമറിക്കും - ഫാ.വില്‍സണ്‍ മാത്യൂസ്‌



കൂത്താട്ടുകുളം : ആത്മിയ നൊമ്പരമുണ്ടാക്കുന്ന പശ്ചാത്തലമൊരുക്കുകയാണ്‌ നോമ്പിന്റെ ഉദ്ദേശമെന്നും നോമ്പ്‌ മനുഷ്യനെ ദൈവത്തോടു ചേര്‍ന്നു വസിക്കുന്നതിലേക്കു നയിക്കുന്ന വഴിമാത്രമാണെന്നും സോഫിയ സെന്റര്‍ പ്രോഗ്രാം സെക്രട്ടറി ഫാ.വില്‍സണ്‍ മാത്യൂസ്‌ ചൂണ്ടിക്കാട്ടി. കൂത്താട്ടുകുളം സെന്റ് ജോണ്‍സ് നഗറില്‍ (കെ.ടി. ജേക്കബ് സ്മാരക ടൗണ്‍ ഹാളില്‍) 60-ാമത്‌ കൂത്താട്ടുകുളം ഓര്‍ത്തഡോക്‌സ്‌ സിറിയന്‍ ബൈബിള്‍ കണ്‍വെന്‍ഷന്റെ രണ്ടാം ദിവസമായ 11-ആം തീയതി വ്യാഴാഴ്ച വചന ശുശ്രൂഷ നടത്തുകയായിരുന്നു അദ്ദേഹം.

നോമ്പ്‌ തലവിധിയെയും ദൈവശിക്ഷയെയും വരെ മാറ്റിമറിക്കും. നമ്മുടെ സമൂഹത്തിന്റെ മേല്‍ വിധിച്ചിരിക്കുന്ന പ്രതിസന്ധിയില്‍നിന്ന്‌ കരകയറ്റുവാനും ലോകത്തെ കാക്കുവാനും ദൈവസന്നിധിയില്‍ അപേക്ഷിക്കുന്നതിനാണ്‌ നോമ്പ്‌ . ദൈവസന്നിധിയില്‍ അപേക്ഷിക്കാത്തവര്‍ക്കുവേണ്ടിക്കൂടിയും മറ്റാരും അപേക്ഷിക്കാത്തപ്പോഴും നാം അപേക്ഷിച്ചുകൊണ്ടിരിക്കണം. പ്രശ്‌നങ്ങളെ, അത്‌ പരിഹരിക്കാന്‍ കഴിയുന്ന മാര്‍ഗത്തേക്കാള്‍, വലുതായികാണുന്നതാണ്‌ മനുഷ്യനെ വഴിമുട്ടിക്കുന്നത്‌. എത്ര വലിയ പ്രശ്‌നങ്ങളേക്കാളും വലിയ മാര്‍ഗം നിരവധി തുറക്കാന്‍ കഴിയുന്ന വലിയ ദൈവത്തെ ആശ്രയിക്കുവാന്‍ നമുക്കുകഴിയണം.

അഞ്ച്‌ അപ്പവും രണ്ട്‌ മീനും കൊണ്ട്‌ അയ്യായിരം പേരെയും 7 അപ്പവും കുറച്ച്‌ ചെറുമീനും കൊണ്ട്‌ നാലായിരം പേരെയും യേശു തൃപ്‌തിപ്പെടുത്തിയ കഥ അദ്ദേഹം ഉദ്ധരിച്ചു. താരതമ്യേന കൂടുതല്‍ അപ്പവും മീനും ഉപയോഗിച്ചിട്ടും ശേഷിപ്പ്‌ കുറവായിരുന്നുവെന്നും അദ്ദേഹം ചൂണ്ടിക്കാട്ടി.

ഫാ. ജോണ്‍ വി ജോണ്‍ സ്വാഗതവും ഫാ. ജോയി കടുകുംമാക്കില്‍ നന്ദിയും പറഞ്ഞു. കണ്‍വന്‍ഷന്‍ 14-ാം തീയതി സമാപിക്കും.

ഫോട്ടോ ക്രെഡിറ്റ് :- ഓര്‍ത്തഡോക്‌സ്‌ സഭാകേന്ദ്രം, കൂത്താട്ടുകുളം

രക്ഷക്കുവേണ്ടിയുള്ള ശ്രമമാണ്‌ ക്രിസ്‌തീയ ജീവിതം - ഫാ.റ്റി.ജെ.ജോഷ്വ


കൂത്താട്ടുകുളം : യേശുവിന്റെ മനുഷ്യാവതാരത്തിന്റെ മൗലിക ലക്ഷ്യം മനുഷ്യവര്‍ഗത്തിന്റെ രക്ഷയായിരുന്നുവെന്നും രക്ഷ എന്നത്‌ തുടര്‍ന്നുകൊണ്ടിരിക്കുന്ന പ്രക്രിയയാണെന്നും പ്രമുഖ സുവിശേഷ പ്രസംഗകനായ കോട്ടയം ഓര്‍ത്തഡോക്‌സ്‌ വൈദിക സെമിനാരിയിലെ ഫാ.റ്റി.ജെ.ജോഷ്വ ചൂണ്ടിക്കാട്ടി. കൂത്താട്ടുകുളം സെന്റ് ജോണ്‍സ് നഗറില്‍ (കെ.ടി. ജേക്കബ് സ്മാരക ടൗണ്‍ ഹാളില്‍) 60-ാമത്‌ കൂത്താട്ടുകുളം ഓര്‍ത്തഡോക്‌സ്‌ സിറിയന്‍ ബൈബിള്‍ കണ്‍വന്‍ഷന്റെ ആദ്യദിവസമായ ഫെ 10 ബുധനാഴ്ച വൈകീട്ട് ചെയ്‌ത്‌ വചനശുശ്രൂഷ ചെയ്യുകയായിരുന്നു ഫാ. റ്റി.ജെ.ജോഷ്വ.


ലോകത്തെ രൂപാന്തരപ്പെടുത്തുവാന്‍ തക്കവണ്ണം ജീവിക്കുന്ന കര്‍ത്താവായ യേശുവിലുള്ള വിശ്വാസവും ബോദ്ധ്യവും എല്ലാവര്‍ക്കുമുണ്ടാകണമെന്നു് അദ്ദേഹം പറഞ്ഞു. നിര്‍വചനം ചൊല്ലിക്കൂട്ടുന്നതല്ല വിശ്വാസം. രക്ഷക്കുവേണ്ടിയുള്ള ശ്രമമാണ്‌ ക്രിസ്‌തീയ ജീവിതം. യേശു ഉത്തമ മനുഷ്യ മാതൃക മാത്രമല്ല. യേശുവിന്റെ മനുഷ്യാവതാരത്തിന്റെ മൗലിക ലക്ഷ്യം മനുഷ്യവര്‍ഗത്തിന്റെ രക്ഷയായിരുന്നു. രക്ഷിക്കപ്പെടുന്നവരെ ദൈവം സഭയോട്‌ ചേര്‍ത്തുകൊണ്ടിരിക്കുന്നു. രക്ഷയെന്നത്‌ തുടരുന്ന പ്രക്രിയയാണ്‌.


രക്ഷയുടെ അനുഭവം കുടുംബത്തിനുകൂടിയാണ്‌ ലഭിക്കുകയെന്നതിനാല്‍ കുടുംബത്തിന്റെ കെട്ടുറപ്പിനും കുടുംബത്തിന്റെ ആത്മീയത ശക്തിപ്പെടുത്തുന്നതിനും വേണ്ടി തിരുസഭ അതീവതാല്‍പര്യം കാണിക്കണമെന്ന്‌ കണ്ടനാട് ഈസ്റ്റ് ഭദ്രാസന മെത്രാപ്പോലീത്ത ഡോ. തോമസ് മാര്‍ അത്തനാസ്യോസിനോടും പരിശുദ്ധ സുന്നഹദോസിനോടും ഫാ. റ്റി.ജെ.ജോഷ്വ അഭ്യര്‍ത്ഥിച്ചു.


ഫാ. ജോഷ്വായുടെ പ്രസംഗത്തിനുശേഷം ഡോ. തോമസ് മാര്‍ അത്തനാസ്യോസ് മെത്രാപ്പോലിത്ത ഉദ്‌ഘാടന പ്രസംഗം ചെയ്‌തു. കുടുംബത്തിന്റെ ആത്മീയതയിലും സാമൂഹികതയിലുമാണ്‌ രക്ഷ അനുഭവവേദ്യമാകുന്നതെന്ന്‌ മെത്രാപ്പോലീത്ത ഉദ്‌ഘാടന പ്രസംഗത്തില്‍ പറഞ്ഞു.


ഫാ.ജോണ്‍ വി. ജോണ്‍ സ്വാഗതവും ഫാ. മാത്യൂസ്‌ ചെമ്മനാപ്പാടം നന്ദിയും പറഞ്ഞു. കണ്‍വന്‍ഷന്‍ 14-ാം തീയതി സമാപിക്കും.

ഫോട്ടോ ക്രെഡിറ്റ് :- ഓര്‍ത്തഡോക്‌സ്‌ സഭാകേന്ദ്രം, കൂത്താട്ടുകുളം
.

ജീവിതത്തില്‍ വ്യത്യാസമുണ്ടാകുന്നില്ലെങ്കില്‍ അനുതാപമാകുന്നില്ല : ഡോ.തോമസ്‌ മാര്‍ അത്താനാസിയോസ്‌ മെത്രാപ്പോലീത്ത


കൂത്താട്ടുകുളം : ക്രിസ്‌തുബന്ധത്തില്‍ നേടുന്ന വിടുതല്‍ അനുഭവമാണ്‌ രക്ഷ എന്ന്‌ കണ്ടനാട്‌ ഈസ്റ്റ്‌ ഭദ്രാസനാധിപന്‍ ഡോ.തോമസ്‌ മാര്‍ അത്താനാസിയോസ്‌ മെത്രാപ്പോലീത്ത പ്രസ്‌താവിച്ചു. കൂത്താട്ടുകുളം കെ.റ്റി. ജേക്കബ്‌ മെമ്മോറിയല്‍ ടൗണ്‍ഹാളില്‍ അഞ്ചു ദിവസം നീണ്ടുനില്‍ക്കുന്ന 60-ാമത്‌ കൂത്താട്ടുകുളം ഓര്‍ത്തഡോക്‌സ്‌ സിറിയന്‍ ബൈബിള്‍ കണ്‍വന്‍ഷന്‍ ഉദ്‌ഘാടനം ചെയ്‌ത്‌ സംസാരിക്കുകയായിരുന്നു മെത്രാപ്പോലീത്ത. സകല ആസക്തികളില്‍നിന്നും സ്വതന്ത്രമായതും ദൈവത്തോടും മനുഷ്യസമൂഹത്തോടുമുള്ള കവിഞ്ഞൊഴുകുന്നതുമായ സ്‌നേഹമാണ്‌ രക്ഷയിലേക്കു വരുത്തുന്നത്‌.

ക്രിസ്‌തു കാണിച്ചുതന്ന വഴിയിലൂടെയാണ്‌ പിതാവിലെത്തുന്നത്‌. അത്‌ അവലംബിക്കാനുള്ള മാര്‍ഗ്ഗമാണ്‌ ; പഠിക്കാനുള്ളതല്ല. ക്രിസ്‌തുവിന്റെ മാര്‍ഗ്ഗമാണ്‌ ഗാന്ധിജി അവലംബിച്ചത്‌. രക്ഷയ്‌ക്ക്‌ ശത്രുകൂടി പങ്കാളിയാകേണ്ടതുമാണ്‌. രക്ഷ എന്നത്‌ മരിച്ചുചെല്ലുമ്പോള്‍ കിട്ടുന്ന അനുഭവമല്ലെന്നും ഇവിടെ നടക്കേണ്ട അനുഭവമാണെന്നും മെത്രാപ്പോലീത്ത പറഞ്ഞു. ദൈവരാജ്യം ഇവിടെ കൊണ്ടുവരാനാണു് യേശു വന്നതു്.

ക്രിസ്‌തുവിനോടൊപ്പമുള്ള പീഡാനുഭവമാണ്‌ ജീവിതത്തിന്‌ അര്‍ത്ഥമുണ്ടാക്കുന്നത്‌. അനുതാപവും മാമോദീസയും രക്ഷകൈവരുത്തുന്ന നിരന്തര പ്രക്രീയയാണ്‌. കുറച്ചുള്ളതുപോലും മറ്റുള്ളവരുമായി പങ്കിടുന്നതും സത്യം വീടാതെയും ബലം പ്രയോഗിക്കാതിരിക്കുന്നതുമാണ്‌ അനുതാപം. മാനസികാനുഭവം മാത്രമല്ല സത്താപരമായ പരിവര്‍ത്തനമാണത്‌. അടിസ്ഥാനപരമായ ജീവിതത്തിലെ വ്യത്യാസമാണുണ്ടാവേണ്ടത്‌. നിന്ന നില്‍പ്പില്‍ തിരിയുക എന്നര്‍ത്ഥമുള്ള മെറ്റനോയിയ എന്ന ഗ്രീക്കുപദം കൊണ്ടാണത്‌ സൂചിപ്പിക്കുന്നത്‌. ജീവിതത്തില്‍ വ്യത്യാസമില്ലെങ്കില്‍ അനുതാപമാകുന്നില്ല. ദൈവരാജ്യത്തിനുവേണ്ടി നിരന്തരമായി പീഡനമനുഭവിക്കുകയെന്നതാണ്‌ മാമോദീസയുടെ (സ്‌നാനത്തിന്റെ) അര്‍ത്ഥം - മെത്രാപ്പോലീത്ത വ്യക്തമാക്കി

ഫാ.റ്റി.ജെ.ജോഷ്വ

ഉദ്‌ഘാടനത്തിനുശേഷം പ്രമുഖ സുവിശേഷ പ്രസംഗകനായ കോട്ടയം ഓര്‍ത്തഡോക്‌സ്‌ വൈദിക സെമിനാരിയിലെ ഫാ.റ്റി.ജെ.ജോഷ്വ ആദ്യദിവസത്തെ വചനശുശ്രൂഷ നടത്തി. യേശുവിന്റെ മനുഷ്യാവതാരത്തിന്റെ മൗലിക ലക്ഷ്യം മനുഷ്യവര്‍ഗത്തിന്റെ രക്ഷയായിരുന്നുവെന്നും രക്ഷ എന്നത്‌ തുടര്‍ന്നുകൊണ്ടിരിക്കുന്ന പ്രക്രിയയാണെന്നും അദ്ദേഹം ചൂണ്ടിക്കാട്ടി.

ഫാ.ജോണ്‍ വി. ജോണ്‍ സ്വാഗതവും ഫാ. മാത്യൂസ്‌ ചെമ്മനാപ്പാടം നന്ദിയും പറഞ്ഞു. 12-ാം തീയതി വെള്ളിയാഴ്‌ച സന്ധ്യക്ക്‌ ഫാ.മോഹന്‍ ജോസഫും 13-ാം തീയതി സന്ധ്യക്ക്‌ എപ്പിസ്‌കോപ്പല്‍ സുന്നഹദോസ്‌ സെക്രട്ടറി മാത്യൂസ്‌ മാര്‍ സേവേറിയോസ്‌ മെത്രാപ്പോലീത്തയും വചന ശുശ്രൂഷ നിര്‍വഹിക്കും. കണ്‍വന്‍ഷന്‍ 14-ാം തീയതി സമാപിക്കും.

ഫോട്ടോ ക്രെഡിറ്റ് :- ഓര്‍ത്തഡോക്‌സ്‌ സഭാകേന്ദ്രം, കൂത്താട്ടുകുളം
.

അറുപതാമത്‌ കൂത്താട്ടുകുളം ഓര്‍ത്തഡോക്‌സ്‌ സിറിയന്‍ ബൈബിള്‍ കണ്‍വന്‍ഷന്‌ ഭക്തിനിര്‍ഭരമായ തുടക്കം

.


കൂത്താട്ടുകുളം: അറുപതാമത് കൂത്താട്ടുകുളം ബൈബിള്‍ കണ്‍വെന്‍ഷന്‍ ഭക്തിനിര്‍ഭരമായ ചടങ്ങുകളോടെ തുടങ്ങി.

കൂത്താട്ടുകുളം സെന്റ് ജോണ്‍സ് നഗറില്‍ (കെ.ടി. ജേക്കബ് സ്മാരക ടൗണ്‍ ഹാള്‍) ഫെ 10 ബുധനാഴ്ച വൈകീട്ട് ചേര്‍ന്ന ചടങ്ങില്‍ കണ്ടനാട് ഈസ്റ്റ് ഭദ്രാസന മെത്രാപ്പോലീത്ത ഡോ. തോമസ് മാര്‍ അത്തനാസ്യോസ് ഉദ്ഘാടനം ചെയ്തു.

തുടര്‍‍ന്നു് ഓര്‍ത്തഡോക്‌സ് വൈദിക സെമിനാരിയിലെ റവ. ഫാ. ടി.ജെ. ജോഷ്വ വചനശുശ്രൂഷ നടത്തി. 11-ആം തീയതി വ്യാഴാഴ്ച സോഫിയ സെന്റര്‍ പ്രോഗ്രാം സെക്രട്ടറി വില്‍‍സന്‍ മാത്യൂസ് വചനശുശ്രൂഷ നടത്തി.

ദിവസവും 6.30 മുതല്‍ 8.55 വരെ കൂത്താട്ടുകുളം ടൗണ്‍ ഹാളില്‍ നടക്കുന്ന കണ്‍വന്‍ഷന്‍ 14 ന്‌ സമാപിക്കും. 12-ആം തീയതി വെള്ളിയാഴ്‌ച സന്ധ്യക്ക്‌ കോട്ടയം ഏലിയ കത്തീഡ്രല്‍ വികാരി ഫാ.മോഹന്‍ ജോസഫും 13-ആം തീയതി സന്ധ്യക്ക്‌ എപ്പിസ്‌കോപ്പല്‍ സുന്നഹദോസ്‌ സെക്രട്ടറി മാത്യൂസ്‌ മാര്‍ സേവേറിയോസ്‌ മെത്രാപ്പോലീത്തയും 14 ഞായറാഴ്‌ച തോമസ്‌ കുരുവിളയും വചന ശുശ്രൂഷ നിര്‍വഹിക്കും.

ഫാ.മാത്യുസ് ചമ്മനാപ്പാടം, ഫാ. ജോണ്‍ വി.ജോണ്‍, ജോസഫ് ജോര്‍ജ്ജ് കളത്തില്‍ മാത്തുക്കുട്ടി പറപ്പേടത്തു്, ബിജു പാറത്തോട്ടയില്‍, ഏ വി മത്തായി ഏറമ്പടം എന്നിവരായിരുന്നു മുഖ്യസംഘാടകര്‍‍. എം എസ് ജോണിന്റെ നേതൃത്വത്തിലുള്ള ഗായകസംഘമാണു് ഗാനങ്ങള്‍ ആലപിയ്ക്കുന്നതു്.
--
ചിത്രവിവരണം:-- 60-ആമത്‌ കൂത്താട്ടുകുളം ഓര്‍ത്തഡോക്‌സ്‌ സിറിയന്‍ ബൈബിള്‍ കണ്‍വന്‍ഷന്‍ കണ്ടനാട്‌ ഈസ്റ്റ്‌ ഭദ്രാസനാധിപന്‍ ഡോ. തോമസ്‌ മാര്‍ അത്താനിയോസ്‌ ഉദ്‌ഘാടനം ചെയ്‌തു. ഫാ.ഷിബു കുര്യന്‍, ഫാ.വി.ജെ.പൗലോസ്‌ പനയാരംപിള്ളില്‍, ഫാ. റ്റി.ജെ. ജോഷ്വ , ജോണ്‍ തളിയച്ചിറ കോര്‍ എപ്പിസ്‌കോപ്പ, ഫാ. മാത്യൂസ്‌ ചെമ്മനാപ്പാടം, ഫാ. ജോണ്‍ വി. ജോണ്‍ എന്നിവര്‍ സമീപം.
ക്രെഡിറ്റ് :- ഓര്‍ത്തഡോക്‌സ്‌ സഭാകേന്ദ്രം, കൂത്താട്ടുകുളം
.

ദേവാലയങ്ങള്‍ മതസൗഹാര്‍ദം ശക്‌തിപ്പെടുത്തുന്ന കേന്ദ്രങ്ങളാകണം – അരാം കാതോലിക്കാ ബാവ


മൂവാറ്റുപുഴ: മതങ്ങള്‍ തമ്മിലുള്ള സഹവര്‍ത്തിത്വത്തിന്റെ സ്വപ്നഭൂമിയാണ് കേരളമെന്നതിന് ഇവിടത്തെ വിവിധ ദേവാലയങ്ങളുടെ സജീവസാന്നിദ്ധ്യം തെളിവാണെന്ന് അര്‍മീനിയന്‍ ഓര്‍ത്തഡോക്‌സ്‌ സഭാ തലവന്‍ പരിശുദ്ധ അരാം പ്രഥമന്‍ കാതോലിക്കാ ബാവാ പറഞ്ഞു. മുവാറ്റുപുഴ സെന്റ് തോമസ് കത്തീഡ്രല്‍ അരമനയില്‍ നല്‍കിയ സ്വീകരണത്തില്‍ സംസാരിക്കുകയായിരുന്നു പരിശുദ്ധ കാതോലിക്കാ ബാവ.



ദേവാലയങ്ങള്‍ മതസൗഹാര്‍ദം ശക്‌തിപ്പെടുത്തുന്ന കേന്ദ്രങ്ങളാകണമെന്ന്‌ അര്‍മീനിയന്‍ കാതോലിക്കാ ബാവ പറഞ്ഞു. ദേവാലയം ക്രിസ്‌തുവിന്റെ ശരീരമാണ്‌. ദേവാലയങ്ങളുടെ നിര്‍മിതി സര്‍വമത സാഹോദര്യം ഊട്ടിയുറപ്പിക്കുന്നതിനും നീതി സമൂഹത്തിന്റെ കെട്ടുപണിക്കും ഉപകരിക്കണമെന്ന് ബാവ പറഞ്ഞു. നിലനില്‍ക്കുന്ന പ്രദേശത്തിന്‌ ഐശ്വര്യവും സമൃദ്ധിയും ശാന്തിയും പകരാന്‍ അതിനു കഴിയും. ഭാരതത്തിനു സുവിശേഷ വെളിച്ചം പകര്‍ന്നു നല്‍കിയ സെന്റ്‌ തോമസിന്റെ നാമത്തിലുള്ള ദേവാലയം മൂവാറ്റുപുഴയുടെ ഐശ്വര്യമാകട്ടെയെന്ന്‌ അദ്ദേഹം ആശംസിച്ചു.


ഭദ്രാസനാധിപന്‍ ഡോ. തോമസ്‌ മാര്‍ അത്താനാസിയോസ്‌ സ്വാഗതപ്രസംഗം നടത്തി . കണ്ടനാട്‌ ഈസ്‌റ്റ്‌ ഭദ്രാസന ആസ്‌ഥാനമായ മൂവാറ്റുപുഴ അരമനയില്‍ പുതുക്കിപ്പണിയുന്ന സെന്റ്‌ തോമസ്‌ കത്തീഡ്രലിന്റെ ശിലാസ്‌ഥാപനം ബാവ നിര്‍വഹിച്ചു. മുവാറ്റുപുഴ നഗരസഭ കണ്ടനാട് ഈസ്റ്റ് ഭദ്രാസനം, സെന്റ് തോമസ് കത്തീഡ്രല്‍ എന്നിവിടങ്ങളില്‍ നിന്നുള്ള ഉപഹാരങ്ങള്‍ ബാവയ്ക്ക് നല്‍കി. നഗരസഭയുടെ ഉപഹാരം നഗരസഭാധ്യക്ഷ മേരി ജോര്‍ജ്‌ തോട്ടവും, കണ്ടനാട്‌ ഭദ്രാസനത്തിന്റെ ഉപഹാരം ഡോ. തോമസ്‌ മാര്‍ അത്തനാസിയോസുമാണു് പരിശുദ്ധ ബാവായ്‌ക്കു സമര്‍പ്പിച്ചതു്.



അര്‍മീനിയന്‍ പ്രതിനിധി സംഘത്തിലെ ടെഹ്‌റാന്‍ ആര്‍ച്ച്‌ ബിഷപ്‌ സെബൗ സര്‍ക്കീസിയാന്‍, ബിഷപ്‌ നരേഗ്‌ അല്‍എമിസിയാന്‍, ഫാ. മെസറോബ്‌ സര്‍ക്കിസിയാന്‍, ഓര്‍ത്തഡോക്‌സ്‌ സഭ ശ്രേഷ്‌ഠ നിയുക്‌ത കാതോലിക്ക പൗലോസ്‌ മാര്‍ മിലിത്തിയോസ്‌, ഡോ. ഗീവര്‍ഗീസ്‌ മാര്‍ കൂറിലോസ്‌, ഡോ. ഗബ്രിയേല്‍ മാര്‍ ഗ്രിഗോറിയോസ്‌, അലക്‌സിയോസ്‌ മാര്‍ യൗസേബിയോസ്‌, ബാബു പോള്‍ എംഎല്‍എ, നഗരസഭാധ്യക്ഷ മേരി ജോര്‍ജ്‌ തോട്ടം, പി.കെ. സുലൈമാന്‍ മൗലവി, എന്‍എസ്‌എസ്‌ താലൂക്ക്‌ യൂണിയന്‍ പ്രസിഡന്റ്‌ പി.കെ. രാധാകൃഷ്‌ണന്‍ തുടങ്ങിയവര്‍ പങ്കെടുത്തു. ഭദ്രാസന സെക്രട്ടറി ഫാ. ഏബ്രഹാം കാരാമേല്‍ നന്ദി പ്രസംഗം നടത്തി .


വൈകീട്ട് 4ന് അരമന കവാടത്തില്‍ പരിശുദ്ധ അരാം പ്രഥമന്‍ ബാവയെയും മെത്രാപ്പോലീത്തമാരെയും ബാബു പോള്‍ എംഎല്‍എ, മുനിസിപ്പല്‍ ചെയര്‍പേഴ്‌സണ്‍ മേരി ജോര്‍ജ്, ഭദ്രാസന മെത്രാപ്പോലീത്ത ഡോ. തോമസ് മാര്‍ അത്തനാസിയോസ് എന്നിവരോടെ നേതൃത്വത്തില്‍‍ വൈദികരും വിശ്വാസികളും ചേര്‍ന്നു സ്വീകരിച്ചാനയിച്ചു.


കത്തീഡ്രല്‍ വികാരിമാരായ ഫാ. മാത്യൂസ്‌ കാഞ്ഞിരംപാറ, ഫാ. മേരിദാസ്‌ സ്‌റ്റീഫന്‍, അരമന മാനേജര്‍ തോമസ്‌ പോള്‍ റമ്പാന്‍, ഗീവര്‍ഗീസ്‌ റമ്പാന്‍, ഭദ്രാസന സെക്രട്ടറി ഫാ. ഏബ്രഹാം കാരാമേല്‍ തുടങ്ങിയവര്‍ സ്വീകരണത്തിനു നേതൃത്വം നല്‍കി.

.

കെ.എസ്.ടി.പി ഏറ്റെടുത്ത കൂത്താട്ടുകുളം ടൗണ്‍ ഓര്‍ത്തഡോക്‌സ് സുറിയാനി ചാപ്പല്‍ ആരാധനയ്ക്കായി തുറന്നു


കൂത്താട്ടുകുളം: കൂത്താട്ടുകുളം ടൗണ്‍ വികസനത്തിന്റെ ഭാഗമായി കെ.എസ്.ടി.പി. ഏറ്റെടുത്ത വടകര സെന്റ് ജോണ്‍സ് ഓര്‍ത്തഡോക്‌സ് സുറിയാനി പള്ളി വക കൂത്താട്ടുകുളം ടൗണ്‍ ചാപ്പല്‍ ആരാധനയ്ക്കായി ഫെ 27 ശനിയാഴ്ച വൈകീട്ട് തുറന്നുകൊടുത്തു. ജില്ലാകളക്ടറുടെ നിര്‍ദേശപ്രകാരമാണ് ദേവാലയം പോലീസ് തുറന്നുകൊടുത്തത്.

ടൗണ്‍ വികസനത്തിന്റെ ഭാഗമായി കെ.എസ്.ടി.പി.ക്കു വേണ്ടിയുള്ള പൊന്നുംവില നടപടിയോട് ബന്ധപ്പെട്ട് കൂത്താട്ടുകുളം സെന്റ് ജോണ്‍സ് പള്ളി ചാപ്പലും വ്യാപാരമന്ദിര സമുച്ചയവും കഴിഞ്ഞ ബുധനാഴ്ച ഏറ്റെടുത്തിരുന്നു. ഭൂമി ഏറ്റെടുക്കല്‍ തഹസീല്‍ദാര്‍, മറ്റ് റവന്യൂ ഇന്‍സ്‌പെക്ടര്‍മാര്‍, പോലീസ് ഉദ്യോഗസ്ഥര്‍ എന്നിവരുടെ സാന്നിദ്ധ്യത്തിലാണ് തഹസീല്‍ദാരുടെ അധീനതയിലേക്ക് ഏറ്റെടുക്കല്‍ നടന്നത്. ചാപ്പലിലേക്കുള്ള കവാടം പൂട്ടി താക്കോല്‍ കെ.എസ്.ടി.പി അധികൃതര്‍ ഏറ്റുവാങ്ങുകയും ചെയ്തു.

എന്നാല്‍ ഏറ്റെടുത്ത ഭാഗം പൊളിച്ചുമാറ്റുന്നതുവരെ ചാപ്പലില്‍ ആരാധന നടത്തുന്നതിന് അനുവാദം തരണമെന്നാവശ്യപ്പെട്ട് വടകര സെന്റ് ജോണ്‍സ് ഓര്‍ത്തഡോക്‌സ് സുറിയാനി പള്ളി വികാരി ഫാ. പി.സി. ജോയി കടുകുംമാക്കില്‍‍ അധികൃതര്‍ക്ക് നിവേദനം നല്‍കി. ചാപ്പല്‍ പൂട്ടുന്നസമയത്തും വിശ്വാസികള്‍ ഈ ആവശ്യം ഉന്നയിച്ചിരുന്നു. തുടര്‍ന്ന് ഫെ 27 ശനിയാഴ്ച ഫാ. പി.സി. ജോയി കടുകുംമാക്കില്‍, ഫാ. ജോണ്‍ വി. ജോണ്‍, ഫാ. മാത്യു എബ്രാഹം എന്നിവര്‍ ജില്ലാ കളക്ടറെ നേരില്‍ക്കണ്ടു.

ചാപ്പലിന്റെ താക്കോല്‍ കെ.എസ്.ടി.പി എന്‍ജിനീയറില്‍നിന്നും പിറവം സി.ഐ മുഖേന കൂത്താട്ടുകുളം പോലീസ് ഏറ്റുവാങ്ങി. ആരാധനയ്ക്കുശേഷം പള്ളി അടച്ച് താക്കോല്‍ സൂക്ഷിക്കേണ്ടതാണെന്നും പിറവം സര്‍ക്കിള്‍ ഇന്‍സ്‌പെക്ടര്‍ക്ക് ഉത്തരവ് നല്‍കിയിട്ടുണ്ട്. മൂവാറ്റുപുഴ തഹസീല്‍ദാര്‍, റവന്യൂ ഡിവിഷണല്‍ ആഫീസര്‍, എ.ഡി.എം എന്നിവര്‍ക്കും ഉത്തരവുകള്‍ കളക്ടര്‍ നല്‍കിയിട്ടുണ്ട്.
.

സമൂഹത്തിലും സഭയിലും വിഭജനമല്ല ഐക്യമാണ് ക്രൈസ്തവ ദൌത്യം : പ. അരാം പ്രഥമന്‍ കാതോലിക്കാ


ദേവലോകം (കോട്ടയം), ഫെ 26:സമൂഹത്തിലും സഭയിലും വിഭജനത്തിന്റെ വിത്തുപാകുകയല്ല ദൈവേഷ്ടം നിറവേറ്റുന്നതിനായി ഐക്യത്തോടെ പ്രവര്‍ത്തിക്കുകയാണ് ക്രൈസ്തവ ദൌത്യമെന്ന് ലോകസമാധാനത്തിനായുള്ള മതങ്ങളുടെ പൊതു വേദിയുടെ സ്ഥാപകാദ്ധ്യക്ഷനും അര്‍മീനിയന്‍ സഭാ തലവനുമായ പരിശുദ്ധ അരാം പ്രഥമന്‍ കാതോലിക്കാ ബാവാ പ്രസ്താവിച്ചു.

മലങ്കര സഭയില്‍ ഐക്യമാണ് വിഭജനമല്ല ആഗ്രഹിക്കുന്നതെന്ന് അദ്ദേഹം ഉറപ്പിച്ചു പറഞ്ഞു. ഓറിയന്റല്‍ ഓര്‍ത്തഡോക്സ് സഭകള്‍ സ്വയം ശീര്‍ഷകത്വമുള്ള സഭകളുടെ ഒരു കുടുംബമാണ് അവിടെ പ്രഥമത്വത്തിനു് (പ്രൈമസിക്ക്) പ്രസക്തിയില്ല.




മലങ്കര ഓര്‍ത്തഡോക്സ് സുറിയാനി സഭയിലെ എല്ലാ മെത്രാപ്പോലീത്താമാരും അര്‍മീനിയന്‍ സഭയില്‍ നിന്ന് മലങ്കര സഭ സന്ദര്‍ശിക്കുന്ന മെത്രാപ്പോലീത്താമാരും സംയുക്തമായി നടത്തിയ ലോക സമാധാനത്തിനും മത സൌഹാര്‍ദ്ദത്തിനും വേണ്ടിയുള്ള പ്രത്യേക പ്രാര്‍ത്ഥനാ ശുശ്രൂഷയില്‍ മുഖ്യ പ്രഭാഷണം രാവിലെ ഒമ്പതിന്‌ ദേവലോകം അരമന കോണ്‍ഫറന്‍സ്‌ ഹാളില്‍ നടത്തുകയായിരുന്നു അദ്ദേഹം.

പ. ബസേലിയോസ് മാര്‍ത്തോമ്മാ ദിദിമോസ് പ്രഥമന്‍ കാതോലിക്കാ ബാവാ അദ്ധ്യക്ഷത വഹിച്ചു. ശ്രേഷ്ഠ നിയുക്ത കാതോലിക്കാ പൌലോസ് മാര്‍ മിലിത്തിയോസ് സുന്നഹദോസ് സെക്രട്ടറി ഡോ. മാത്യൂസ് മാര്‍ സേവേറിയോസ് , ഡോ. ഗീവറുഗീസ് മാര്‍ ഒസ്താത്തിയോസ്, തോമസ് മാര്‍ അത്താനാസിയോസ്, ഡോ. യൂഹാനോന്‍ മാര്‍ മിലിത്തിയോസ് , സഖറിയാസ് മാര്‍ നിക്കോളോവാസ്, ഡോ. യാക്കൂബ് മാര്‍ ഐറേനിയോസ് ഇരു സഭകളിലെ എക്യുമെനിക്കല്‍ റിലേഷന്‍സ് കമ്മറ്റി പ്രസിഡണ്ട്മാരായ ഡോ. ഗബ്രിയേല്‍ മാര്‍ ഗ്രീഗോറിയോസ് , ബിഷപ്പ് നരേഗ് അല്‍മെസിയാന്‍ എന്നിവര്‍ സമാധാന - സൌഹാര്‍ദ്ദ ശുശ്രൂഷയ്ക്ക് നേതൃത്വം നല്കി.
.

അരാം പ്രഥമന്‍ ബാവയ്‌ക്ക്‌ മൂവാറ്റുപുഴ അരമനയില്‍ സ്വീകരണം ഫെ 27 ശനിയാഴ്ച


മൂവാറ്റുപുഴ: മലങ്കര ഓര്‍ത്തഡോക്‌സ് സഭയുടെ ഔദ്യോഗിക ക്ഷണമനുസരിച്ചു കേരളം സന്ദര്‍ശിക്കുന്ന അര്‍മീനിയന്‍ ഓര്‍ത്തഡോക്‌സ് സഭയുടെ കിലിക്യയിലെ കാതോലിക്കാ പരിശുദ്ധ അരാം പ്രഥമന്‍ ബാവയ്‌ക്ക്‌ കണ്‌ടനാട്‌ ഈസ്റ്റ്‌ ഭദ്രാസന ആസ്ഥാനമായ മൂവാറ്റുപുഴ അരമനയില്‍ ഫെ 27 ശനിയാഴ്ച സ്വീകരണം നല്‍കും. ഉച്ചകഴിഞ്ഞ്‌ 3.30-ന്‌ എത്തിച്ചേരുന്ന ബാവയെ തോമസ്‌ മാര്‍ അത്താനാസിയോസ്‌ മെത്രാപ്പോലീത്ത, ബാബു പോള്‍ എംഎല്‍എ, നഗരസഭാധ്യക്ഷ മേരി ജോര്‍ജ്‌ തുടങ്ങിയവരുടെ നേതൃത്വത്തില്‍ സ്വീകരിച്ച്‌ കത്തീഡ്രലിലേയ്‌ക്ക്‌ ആനയിക്കും. പുതുക്കിപ്പണിയുന്ന സെന്റ്‌ തോമസ്‌ കത്തീഡ്രലിന്റെ ശിലാസ്ഥാപനം ബാവ നിര്‍വഹിക്കും. സംസ്ഥാന അതിഥിയായാണ്‌ ബാവ എത്തുന്നത്‌.

ഓറിയന്റല്‍ ഓര്‍ത്തഡോക്സ് സഭയിലെ സ്വയംശീര്‍‍ഷകസഭകളിലൊന്നായ കിലിക്യാ അര്‍മീനിയന്‍ ഓര്‍ത്തഡോക്സ് സഭയുടെ കാതോലിക്കോസാണു് പരിശുദ്ധ ആരാം കെഷീഷിയാന്‍ ബാവ. കാതോലിക്കോസേറ്റ് ഓഫ് ദ ഗ്രേറ്റ് ഹൗസ് ഓഫ് കിലിക്യാ (അര്‍മീനിയന്‍‍: Կաթողիկոսութիւն Հայոց Մեծի Տանն Կիլիկիոյ ) എന്നും അറിയപ്പെടുന്ന അര്‍മീനിയന്‍ ഓര്‍ത്തഡോക്സ് സഭയുടെ കിലിക്യാ സിംഹാസനത്തിന്റെ ആസ്ഥാനം 1930 മുതല്‍ ലെബാനോനിലെ ബെയ്റൂട്ടിനടുത്തുള്ള അന്തേലിയാസാണു്.

അര്‍മീനിയന്‍ ഓര്‍ത്തഡോക്സ് സഭയിലെ ഒരു വിഭാഗം കൂടിയാണു് കിലിക്യാ സിംഹാസനം. കിലിക്യാ സിംഹാസനത്തിന്റെ കാതോലിക്കോസിനു് സമ്പൂര്‍ണ സ്വയംഭരണാവകാശമുണ്ടെങ്കിലും സംയുക്ത അര്‍മീനിയന്‍ ഓര്‍ത്തഡോക്സ് സഭയില്‍ മുപ്പനുസരിച്ചു് രണ്ടാം സ്ഥാനമാണു്.


ബെയ്‌റൂട്ടില്‍ 1947ല്‍ ജനിച്ച അരാം കെഷീഷിയാന്‍ 1980ല്‍ എപ്പിസ്കോപ്പയായി. 1995 ജൂലൈ ഒന്നിന്‌ കിലിക്യയിലെ 45-ാമത്തെ കാതോലിക്കോസായി സ്‌ഥാനാരോഹണം ചെയ്‌തു. സഭകളുടെ ലോക കൗണ്‍സില്‍ (W C C) മോഡറേറ്ററായി രണ്ടു തവണയായി 15 വര്‍ഷം (1991 - 2006) പ്രവര്‍ത്തിച്ചു. ഈ സ്‌ഥാനത്തെത്തുന്ന ആദ്യത്തെ ഓര്‍ത്തഡോക്‌സുകാരനും ഏറ്റവും പ്രായം കുറഞ്ഞ വ്യക്‌തിയുമായിരുന്നു അദ്ദേഹം. ഈ സ്‌ഥാനത്തേക്ക്‌ ഒരാള്‍ രണ്ടാം തവണ തിരഞ്ഞെടുക്കപ്പെടുന്നതും ആദ്യമായിട്ടാണ്‌.

ലെബനോനിലെ ആഭ്യന്തര യുദ്ധം അവസാനിപ്പിക്കുന്നതില്‍ ബാവ പ്രമുഖ പങ്കു വഹിച്ചു. ലോക മത മ്യൂസിയം ഫൗണ്ടേഷന്‍, സമാധാനത്തിനു വേണ്ടിയുള്ള ലോക മത സംഘടന എന്നിവയുടെ പ്രസിഡന്റും ആണ്‌ ബാവ.

സഹോദരീ സഭാതലവനായ മലങ്കര ഓര്‍ത്തഡോക്സ് സുറിയാനി സഭാ പരമാദ്ധ്യക്ഷന്‍ പൗരസ്ത്യ കാതോലിക്കോസ് പരിശുദ്ധ ബസേലിയോസ് മാര്‍ത്തോമ്മാ ദിദിമോസ് പ്രഥമന്‍ ബാവയുടെ ക്ഷണ പ്രകാരം ഫെ 24 മുതല്‍ 28 വരെ പരിശുദ്ധ ആരാം കെഷീഷിയാന്‍ ബാവ മലങ്കര സഭാ സന്ദര്‍ശനത്തിലാണു്
.

പകര്‍പ്പനുമതി വിവരം

പകര്‍പ്പകാശ വിവരം പ്രത്യേകം പരാമര്‍‍ശിയ്ക്കാത്തവ പകര്‍പ്പവകാശനുമതിയുള്ളതായിരിയ്ക്കും. അവ എടുത്തു് പ്രസിദ്ധീകരിയ്ക്കുമ്പോള്‍ ഈ ഉറവിടത്തെ ഉദ്ധരിയ്ക്കേണ്ടതാണു്.